Гелена Гафич Стойков
Гелена Гафич Стойков (*1. октобер 1938.† 22. октобер 2024), поетеса и писателька за дзеци, малярка-аматерка
| Гелена Гафич Стойков | |
|---|---|
 | |
| Народзена | 1. октобра 1938. |
| Умарла | 22. октобра 2024 (87) |
| Державянство | югославянске, сербске |
| Язик творох | руски, сербски |
| Школа | ґимназия, Вербас |
| Универзитет | Висша административна школа, Беоґрад |
| Период твореня | 1953—2008. |
| Жанри | поезия, проза, подобова уметносц |
| Похована | на Новосадским теметове |
Биоґрафия
ушорицГелена Гафич народзена у Руским Керестуре 1. октобра 1938. року. Оцец Яким и мац Феброна нар. Канюх (Данкова) . Гелена мала ище два шестри, Марию и Феброну и брата Якима. Основне образованє Гелена Гафич здобула у Руским Керестуре. Ґимназию закончела у Вербаше, висшу административну школу у Беоґрадзе и як банкарски службенïк робела у Кули и Новим Садзе дзе ше познєйше преселєла жиц.
Гелена Гафич ше одала за Йована Стойкова з Кули, єден час жили у Нємецкей у Офенбаху.
Гелена Гафич длугши час жила у Кули, дзе була снователь и перши предсидатель Руского културно-уметнïцкого дружтва Др Гавриïл Костельник. Познєйше ше преселєла до Нового Саду дзе єй жили обидва шестри.
Литературна и подобова творчосц
ушорицГелена Гафич писала писнï од вчасного дзецинства, першу писню обявела 1953. року, сотрудзовала у дзецинским часопису по руски Пионирска заградка, потим у часопису Шветлосц, у Руским слове, руских календарох, у часопису Мост Заводу за културу Войводини. Писала и прозу, алє єй преокупация заш лєм була поезия, и то у першим шоре здогадованє на родиме место Руски Керестур. Перша кнïжка поезиï: Колïска и ноц (по руски и сербски, 2001) облапя єй трицецрочну поетску творчосц.
Авторка є тиж и двох сликовнїцох Сни малей Иринки спод єдней перинки и Снови мале Иренице испод једне дуњице (2008). Кнїжку Мацери Рускинї видало Дружтво за руски язик, литературу и културу у сотруднїцтве зоз НВУ Руске слово, Нови Сад (2004).
Гелена Гафич Стойков ше виказала и як маляр аматер. У хвилькох хтори даровала своєй активносци у рамикох подобовей уметносци вона намальовала велї акварели и малюнки у олєйовей технїки. 1
Активни член Дружтва за руски язик, литературу и културу була oд 1996. року.
Гелена Гафич Стойков умарла 22. октобра 2024. року у своїм 87. року живота у Новим Садзе. Похована є на Новосадским теметове.
Литература
ушориц- Јулијан Тамаш, „Хелена Хафич Стојковˮ, Русинска књижевност, историја и статус, Матица српска, 1984. б. 308.
- Ґрупа авторох, „Гелена Гафич Стойков, маляр аматерˮ, Подобова творчосц Руснацох, Дружтво за руски язик, литературу и културу, Нови Сад, 2003, б. 31.
- Мелания Арваї, „Поуки о щесцу, Рецензия сликовнїци Гелени Гафич Стойковˮ, Studia Ruthenica, Дружтво за руски язик, литературу и културу, ч. 13, 2008, б. 253-254.
Вонкашнї вязи
ушорицРеференци
ушорицҐрупа авторох, „Гелена Гафич Стойков, маляр аматерˮ, Подобова творчосц Руснацох, Дружтво за руски язик, литературу и културу, Нови Сад, 2003, б. 31.