Мирослав Цирба

Мирослав Цирба (*19. марец 1946—†12. новембер 2020), ґлумец-аматер, маляр-аматер, новинар, публициста, роботнїк у култури.

Мирослав Цирба
Народзени	19. марца 1946.
Умар	12. новембра 2020. (74)
Державянство	югославянске, сербске
Язик творох	руски, сербски
Школа	ґимназия, Шид
Универзитет	Висиша педаґоґийна школа, Беоґрад
Период твореня	1968—1999.
Жанри	новинарство, подобова уметносц, театер, дїялносц у култури
Поховани	у Шидзе

Владимир Медєши, Любомир Рамач, гл. и одв. редактор, Мирослав Цирба и Олена Папуґа

Биоґрафия

Мирослав Цирба народзени 19. марца 1946. року у Шидзе. Оцец Данил и мац Цецилия родз. Дорокгази. Мирослав мал и брата Евґена.

У родзеним месце Мирослав закончел основну школу и ґимназию и потим постал студент на Висишей педаґоґийней школи, напрям биолоґиї у Беоґрадзе дзе и дипломовал.

Перше роботне место му було у Природняцким музею у Беоґрадзе, а 1969. року Мирослав Цирба прешол на роботу до Рускей редакциї Радио Шиду дзе робел як новинар и редактор.

Року 1977. Мирослав Цирба прешол до НВУ Руске слово дзе бул новинар дописователь зоз Сриму и вон идуци 22 роки информовал зоз сримского подруча. Мирослав Цирба барз добре познал културни живот и прешлосц Руснацох у Шидзе и околних валалох а под час своєй новинарскей роботи вон бул и схопни публициста хтори о Сриме, Шидзе и Руснацох у тих крайох написал велї значни статї.

Мирослав Цирба ше, пре нарушене здравє, пензионовал 1999. року а у редакциї Руского слова остал запаметани як цихи и компетентни колеґа.

Мирослав Цирба ше 1978. року винчал зоз Гелену родз. Чордаш и у малженстве мали сина Мирослава и дзивку Наташу.

Анґажованє у културним живоце

Мирослав Цирба бул активни член музичней и драмскей секциї КПД Дюра Киш у Шидзе. Єден час вон бул и на функциї секретара того дружтва.

Ґлумиц почал ище як ґимназиялєц у Шидзе а першу замерковану улогу Мирослав Цирба витворел у КПД Дюра Киш 1965. року у театралним фалаце Михайла Ковача На швитаню у улоги Данила. Фалат режировал його брат Евґен Цирба а Мирослав бул и автор сценоґрафиї и бул задлужени за шминканє ґлумцох. Потим ушлїдзели числени театрални фалати дзе Мирослав Цирба мал замеркованчи витвореня: Ожлосцена фамелия (1969) у режиї Дюри Папгаргая як Трифун, потим шлїдзели фалати Мац служнїца (1970), та Вила Лала (1974), та Чудо у Шарґану у режиї Дюри Папгаргая як проєкт Новосадскей сцени АРТ Дядя дзе Мирослав Цирба мал улогу Вилотиєвича, а з истим режисером Мирослав Цирба ґлумел и у театралним фалаце Камень за под главу (1979).

Подобова творчосц

Мирослав Цирба мал од младосци прихильносц ґу подобовей уметносц, творел як маляр аматер. Райзовал и мальовал природу и портрети. Викладал свойо роботи на колективних виставох у Шидзе при КПД Дюра Киш, у Новим Садзе, Руским Керестуре, Коцуре и Вербаше. Вирабял сценоґрафиї за манифестациї Червена ружа, як и за 14 театрални представи хтори давани у рамикох КПД Дюра Киш у Шидзе.

Мирослав Цирба умар 12. новембра 2020. року у Шидзе. Поховани є на гракокатолїцким теметове у Шидзе.

Литература

• Мирослав Цирба (1946-2020), новини Руске слово, 20. новембер 2020, бок. 18

Вонкашнї вязи

• Красни памятки на новинарски днї, Вл. Дїтко, новини Руске слово, 1. фебруар 2019.
• Театер познал як свойо обисце, Вл. Дїтко, новини Руске слово, 9. новембер 2020.
• Премиєра, Дюра Латяк, новини Руске слово, 1. фебруар 2018.
• Умар Мирослав Цирба, Вл. Дїтко, Рутенпрес, 12. новембер 2020.

Ґалерия

• 
  Мирослав Цирба, Янко Бучко, Данил Гарди и Гавриїл Колєсар
• 
  Мирослав Цирба у хвилькох кед, як пензионер, уживал у своїм гобию.