Баритон

Баритон то тип хлопского класичного гласу хторому ше вокални розпон гласу находзи помедзи баса и тенора. Вон найчастейши хлопски глас. Назва походзи зоз греческого язика βαρυτονος (баритонос) а значи глїбоке, чежке звучанє. Композиторе найчастейше пишу музику за тот глас зоз розпоном од f у малей октави по f1 у першей октави ( f над штреднїм c1), т.є. f - f1 у оперскей музики, а можлїве же глас мож прешириц на початку и на концу розпону-обсягу. Баритон звучи єдну октаву нїжей од мецосопрана вокалного уровня женских гласох и даєдних хлопских (тенора и контратенора).

Баритон, нотни приказ розпону гласа

Слово як значенє баритон гласа ше першираз похасновало у 15. вику, у чаше кед ше зявело пейцгласове и шейсцгласове шпиванє. Кед штирогласє постало стаємне коло 17. вику, баритонски линиї були заобидзени и вихабени у хорских композицийох так же шпиваче зоз баритон гласом були примушени шпивац тенор лєбо бас.

Баритонов гласовни розпон (дияпазон) приказани на калвиятури

Дзепоєдни теоретичаре класификую баритон на даскельо типи:

• тенор-баритон, хтори баржей тенор алє ма баритонски тембр-баритон тенор. При шпиваню висших тонох баритон гласом чежше шпивац. • лирски баритон глас хтори звучи лагодно, лирски, алє типично баритонскей фарби. Часци хтори написани за тот глас маю найвисшу теситуру. • лирско-драмски баритон, спомалшени, шветлого тону и значней моци. Може шпивац и лирски и драмски улоги у опери. • драматични баритон то глас цмейшого звучаня, моцнєйши є а поготов з моцносцу звука у централним и горнїм тонским розпону. Часци драмского баритона нїзшей теситури, алє у хвилькох високих мелодийских часцох можу досягнуц и одшпивац найвисши тони. • Бас-баритон то штреднї глас хтори ма прикмети характеристични и за бас и за баритон. Звичайно нє ма рухоми висши ноти, алє може одшпивац моцнєйше и нотно густейши пасажи (по F у велькей октави) кед ше поровна зоз нормалним баритоном. Характерує го моцни, дакеди интензивни звук у централним реґистру. Традицийни репертоар: Вотан у Дие Валкири и Голандяанин у опери Блукач-скитнїк Голандянин (композитора Рихарда Ваґнера), Фиґаро у опери Севильски байбер, Дон Дьовани у истоименней опери од В. А. Моцарта, Игор Святославич у опери Княз Иґор, Томски у опери Пикова дама итд. Спрам театралних документох, и новинарских записох мож обачиц же ше од початку 19. вику по штредок 1820-их, часто хасновал термин primo basso, basse cantante, и basse-taille за хлопох-шпивачох хтори познєйше були наволани баритони.

Стил вокализми bel canto хтори ше зявел у Италиї з початку 19. вику заменєл у опери шпивачох-кастратох хтори доминовали у предходним вику. Тото допринєсло же би ше на баритон патрело як окремну катеґорию гласа у одношеню на бас. Традицийно баси у оперох були ауторитети як цо то краль лєбо почитовани паноцец; алє зоз зявеньом гласа баритона композиторе вше вецей унапрямовали свойо улоги спрам баритонох хтори були сиґурни провадзаче їх улогох у оперох.

Значни композиторе белканто опери: Дьоакино Росини (Севильски байбер, Вилиям Тел); Ґаетано Доницети (Дон Пасквале, Любовни напиток, Лусия ди Ламермур, Лукреция Борджия, Ла фаворит); Винтєнцо Белини (Пуритани, Норма); Ґиатамо Маєрбер (Лес Хуґенотс); и млади Дюзепе Верди (Набуко, Ернани, Маґбет, Риґолето, Травията, Фалстаф).

Баритони у мюзиклох и поп музики

Баритон глас тиж заступени у мюзиклох углавним як високои баритони (Томас Борхерт лєбо Бруно Ґрасини). Алє постоя улоги у мюзиклох и за глїбоки баритон глас. Баритен музична вариянта баритона. Вон комбинує тенорски и баритонски елементи у вокалней фарби и розпону, як високи баритон, може превжац и нїзки тенорски часци.

Познати шпиваче зоз баритон галсом у поп музики:

Дин Мартин, Френк Синатра, Ли Хејзлвуд, Нил Даймонд, Том Смит (уредници), Дејв Гахан, Хајно, Стен Роджерс, Елвис Присли, Рой Орбисон, Джони Кеш, Джим Морисон, Том Џонс, Леонард Коен, Иян Кертис, Ник Кейв и велї други.

Вонкашня вяза

• Дмитрий Хворостовский-баритон, ария зоз опeри Демон.