Милутин Фирис
| Милутин Фирис | |
|---|---|
| Народзени | 1902. або 1903 |
| Умар | |
| Державянство | австроугорске, югославянске |
| Язик творох | руски, горватски |
| Универзитет | Правни факултет, Заґреб |
| Жанри | право, хорске шпиванє, режия |
| Поховани | |
Милутин Фирис, дипломовани правнїк, визначни руски културни дїяч у Петровцох.
Биоґрафия
ушорицМилутин Фирис ше народзел у Петровцох, вироятно 1902. або 1903. року. Ту му оцец Петро Фирис (1874-1937) од 1898. року по пензионованє 1932. року робел як учитель и културни дїяч. Милутин мал и брата др монс.Томислава (1900-1987), котри жил у ЗАД. Милутин основну школу закончел у Петровцох, а студиї права у Заґребе. Ище як студент помагал свойому оцови у културно-просвитней роботи, бо оцец бул єдини учитель у валалє, а мушел учиц уж блїзко сто школярох.
Остало зазначене же Милутин 1926. року од оца превжал дириґованє зоз двома хорами: мишаним и хлопским, а такой потим почал поставяц на сцену и театрални фалати. На жаль, вон ше у Петровцох нє затримал длуго, бо як правнїк ту нє мал сиґурну перспективу. Прето ту його активносц тирвала лєм штири роки (1926-1930). За тот релативно кратки час, попри тим же дириґовал зоз двома хорами, вон зоз петровскима дилетантами поставел на сцену и дзешец театрални фалати. Нє зазначене же дзе ше з Петровцох одселєл, алє ше зна же ше його оцец после пензионованя одселєл до Стенецу, та мож предпоставиц же з нїм пошол и син Милутин.
Ище Милутинов оцец Петро двацетих рокох 20. вику започал активносц на формованю филияли РНПД-а у Петровцох и єй секцийох. Дириґовал и з мишаним и хлопским хором по 1926. рок. Тоту роботу предлужел и його син Милутин, котри пошвидко бул вибрани и за секретара Месного одбору РНПД. Од 1926. року замерковани и його части написи у Руских новинох и Руским календаре, преважно о роботи и активносцох Просвити у Петровцох. Дзекуюци найбаржей його написом у Руских новинох и Календаре ми можеме детальнєйше спатриц културни живот Руснацох у Петровцох у периодзе од його початкох та по 1931.рок.
Литература
ушориц- Штефан Гудак: ПЕТРОВЦИ, жридло и розсаднїк рускей и українскей култури, просвити и уметносци у Републики Горватскей, Видаватель КУД Яким Гарди Петровци, 2004, особлїво боки 289-291.
- Дюра Латяк: Театрални живот Руснацох, часц І, Театрални музей Войводини и НВУ Руске слово Нови Сад, 2003, боки 169-181 и 344.