Гавриїл Букатко
| Монсиньор Гавриїл Букатко | |
|---|---|
Беоґрадски надбискуп
Крижевски владика Зренянински апостолски администратор | |
| Народзени | 27. януара 1913. у Долнїх Андриєвцох |
| Умар | 19. октобра 1981. у Вербаше (68) |
| Пошвецени за паноца | 1939. року |
| Поховани | у Руским Керестуре |
Кир др Гавриїл Букатко (*27. януар 1913—†19. октобер 1981), беоґрадски надбискуп и крижевски владика, концилски оцец на Другим ватиканским концилу и член Конґреґациї за апостолат лаикох.
Биоґрафия
ушорицГавриїл Букатко ше народзел у Долнїх Андриєвцох при Славонским Броду 27. януара 1913. року. Бул наймладши од штверих дзецох. Пейц класи основней школи закончел од 1919. по 1924. рок у своїм родним месце, а шейсц класи реалней ґимназиї у Славонским Броду (седму и осму класу з вельку матуру закончел у Високим).
Филозофию и богословию студирал у Риме на Урбаниянским универзитету як питомец Українскей папскей колеґиї св. Йосафата. Бакалауреат зоз филозофиї положел 1935. року на Филозофским факултету Папового всеучилїща De propaganda fide у Риме дзе маґистровал и теолоґию. Вон предлужел студиї на тим универзитету у Риме и 7, юлия 1940. року докторовал з тезу „De redemptione secundum doctrinam metropolitae Antonii Khrapovickij".
Єден час, як богослов, бул досц активни у Союзу руских школярох, та трицетих рокох прешлого вику у Руских календарох и Руских новинох обявйовал свойо писнї. Источасно бул и спикер Українскей радио програми на Радио-Ватикану. Под час студийох добре звладал италиянски, анґлийски и українски язик.
За священїка бул пошвецени у Риме 2. априла 1939. року. Пошвецел го владика др Дионизий Няради. Службовал перше як други капелан у Руским Керестуре 1940. року. Од 14. мая 1941. року постал канцелар Владичества, а од 23. фебруара 1942. року секретар тедишнього администратора Крижевского владичества Янка Шимрака а од 16. авґуста 1942. секретар Владичества. З актом од 10. фебруара 1943. року меновани є за управителя владических маєткох, а у шематизме ше спомина як лепавински протопрезвитер, декан, а у Лепавици єден час бул управитель парохиї. У юнию 1943. року є меновани за пришеднїка Духовного Стола, а 1944. за каноника кустоса крижевскей катедралней парохиї. После шмерци крижевского владики Янка Шимрака 9. авґуста 1946.року, Гавриїл Букатко бул вибрани за капитуларного економа Владичества. За апостолского администратора Крижевского владичества є меновани 1. юния 1950. року, а 23. фебруара 1952. року є меновани за титуларного владику Севериянского. Владическе пошвецанє було 27. априла 1952. року у Заґребе. Пошвецел го беоґрадски надвладика Йосиф Уйчич зоз владиком Стефаном Ваєрлайном зоз Дякова и Йосифом Лахом, помоцним владиком заґребским.
Окремни усиловносци Гавриїл Букатко укладал же би ше обновело церкви и церковни будинки у владичестве од воєних руйнованьох. Папа Иван XXIII го поставел за члена предконцилскей комисиї за лаички апостолат, а 1960. року за резиденциялного владику Крижевского владичества.[1]
Дня 27. юния 1960. року Апостолски Пристол го меновал за Крижевского владику, а од 2. марца 1961. року меновани є и за титулатного надвладику Моцисенского з правом нашлїдства Беоґрадского римокатолїцкого надвладики. Алє, и далєй остал апостолски администратор Крижевского владичества аж до самей шмерци.
Од 1950. по 1960. рок Гавриїл Букатко бул секретар Владических конференцийох Югославиї, а по шмерци надвладики Йосифа Уйчича 24. марца 1964. року превжал водзенє Беоґрадского римокатолїцкого надвладичества и Банатскей апостолскей администратури, при чим и далєй водзел Крижевске владичество, алє ше преселєл до Беоґраду.[2]
Владика Букатко робел, у складзе зоз штросмаєровскима идеями и концилскима напрямками, на екуменизме и нормализованю одношеньох Церкви и Держави, окреме кед бул секретар Бискупскей конференциї Югославиї, цо приведло до подписованя Протокола (25.06.1966.) и установеня дипломатичних одношеньох медзи СФРЮ и Ватиканом.
На Другим ватиканским соборе надвладика Букатко бул подпредсидатель Комисиї за Восточни церкви. Праве под час Собору, по його билей бради, упознал го цали швет под меном Барба бянка, алє и як найлєпшого шпивача медзи трома тисячами владикох зоз цалого швета. А бул и член Конґреґациї за Восточни церкви.
Владика Гавриїл Букатко преложел евангелию на руски язик.
После 16 рокох окончованя длужносци беоґрадского надбискупа Гавриїл Букатко ше 1980. року, пре слабе здравє, пензионовал. Дня 24. марца 1980. року ше з Беоґраду приселєл до Керестура, одрекол ше водзеня Беоґрадского надвладичества, а од Банатскей администратури бул розришени ище скорей. Алє, администратор Крижевского владичества остал и далєй.
Умар у вербаским шпиталю 19. октобра 1981. року. Поховани є 22. октобра 1981. року у крипти пред иконостасом керестурскей церкви, а познєйше його труна зоз посмертнима остатками пренєшена до крипти под катедралну церкву св. Николая у Рускиом Керестуре.
Литература
ушориц- Beogradski koadjutor. Blagovest, 30 (1961) 6, str. 102.
- Ordinarij Križevačke eparhije msgr. dr Gabrijel Bukatko naslovni nadbiskup mocisenski, koadjutor Beogradske nadbiskupije, apostolski administrator Križevačke eparhije. Jubilarni šematizam Križevačke eparhije. Zagreb 1962, 15–20.
- Punih 16 godina – ostavka nadbiskupa dr Gabrijela Bukatka. Blagovest, 49(1980) 5, str. 87.
- (Nekrolozi): Blagovest, 50(1981) 12, str. 207–210; Glas Koncila, 20(1981) 21, str. 1;
- Žumberački krijes, 1981, str. 137–138. — J. Salmić: Zbogom »Barba Bianca«. Glas Koncila, 2
- о. проф. др Роман Миз: Священїки дакедишнього Осєцкого викарията, Видавателє Парохия св. ап. Петра и Павла, Нови Сад и Максима, друкарня и видавательна хижа, Петроварадин, 2016, б.81-86.
Вонкашнї вязи
ушориц- Enciklopedija LZMK / Hrvatski biografski leksikon:Bukatko, Gabrijel
- Archbishop Gabriel Bukatko (анґл.)
- Nacionalni katehetski ured HBK prof. dr. Nediljko Ante Ančić: »Drugi vatikanski sabor. Kratak prikaz«