Михайло Канюх
| Мено и презвиско | |
|---|---|
| (портрет) | |
| Народзени | 18. новембер 1930. |
| Умар | 19. децембра 2000 (70) |
| Державянство | югославянске |
| Язик творох | руски |
| Школа | ґимназия, Вербас |
| Универзитет | Висша педаґоґийна школа, Нови Сад
Правни факултет, Нови Сад |
| Период твореня | 1953-1993 |
| Жанри | просвита, култура |
| Поховани | у Ветернику |
Михайло Канюх (*18. новембер 1930.† 19. децембер 2000), наставнїк, дїяч у просвити и култури, ґлумец-аматер
Михайло Канюх ше народзел 18. новембра 1930. року у Руским Керестуре. Оцец Владо и мац Юла, народзена Надь мали шесцеро дзеци, синох Мироня, Якима и Владу, вец двойнята Марию и Михала хтори помарли младки, мац нє могла прежалїц, та и остатньому дзецку кед ше народзело, синови, дала исте мено Михал (Мижо).
Основну школу и нїзши класи ґимназиї Михайло Канюх закончел у родзеним валалє, а висши класи ґимназиї з вельку матуру закончел у Вербаше. Свойо скорейше опредзелєнє же будзе просвитни роботнїк вон коруновал з уписом на Висшу педаґоґийну школу у Новим Садзе.
Перше место службованя Михайлови Канюхови було у Коцуре, а о єден час вон 1954. року прешол до Основней школи Петро Кузмяк у Руским Керестуре. Робел як наставнїк у школи, а потим, на вимогу колектива, поставени є на длужносц директора. У наставнїцким колективе уж пар роки пред тим була криза у медзилюдских одношеньох. Новому директорови ше, зоз сцерпену роботу, удало пребродзиц тот стан и школа почала напредовац. З часом, керестурска школа постала єдна з найлєпших школох у кулскей општини. Директорови Михайлови Канюхови ше удало реновирац будинок школи и обновиц школски инвентар як и наставни средства цо унапредзело образовни процес.
Як директор школи, Михайло Канюх активно участвовал и у дружтвено-политичним живоце Руского Керестура. Так вон активно потримовал инициятиву на обновйованю ґимназиї у Руским Керестуре цо, як идея, настало початком 1960-их рокох.
Михайло Канюх бул у малженстве зоз Гелену дзив. тиж Канюх, мали двох синох, Михайла и Ивана. Михайло Канюх бул и замерковани спортиста, окреме добри резултати посциговал у столним тенису. Ище як школяр ґимназиї у Руским Керестуре и под час школованя у Вербаше Михайло Канюх ше активно занїмал зоз театралну дїялносцу. Свою активносц у театре предлужел и под час службованя як у Коцуре, так и у Руским Керестуре и Новим Садзе.
Од 1974. року Михайло Канюх ше престал занїмац зоз театралну дїялносцу, алє предлужел активно провадзиц културну активносц у Новим Садзе, на новосадскей сцени АРТ Дядя, як и програми новосадского Руского КПД.
По 12 рокох активней роботи у Руским Керестуре, Михайло Канюх ше 1966. року зоз фамелию преселєл до Ветренику при Новим Садзе дзе єден час робел як наставнїк и помоцнїк директора ОШ Михайло Пупин.
Михайло Канюх прешол на роботу до Прекладательней служби Скупштини АП Войводини, дзе ше му указала и можлївосц за позарядове студирнє так же вон, попри роботи, закончел и правни факултет.
Михайло Канюх дочекал пойсц и до заслуженей пензиї. Упокоєл ше 19. децембра 2000. року, поховани є на теметове у Ветернику.
Литература
Дюра Латяк, „Михайло Канюх (1930-2000)ˮ, Руски календар за 2002. рок, НВУ Руске слово, Нови Сад, 2001.
Тамаш, др Юлиян, „Просвитни роботнїки 1944-1991. року ˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.
Вонкашнї вязи