Владислав Югас


Владислав Югас
Народзени	13. юлия 1938.
Умар	1. януара 1993. (54)
Державянство	югославянске
Язик творох	руски, сербски
Школа	Штредня польопривредна школа, Зомбор
Универзитет	Польопривредни факултет, Нови Сад
Период твореня	1957–1993.
Жанри	дружтвено-политични анґажман, менаджмент
Поховани	у Новим Садзе
Припознаня	Орден заслугох за народ зоз стриберну гвизду

Владислав Югас (*13. юлий 1938–†1. януар 1993), дружтвени роботнїк, главни и одвичательни редактор рускей редакциї Радио Нового Саду и директор Радио Нового Саду у єдним мандату.

Биоґрафия

Владислав Югас народзени 13. юлия. 1938. року у Руским Керестуре Керестуре. Оцец Лука Югас и мац Мелана родз. Паплацко. Владислав мал младшого брата Янка. Основну школу Владислав Югас закончел у Руским Керестуре. По законченю Штреднєй польопривредней школи у Зомборе 1956. року єден час робел у Землєдїлскей задруґи у Коцуре як польопривредни технїчар, а 1959. року ше уписал на Польопривредни факултет у Новим Садзе дзе дипломовал 1963. року. После дипломованя ше знова врацел до коцурскей задруґи дзе полни седем роки робел як руководитель кооперациї.

Владислав Югас бул у малженстве зоз Марию родз. Скубан зоз Коцура. Мали дзивче Александру.

Уж под час роботи у коцурскей задруґи Владислав Югас ше активовал и на дружтвено-политичним планє та 1971. року бул вибрани за предсидатєля ОК ССРН у Вербаше. Медзитим, вон уж од 1969. року бул член Покраїнскей конференциї ССРН Войводини и член єй Предсидательства и Вивершного одбору и член делеґациї ССРНВ у Союзней конференциї ССРН Югославиї.

Главни и одвичательни редактор Редакциї програми на руским язику Радио Нового Саду Владислав Югас постал 1973. року. Бул и член Дїловодного одбору РТВНС, а у єдним мандату и директор Радио Нового Саду.

Анґажованє у културним живоце Руснацох

Од перших дньох роботи у Рускей редакциї Радио Нового Саду Владислав Югас ше активно уключел и до културного живота Руснацох. Вибрани бул за члена Совиту Руского слова, а од 1978. року вон бул делеґовани як представитель Радио Нового Саду до Аматерского руского театру Дядя, до Скупштинскей ради сцени у Новим Садзе и ту бул вибрани за єй предсидателя. Року 1982. мандат му обновени и теди бул вибрани и за члена Предсидательства Театра, познєйше и за предсидателя Предсидательства. У маю 1991. року Владислав Югас бул вибрани за предсидателя Руского народного театру Дядя и за його уметнїцкого руководителя.

Владислав Югас бул позитивно ориєнтована особа, дружелюбиви, мал широки круги приятельох и познатих, и совисно окончовал свойо роботни и дружтвени обовязки. Вон удатно водзел Театер як предсидатель його руководзацих целох, театер зоз своїма витворенями теди наступал на зонских, на Покраїнскей смотри, на Републичним и Союзним фестивалу театрох, а театер под його руководством преширел свою медзнародну афирмацию и у иножемстве з наступами у Словацкей и на Закрпатю (Ужгород, Хуст, Берегово, Виноградов и Сторожница). Медзи иншим, Владислав Югас теди бул вибрани и до жирию Медзинародного фестивала професийних театрох у Ужгородзе.

Штредком 1980-их Владислав Югас бул уключени до орґанизациї Фестивала култури Червена ружа.

Стоя Владислав Югас Шереш и Любомир Сопка а кучи ґолман Янко Варґа Шокец

За свой професийни и дружтвени анґажман одликовани є зоз Орденом заслугох за народ зоз стриберну гвизду.

Владислав Югас, познати медзи фодбалерами и приятелями як Шереш, бул бавяч ФК Русин у Руским Керестуре од 1956. по 1958. рок. Кед прешол, после закончених студийох, жиц и робиц до Коцура Владислав Югас бавел фодбал за ФК Искра од 1965. по 1971. рок кед закончел спортску кариєру.

Владислав Югас страдал у транспортним нєщесцу 1. януара 1993. року. Поховани є на Новим теметове у Новим Садзе.

Ґалерия

Литература

Дюра Латяк, 25 роки АРТ РНТ Дядя, Покраїнски секретарият за витворйованє правох националних меншинох, Нови Сад 1995, б. 232.

Вонкашнї вязи

Владислав Югас, биоґрафия на НАР, 13. марец 2018.

Ґрупа авторох: Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 31, 36 и 139.