Осиф Торма
| Осиф Торма | |
|---|---|
| Народзени | 16. марца 1912. |
| Умар | 1942. |
| Державянство | югославянске |
| Язик творох | руски, горватски |
| Школа | Учительска школа, Чаковец |
| Период твореня | 1932—1942. |
| Жанри | просвита, теарална уметносц |
| Поховани | |
Осиф Торма (*16. марец 1912.—†1942), учитель, автор єдного театралного фалата, ґлумец-аматер, режисер дилетантских представох.
Биоґрафия
ушорицОсиф Торма ше народзел 16. марца 1912. року у Шидзе, як найстарши спомедзи ище штирох братох, а мал и два шестри. Основну и гражданску школу закончел у Шидзе, а учительску у Чаковцу (Горватска). Дипломовал 1932. року. Службовал у Строшинцох, Чантавире, Коцуре, Руским Керестурe, Товарнику и Бикич Долу. У септембре 1942. року є мобилизовани до горватского войска и уж истого року погинул у Бановей Яруґи. Як мож заключиц з наведзеного, Торма бул особа нємирного духа и през дзешец роки служби пременєл шейсц места службованя.
Гоч у служби медзи Руснацами препровадзел лєм три нєполни роки, Осиф Торма на театралним планє при нїх охабел тирваци шлїд, окреме у Шидзе, Коцуре и Руским Керестуре. Як активни член Руского народного просвитного дружтва бул дописователь Руских новинох и сотруднїк у Руским календаре и у нїм 1936. року обявел свой театрални фалат Хто ма право, котри истого року, под час службованя у Коцуре, прапремиєрно поставел на сцену. У 1938. року тот фалат виведзени у Петровцох, у режиї учителя Якима Олеяра, у Шидзе у режиї Андрия Загорянского и у Бачинцох у режиї учителя Кирила Бесерминя.
Остало зазначене же под час службованя при Руснацох Осиф Торма за нєполни три роки на сцену поставел 12 театрални фалати.
Литература
ушориц- Дюра Латяк: Театрални живот Руснацох, часц І, Театрални музей Войводини и НВУ Руске слово Нови Сад, 2003, бок 304.
- Руснаци у Шидзе и околних местох, три значни ювилеї, редактор Леона Гайдук-Лабош; видавателє: Културно-просвитне дружтво Дюра Киш, Шид и Грекотатолїцка парохия Преображеня Господнього, Шид, 2007, бок 104.
Вонкашнї вязи
ушориц- Вл. Дїтко, Думки на Горнїци, фундаменти у Бикичу, новини Руске слово, 14. януар 2017.
- С. Сабадош, Медзивойнови препород (IV), новини Руске слово, 25. септембер 2023.
- Тамаш, др Юлиян, "Учителє у школи у Руским Керестуре 1753-1941", Руски Керестур, лїтопис и история (1745-1991), Месна заєднїца Руски Керестур, 1992, бок 413.