Гавриїл Рац

Гавриїл Рац
Народзени	6. авґуста 1940.
Умар	29. марец 2002. (62)
Державянство	югославянске
Язик творох	руски
Школа	Учительска школа у Сримских Карловцох
Период твореня	1962—2002.
Жанри	образованє, документарна и уметнїцка фотоґрафия
Поховани	На теметове у Руским Керестуре

Гавриїл Рац (*6. авґуст 1940—†29. марец 2002), учитель, длугорочни фоторепортер у НВУ Руске слово, уметнїк фотоґрафиї.

Биоґрафия

Гавриїл (Ґабор) Рац Рацмишков народзени 6. авґуста 1940. року у Руским Керестуре. Родичи оцец Ґабор и мац Ана, родзена Рац (Дзвонарова). Гавриїл мал младшого брата Янка (1942-2021). Гавриїл Рац закончел основну школу у родним валалє а Учительску школу у Сримских Карловцох. Потим уписал студиї русийского язика на Висшей педаґоґийней школи у Зренянину дзе и абсолвовал. Кед абсолвовал на Висшей педаґоґийней школи та робел кратши час и як наставнїк русийскго язика.

Гавриїл Рац бул оженєти зоз Марию родз. Сопка и у малженстве мали дзивче Ясмину.

Роботна кариєра

По законченю учительскей школи Гавриїл Рац робел як учитель класней настави у Основней школи Петро Кузмяк у Руским Керестуре по 1970. рок.

Пар роки Гавриїл Рац препровадзел на дочасовей роботи у Нємецкей дзе робел у компанийох Круп и Форд.

По врацаню зоз Нємецкей Гавриїл Рац почал робиц и НВУ Руске слово як фоторепортер.

Бул длугорочни професионални фоторепортер у НВУ Руске слово у Новим Садзе. Знїмал шицки файти чарно-билих и колор фотоґрафийох за потреби новинох Руске слово, часопису за дзеци Пионирска заградка, часопису МАК, за Народни календар, традицийни мурови рочни календар та други потреби.

Занїмала го документарна и новинска фотоґрафия а дзекуюци вельорочному искуству у обласци чарно-билей и колор фотоґрафиї вон винаходзел мотиви и за творенє уметнїцких фотоґрафийох.

Участвовал на вецей колективних виставох.

Допринос рускей култури

Гавриїл Рац бул член Дружтва за руски язик, литературу и културу од 1974. року. Бул член Клуба подобових уметнїкох Дружтва за руски язик, литературу и културу з Нового Саду, од снованя того Клуба 1996. року. Заступени є у моноґрафиї Подобова творчосци Руснацох у виданю Дружтва за руски язик, литературу и културу, на боку 103 зоз фото-ґрафику Лядова сказка.

Як член Новосадскей сцени АРТ Дядя Гавриїл Рац ґлумел як ґлумец-аматер у театралним фалату Ґордана Михича Жовта (1975. року).

Гавриїл Рац нєсподзивано умар 29. марца 2002. року. Поховани є на теметове у Руским Керестуре.

Литература

• Гавриїл Рац, уметнїк фотоґрафиї, Подобова творчосц Руснацох, Дружтво за руски язик, литературу и културу, 2003, б. 103.

Вонкашнї вязи

• Дюра Латяк, Руске под час политичних пременкох (у тексту спомнути и Г. Рац, фоторепортер)

• Ґрупа младих з Керестура, ґенерация 1940-1942 (фотоґрафоване 1957. року), Гавриїл Рац медзи нїма.

• Дюра Латяк, 75 роки Руского слова 1945-2020 (VIII), б. 26.