Ириней Бучко
Ириней Бучко (*24. октобер 1938—†3. май 2012), познати керестурски майстор, радио шпивач и добродїй.
| Ириней Бучко | |
|---|---|
 | |
| Народзени | 24. октобра 1938. |
| Умар | 3. мая 2012. (74) |
| Державянство | югославянске, сербске |
| Школа | квалификовани майстор |
| Период твореня | 1958—2004. |
| Обласц твореня | тапацирунґ меблю, шпиванє |
| Поховани | на теметове у Руским Керестуре |
Биоґрафия
ушорицИриней Бучко ше народзел 24. октобра 1938. року у Руским Керестуре. Оцец Дюра и мац Ана родз. Сопка. Ириней мал ище двох младших братох, Дюру и Владу. Основну школу Ириней закончел у родним валалє и такой пошол на виучованє ременярского (сияртовского) и тапацирског ремесла (1953-1956) до Штефана Надя Митьового теди познатого майстра у валалє. Ириней бул єден з наймладших школярох-шеґертох у майстра Надя. Єден рок Ириней Бучко бул калфа у истей роботнї хтору од оца Штефана превжал його син Славомир Надь. Потим Ириней Бучко робел єден рок у Ремеселнїцким подприємстве Радник у Руским Керестуре и вецей роки у Ремеселнїцким подприємстве Дрина у Вербаше. Тапацирске ремесло Ириней Бучко добре усовершел и 1964. року ше опредзелєл отвориц свою роботню за продукцию квалитетного тапацираного меблю.
Указало ше же тапацировани мебель ма своїх купцох та Ириней Бучко з часом постал познати нє лєм у ширшей околини Руского Керестура алє и у Босни и Чарней гори одкаль сциговали наручбини за його мебель. Ириней Бучко бул перши майстор тапетар хтори почал предавац мебель на вашарох и так здобувал купцох. По угляду на ньго и його продукцию у валалє ше познейше зявели нови майстрове и продукция меблю постала, у єдним периодзе, важни привредни конар у Руским Керестуре.
Културни дїяч и добродїй
ушорицИриней Бучко бул и талантовани шпивач. Як член Дома култури у Руским Керестуре вон 15 роки шпивал у вельким мишаним хору и як соло шпивач на концертох Дома култури. Дириґент Ириней Тимко препознал його шпивацки талант и красни баритон та го послал на авдицию до Радио Нового Саду. Ириней Бучко удатно прешол авдицию и потим знял за Радио Нови Сад коло 20 руски народни шпиванки хтори були дзечнє прилапени з боку слухачох. Як соло шпивач и як член хору Ириней Бучко наступал на велїх концертох Дома култури, на смотрох, фестивалох, у музичних ТВ емисийох у жеми и иножемстве.
Ириней Бучко остал запаметани и як дародавец хтори велї роки дзечнє помагал нашо фестивали Червена ружа и Ружова заградка, културни подїї, спортски бависка Яша Баков и спорт у валалє вообще, а помагал и керестурску парохию и цалу нашу церкву.
Ириней Бучко бул оженєти зоз Феброну родз. Винаї и у малженстве мали штири дзивки: Сенку, Оленку, Терезку и Фемку.
Ириней Бучко умар 3. мая 2012. року, у 74. року. Поховани є на теметове у Руским Керестуре.
Литература
ушориц- Мирон Жирош, Ириней Бучко (1938), тапетар и сияртов, Бачванско-сримски Руснаци дома и у швеце 1745-2001, том IV, бок 561-565.
- Мирон Жирош, Дїдо своїм дзецом и унуком, Бачванско-сримски Руснаци дома и у швеце 1745-2001, том II, бок 489.
Вонкашнї вязи
ушориц- Дюра Латяк, Тирваци плоди Червеней ружи (Естрада братства була закончуюца манифестация Фестивала), Червена ружа 1962-2011, том I, Завод за културу войводянских Руснацох, Нови Сад 2011,бок 18.
Архивски знїмки за Радио Нови Сад
ушориц- Нєдалєко од валала - Ириней Бучко
- При поточку- Ириней Бучко
- Ходзел я ґу тебе - Ириней Бучко
- Ей поточе, поточе - Ириней Бучко
- Бимбора, бимбора - Ириней Бучко
- Керестурски штири дзвони - Ириней Бучко
- Ой, пада, пада росичка - Ириней Бучко