Владимир Шанта

Владимир Шанта (*6. януар 1925—†12. май 2002), дружтвено-политични роботнїк и публициста.

Владимир Шанта
Владимир Шанта (2002)
Народзени	6. януара 1925 року.
Умар	12. мая 2002. року (77)
Державянство	югославянске, сербске
Язик творох	руски, сербски
Школа	Ремеселнїцка школа/испит
Висша школа	Висша школа дружтвено-политичних наукох, Нови Сад
Период твореня	1944—2002
Жанри	култура, дружтвено-политични анґажман, публицистика
Поховани	Грекокатолїцки теметов, Кула

Биоґрафия

Владимир Шанта ше народзел 6. януара 1925. року у Руским Керестуре. Походзи з познатей ремесельнїцкей фамелиї, оцец Кароль и мац Мелана нар. Надь. Владимир мал брата Славка и шестру Мелану.

Основну школу Владимир закончел у Руским Керестуре. При власному оцови Карольови виучел тишлїрске ремесло, майсторски испит за тишлїра покладал у Кули. Як шеґерт постал симпатизер роботнїцкого руху алє ше политично активовал уж як двацецрочни леґинь 1944. року, такой по ошлєбодзеню Войводини од окупатора. Постал скойовски и младежски руководитель у валалє, а 1945. року участвовал на младежскей роботней акциї на вибудови гайзибанскей драги Брчко- Бановичи и постал єден з перших удернїкох медзи керестурску младежу.

Политична кариєра

Владимир Шанта 23. децембра 1949. року вибрани за предсидателя Месного народноошлєбодительного одбору у Руским Керестуре як 24-рочни активиста. Року 1953. Владимир Шанта вибрани за предсидателя Совиту за привреду при керестурскей општини. Уж теди бул и политични секретар ОК СКВ у Руским Керестуре.

Владимир Шанта бул оженєти зоз Веруну дзивоцке Голик. У малженстве мали тройо дзеци, дзивки Ярославу и Леону и сина Владимира.

Єден час Владимир Шанта робел и як професийни новинар у Редакциї новинох Руске слово, пошвидко є меновани за управителя Землєдїлскей задруґи 1. май у Руским Керестуре. По локалних виберанкох 1957. року є знова вибрани за предсидателя Скупштини општини Руски Керестур. У тим периодзе Владимир Шанта порушал вецей привредни активносци а предлужени и роботи на вибудови Дома култури (потеди вецей роки будовательни роботи стали бо нє було средства за їх предлужованє). У медзичаше пришло до реорґанизациї општинох и срезох та Руски Керестур престал буц општина и Владимир Шанта 1960. року зоз фамелию одходзи до Кули хтора постала општина. Єден час бул секретар ОК СКЮ и член ПК СКВ.

Шейдзешатих рокох Владимир Шанта закончел Висшу школу дружтвено-политичних наукох у Новим Садзе. Потим бул на функциї подпредсидателя општини, предсидатель ОК ССРНВ и посланїк у скупштини АП Войводини. Остатнї дзешец роки бул секретар СИЗ-а за социялну и дзецинску защиту.

За свою дружтвено-политичну роботу Владимир Шанта достал вецей припознаня и одликованя.

Владимир Шанта умар 12. мая 2002. року а поховани є на грекокатолїцким теметове у Кули.

Културна и публицистична дїялносц

Владимир Шанта бул талантована особа, охабел замерковани шлїд у нашей култури як ґлумец-аматер и хорски шпивач. Його приємни бас ше злївал зоз гласами керестурского [Хор|хору] хторому вон бул член ище у часох окупациї и перших рокох по ошлєбодзеню. Року 1957. бул член хлопскей шпивацкей ґрупи алє ше у наступним периодзе мушел баржей пошвецовац дружтвено-политичней роботи.

При концу свойого роботного вику и у рокох кед бул пензионер Владимир Шанта з увагу провадзел подїї у националним живоце Руснацох и з часу на час ше зявйовал зоз своїма написами у новинох Руске слово. Тоти його написи, як и написи зоз скорейшого периоду, углавном ше одношели на етнїчни идентитет югославянских Руснацох. За розлику од авторох хтори идентитет войводянских Руснацох глєдали у Карпаторусинох, Українцох або Русох, Владимир Шанта бул прихильнїк тези о етнїчней автохтоносци Руснацох. По шицким до чого у вецейдеценийскей витирвалей роботи дошол, заключел же до формованя самостойней етнїчней ґрупи Руснацох у Кральовини Югославиї пришло коло 1922. року, кед Руснаци почали друковац перши часописи и кнїжки на мацеринским язику.

Вон нє бул фаховец за историю, нє познал комплетни процедури наукових виглєдованьох у тей обласци, та його написи були продукт його особних роздумованьох и прешвеченьох, базовани преважно лєм на заключеньох словацких историчарох. Праве прето мож повесц же Шантова теза о походзеню войводянских Руснацох нє ма обсяжне и утемелєне становиско, односно, маюци у оглюдзе лєм їх бешеду, нє мож констатовац же вони походза зоз шорох восточних Словакох.

Владимир Шанта позберал свойо написи и роздумованя, зредаґовал их, преробел и и пририхтал до друку як двоязичну кнїжку (по руски и по сербски) з насловом Ениґма Русини-Руснаци-Рутени. Придал кнїжку до друкованя алє ю нє дочекал видзиц. Кнїжка вишла з друку даскельо днї после його шмерци.

Литература

• Тамаш, др Юлиян, „1949. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 311.

• Владимир Шанта, Ениґма Русини-Руснаци-Рутени, Фељтон, д.о.о, Нови Сад, 2002, боки 94 + 98.

Вонкашнї вязи

• Владимир Шанта Ениґма Русини - Руснаци - Рутени, issuu.com/rusnak