Полка

Полка весели и живши танєц централноевропкого региона хтори популарни широм Европи и Америки. Полка настала на початку 19. вику а походзенє єй зоз Ческей. Полка ше розширела по велїх державох а даєдни вариянти полки мож стретнуц аж и у Велькей Британиї и Мексику.

Танєчнїки Полки

Полка, музични приказ

Характеристики полки

Полка то танєц веселого и темпераментного характера, швидшого темпа, написана у дводїлней мери, найчастейше у 2/4 такту. Ма наглашени ритмични фиґури. Як народни танєц мала форму кола, а под назву полка стретаме ю од першей половки 19 вику, точнєйше после 1835. року. Теди є швидко прилапйована по европопских городох Польскей, Нємецкей, Италиї и других державох и постала барз популарна.

Прилапена є як танєц хтори ше танцовало у парох на розвагох, на балских вешельох, на дворох у салонох и векших салох аристокрацийного дружтва. Патрело ше на полку як на скандалозни танєц за гевтот час, пре способ блїзкого триманя танцошох-партнерох у танцу. Полка була наисце тип анимираного танца. Тото цо було значне за єй популарносц у Европи и индзей, то моцни упечатлїви ритем, у 2/4 такту, брилянтни темпо, рижни фиґури танца, шарм танцошких рухох и радосц хтору подкрипела музика. Шицки тоти елементи спричинєли же би ше полка доживйовала и була прилапена на єден нєпоштредни, природни способ.

Полка-мазурка то вариянта полки у метричней мири мазурки (3/4), злучени ритем мазурки и танєчних фуґурох полки.

Традицийна полка ше найчастейше виводзи зоз провадзеньом, виолини (гушля), гармоники, туби, буґну, лєбо концертна зоз класичнима инструментами. У музичних составох хтори виводзели полку, виолина була основни инструмент. У камерней концертней вариянти оркестра, инструменти хтори грали полку найчастейше були клавир и смиково инструменти.

До уметнїцкей музики полку уведол Бедржих Сметана-чески композитор. После нього полку ше находзи у дїлох Антонина Дворжака, З. Фибицха, Иґора Стравинского, тиж и у дїлох Йогана Штрауса младшого и старшого и велїх других.

Змаганє танєчнїкох танца полка

Мено и назва полки походзи зоз Ческей од слова пулка цо значи и одноши ше на мали половки крочая у танцу. Тиж на ческим язику полка ма значенє и за жену зоз Польскей-Полькиню, та часто єст забунки же походзенє танца полка зоз держави Польска.Полка дожила свою популарносц и славу у велїх державох Европи и америцкого континента. Зоз Праги розширела ше у Паризу и тиж постала прилапена. Нательо постала попуалрна же достала прикмету Полкаманиї. До опери Буфо-комичней опери, полка ше часто зявела у даєдней дїї.

У Зєдинених Америцких Державох попри традицийного фолклору елементи полки ше помишали зоз ритмом музики Карибох и Южней Америки и поступно творели нови жанри.

У Европи традиция ше и далєй предлужела, поготов у жемох походзеня полки (Нємецка, Австрия, Ческа, Польска), алє постоя традициї хтори маю процивни становиска як цо то сивена Италия (Емилия и Романя) и Словения.

Концом Другей шветовей войни, полка пошвидко подлєгла пред новима габами нових ритмох хтори доходзели зоз Зєдинєних Америцких Державох.

Ґалерия

• 
  Илустрация полки зоз 1840. року
• 
  Тацованє полки, Стокголм 1844. рок
• 
  Илистрация полки зоз 1848. року
• 
  Полка, партитура Йогана Штрауса зоз оперети Принц Метузалем 1877.
• 
  Танєчнїки на националним фестивалу полки у Енесу

Вонкашнї вязи

• Швидки танєц Полка Маґазин LIDOVKY.cz, 03. авґуст 2014. рок
• Словенска полка, медзи традицию и модернизмом Часопис Француска етнолоґия, число 2/12, бок 261—270.
• Полка, Oркестер КУД Тарас Шевченко, Дюрдьов, видео знїмок зоз YouTube.
• Баришивска полка, Танєчнїки КУД "Дюра Киш" зоз Шиду, видео знїмок зоз Ютюба