Закарпатска обласц

Закарпатска обласц (укр. Закарпатська область), позната и як Закарпат'є (укр. Закарпаття; мадярски: Kárpátalja) то обласц на заходу України хтора ше поклапя зоз историйним реґионом Карпатскей Рутениї. Єй административни город Ужгород.

Закарпатска обласц основана 22. януара 1946. року, кед Чехословацка одустала од своїх поглєдованьох териториї Подкарпатскей Руси, по догварки медзи Чехословацку и Совєтским Союзом. Територию Подкарпатскей Руси потим превжал СССР и постала часц Українскей Сoвєтскей Социялистичней Републики.

На референдуму о нєзависносци України хтори отримани 1991. року, виберачом у Закарпатскей обласци понукнута окремна опция чи жадаю автономию за реґион. Гоч векшина виберачох потримала автономию вона до конца нє одобрена. Медзитим, тот референдум ше одношел на статус самоуправи, а нє на автономию (як на Криму).

Закарпатска обласц ше находзи на Карпатох на заходу України и то єдина українска обласц хтора ше гранїчи зоз штирома жемами: Польску, Словацку, Мадярску и Румунию. З оглядом же Карпати и туристична дестинация, окреме за скиянє, тота обласц ма вельку улогу у економскей обласци.

Єй поверхносц скоро 13 000 квадратни километри, обласц ранґирана як 23. по поверхносци и 15. по числу жительох по попису зоз 2001. року, кед у Закарпатю було 1 254 614 жительох. Преценєне 2022. року же у тим реґиону єст 1 244 476 жительох. Тото вкупне число уключує людзох вецей розличних националносцих од хторих Мадяре, Румуни и Русини творя значни меншини у даєдних городох тей обласци, док у других вони творя векшину жительства (як цо случай у Берегове).

Мено

Обласц тиж наволована и Транскарпатскa обласц, Транскарпатия, Закарпат’є, або историйно Подкарпатска Рус. На других язикох тота обласц ше наволує:

Мадярски язик: Kárpátalja
Словацки и чешки язик: Zakarpatská oblast; Podkarpatská Rus
Польски язик: Obwód zakarpacki
Румунски язик: Regiunea Transcarpatia
Русийски язик: Закарпатская область
Українски и руски язик: Закарпатська область

Назва Транскарпатия то преклад українскей верзиї мена, мадярска назва ше преклада як Подкарпатия, прето же саме слово на мадярским язику ма значенє подножє гори.

Анґлийски язик : Subcarpathia, Subcarpathian Rus', Subcarpathian Ruthenia, Sub-Carpathian Ukraine
Французки язик: Ukraine Subcarpathique
Нємецки язик: Karpatenrussland, Karpatenland, Karpathenland, Karpatho-Russland, Karpatenukraine, Karpato-Ukraine

Герб Закарпатскей обласци бул першобутно креировани концом 1920. - тих рокох у тедишнєй Чехословацкей.

Застава Закарпатскей обласци
Герб Закарпатскей обласци

Ґеоґрафия

Українска часц Карпатох хтори роздзелюю Закарпатску обласц (на югозаходней страни) од Прикарпат’я (на сиверовосточней страни)

Историйни округи Закарпат'я

Закарпатска обласц ма вкупну поверхносц 12800 km² и находзи ше на югозаходу, на прикрей страни и у подножю Карпатских горох, хтори прекриваю коло 80% поверхносци того реґиону. Остаток реґиону прекрива Транскарпатска нїжина хтора часц Панонскей нїжини.

Закарпатска обласц єдина обласц у України хтора ше гранїчи зоз штирома жемами: Польску, Словацку, Мадярску и Румунию. На заходзе ше гранїчи зоз реґионами Прешов и Кошице у Словацкей и жупаниями Borsod-Abaúj-Zemplén и Szabolcs-Szatmár-Bereg у Мадярскей, на югу зоз жупаниями Satu Mare и Maramureș у Румуниї, на востоку и сиверовостоку зоз Ивано-Франковску обласцу, на сиверу зоз Львовску обласцу и Подкарпатским войводством у Польскей.

Релєф Закарпатскей обласци творя гори и менши бреги хтори прекрити зоз лїсцопаднима и ядлїновима лєсами, як и зоз алпскима пажицами. Гори прекриваю 80% поверхносци и видлужую ше од сиверозаходу по юговосток. Буково лєси на Карпатох, хтори ше з часци находза и у Закарпатскей обласци, признати як UNESCO-во место шветового нашлїдства 2007. року.

Найвекши рики хтори чечу през тоту обласц то Тиса, Боржава и Теребля. Високогорске озеро Несамовите находзи ше у Рахивским району. Озеро ше находзи у Говерла резервату на прикрих часцох гори Туркул. Поверхносц озера 3 000 квадратни метери и находзи ше на 1750 метери надморскей висини.

Клима у тим реґиону умерена и континентална зоз коло 700–1000 mm паданями рочнє. Просекова температура влєце +21°C, a вжиме −4°C. Зоз надморску висину 2061 метер, Говерла, часц горского ланцу Чорнагора, найвисша точка у тей обласци. Найнїзша точка, 101 метер надморскей висини, находзи ше у валалу Руски Геєвци (мадяски Oroszgejőc) у Ужгороским рaйону.

История

У прешлосци тот реґион бул познати як Транскарпатска обласц або Транскарпатия, або историйно як Карпатска Русия або Русиния. Славянє ше на тото подручє приселєли у 4. вику. У 7-8. вику, славянске племе Били Горвати жило на тей териториї. У 9-10. вику, реґион бул часц Болгарского царства, а у тот час ше спомина и локални владар княз Лаборец, хтори бул болгарски вазал. У 10-11. вику реґион бул часц Києвскей Руси. После того, реґион припаднул под власцу Кральовини Угарскей, а у 13. вику з вельку часцу того реґиона владал рутенски дворян княз Ростислав Михайлович. Кед спадла централна власц у Угарскей, концом 13. и початком 14. вику, у тим реґиону владали нєзависни локални владаре Амаде Аба и Миклош Пок. Єдна часц реґиону, у тот час, припадала славянскей Галицко – волинскей держави.

Демоґрафия

Етнїчна мапа Закарпатскей обласци зоз 2001. року. Зоз целову фарбу представени Українци уключуюци и Русинох, зоз желєну Мадяре, зоз белаву мишани Українци уключуюци и Русинох, зоз жовту Румунє, док Роми на тей етнїчней мапи нє зазначени.

Українци и українски попис жительства зоз 2001. року нє припознаваю Русинох як окремну националну меншину. Русини катеґоризовани як подґрупа Українцох. Русини и русински язик учишлєни ґу Українцом, а векшински язик українски (80,5%), други национални меншини то Мадяре (12,1%), Румунє (2,6%), Руси (2,5%), Роми (1,1%), Словаци (0,5%) и Нємци (0,3%). По тим попису, коло 10100 жительох Закарпатскей обласци (0,8%) идентификую ше як Русини.


Националносц	Число	2001 (%)	1989 (%)	рост (%)
Українци (уключуюци и Русинох)	1 010 100	80,5	78,4	+3,4%
Мадяре	151 500	12,1	12,5	-2,7%
Румунє	32 100	2,6	2,4	+9%
Руси	31 000	2,5	4,0	-37,3%
Роми	14 000	1,1	1,0	+15,4%
Словаци	5 600	0,5	0,6	-22,3%
Нємци	3 500	0,3	0,3	+3%