Риєка

Риєка (горв. Rijeka, итал. и мадь. Fiume, чакавски Rekà/Rikà) найвекше пристанїще и треци по велькосци варош у Горватскей (после Заґреба и Сплита). Риєка управне стредзиско Приморско-ґоранскей жупаниї, находзи ше на Кварнерским залїву Ядранского моря, повязана зоз островом Крк, на котрим ше находзи аеродром Риєка. 2021. року варош мал 108,622 жительох. Историйно Риєка вше мала стратеґийну позицию и була важне пристанїще. Варош през историю бул предмет оштрих зраженьох и прето часто менял и демоґрафию и владарох. По податкох пописа жительства зоз 2011. року, векшина жительох Горвати, зоз малим числом Сербох, Бошнякох и членох автохтоней италиянскей меншини. У городу жиє и малочислена руска заєднїца.

История

Швидки економски розвой Риєки почал 1873. року, кед город, котри бул у угорскей часци Австро-Угорскей, бул повязани зоз гайзибанску мрежу. Як єдине угорске пристанїще Риєка була под директну контролу Будимпешти и була конкурент сушедному Трсту, котри ше находзел у австрийскей часци держави.

После розпадованя Австро-Угорскей Риєка постала предмет конфликтох медзи Италию и Кральовину Сербох, Горватох и Словенцох (потим Кральовину Югославию). Векшина жительства самого города були Италиянє, а у окруженю жили скоро виключно Горвати. 1919. Риєку завжали самоорґанизовани италиянски воєни єдинки под команду Ґабриєла Д'Анунция. Децембра 1920. року Италия и Югославия подписали Рапалски мир, по котрим Риєка урядово постала нєзависна держава. Шлебодна Держава Риєка нїґда нє була цалком нєзависна од Италиї и уж 1924. року зоз Римским миром Риєка и урядово постала часц Италиї. После Другей Шветовей Войни Риєка постала часц Югославиї. У тим периоду вецей як 95% Италиянох охабели Риєку, а до Риєки ше приселєло вельке число людзох зоз других часцох Югославиї.

Вонкашнї вязи

Интернет портал городу Риєки, rijeka.hr
Rijeka - Hrvatska enciklopedija, enciklopedija.hr