Руске Дружтво Сиверней Америки

Руске Дружтво Сиверней Америки Rusyn Association of North America
Основане	30. децембра 1995. року
Шедзиско	Киченер, ОН
Перши предсидатель	Юлиян Сабадош
Билтен	Гласнїк РДСА
Основни активносци	пестованє рускей култури, орґанизованє пикникох, балох, сходох, сотруднїцтво з подобнима орґанизациями
Конєц роботи	2013. року

После вецей рокох нєформалней активносци, приватних стретнуцох и сходзеня на рочним руским пикнику векшей ґрупи Руснацох зоз провинциї Онтарио у Канади и зоз блїзших союзних державох зоз ЗАД (Огайо, Пенсилвания, Мичиґен) штредком 90-их рокох ХХ вику дозрели условия же би ше основало орґанизацию односно здруженє хторе спомнути активносци Руснацох виселєнцох консолидує и подзвигнє на висши уровень.

Снованє Руского Дружтва Сиверней Америки

У варошу Киченер 30. децембра 1995. року отримана сновательна схадзка Руского Дружтва Сиверней Америки. У обисцу Юлияна Сабадоша зишли ше 15 вибрани представителє як и други заинтересовани Руснаци з того реґиону и шицки вєдно розпатрели предлог Статута Дружтва, дали предлоги за його злєпшаня и дополнєня та го зоз гласаньом прилапели. Були то хвильки кед Руске Дружтво Сиверней Америки (Rusyn Association Of North America), як безпрофитна и добродзечна орґанизация, почало функционовац.

Зоз статутом РДСА утвердзени основни напрями дїялносци РДСА:

- Пестованє руских традицийох и розвиванє рускей култури;

- Пестованє руского язика и скарбу (музика, литература, уметносц итд.) при младих ґенерацийох;

- Сотруднїцтво зоз другима подобнима орґанизациями у Сиверней Америки и швеце;

- Орґанизованє пикникох, балох, вилєтох и других сходох.

На схадзки бул вибрани Управни и Надпатраюци одбор.

За предсидателя Управного одбору бул вибрани Юлиян Сабадош, за подпредсидательох вибрани Владимир Рускаї и Янко Рац, за секретара Михайло Будински, а за касира вибрана др Нада Бесерминї.

До Надпатраюцого одбору вибрани Владимир Сакач, Мирко Колєсар и Любомир Медєши.

На схадзки предложени вецей хасновити инициятиви а єдна з нїх було порушованє Гласнїка Дружтва односно билтена Дружтва хтори би з часу на час информовал шицких членох о тим цо зробене и цо ше пририхтує у рамикох наиходзацей активносци РДСА.

И орґанизацийно и финансийно було лєпше як скорей. Тераз менша ґрупа вибраних и овласцених орґанизовала пикники, резервовала место, плацела за павильон дзе ше могло буц кед би падал диждж, або находзели салу за бал, резервовали ю, пририхтали шицко цо задумне же будзе у його змисту (трошки декору, награди на томболи итд.). Явяли ше донаторе хтори Дружтву даровали за пикник прашатко або два, або награди на томболи и тото вец предаване учашнїком пикника/балу и так ше творело фонд зоз хторого плацени трошки орґанизациї сходох и других потребох у функционованю РДСА.

Розмах активносци

Активносц Руского Дружтва Сиверней Америки у наступних рокох моцнєла и збогацовала ше. Перша рочна схадзка отримана концом 1997. року и констатоване же у обидвох рокох отримани жимски руски бал и лєтнї и єшеньски руски пикники. Под покровительством РДСА була видата кнїжка Зашпивай, брату. Гласнїк РДСА почал виходзиц концом 1996. року а у 1997. року вишли 3 числа. У Киченеру отримани Крачунска и Вельконоцна служба божа. Порушана идея о купованю жеми за Дружтво дзе би були отримовани пикники и сходи, члени участвовали на Штвартим шветовим конґресу Руснацох у Будимпешти, витворени контакти зоз рускима орґанизациями у Нємецкей и Сиверней Америки и почал виробок Адресара Руснацох у Сиверней Америки.

На рочней схадзки РДСА концом 1998. року констатоване же шицко цо плановане було и витворене. Отримани обидва пикники, служби божи за Руснацох, як новина було же на интернету направени вебсайт РДСА под назву Руснаци у Панониї а змоцнєти и вязи зоз виселєнцами Руснацами у Саскатуну и Едмонтону хтори отримали свой тридньови руски пикник. Порушани акциї на збераню пенєжу потребного за друкованє дзецинскей сликовнїци и за кнїжку Руска ґимназия у Войводини хтори успишно закончени.

Пoслe штирoх рoкoх рoбoти oтримана и пeрша вибeранкoва схадзка Рускoгo Дружтва Сивeрнeй Амeрики дня 27. дeцeмбра 1999 рoку. До нового составу Управнoгo Oдбoру прeдлoжeни: Юлиян Сабадoш за прeдсидатeля, Гавриїл Кoлєсар за сeкрeтара, Славoмир Oлeяр за касира и Михал Шимкo и Яни Сeґeди за члeнoх.

Штредком 2000. року член РДСА Славомир Олеяр активовал Руску интернет радио станїцу на хторей промовована и робота РДСА. Делеґация РДСА була на Карпато-русинским пикнику у Питсбурґу. Порядни обсяг дїялносци РДСА бул отримани по конєц 2003. року.

Поступне гашенє РДСА

У наступним периодзе, после 2003. року, активносц РДСА почала слабиц. Нє отримовани порядни рочни схадзки, на балох и пикникох було вше менєй присутних. Виберанкова схадзка отримана аж 12. мая 2007. року кед на чоло Управного одбору пришол Юлиян Макаї, Мирослав Еделински бул секретар, Елемир Надь касир а Мелания Колбас и Михайло Будински члени. Робота РДСА ознова ожила. РДСА ше зявело и на Мултикултурним фестивалу хтори ше початком лєта отримує у Виктория парку у Киченеру. У октобре 2007. року з роботу почала Руска школа у Киченеру у хторей були 12. дзеци а робела з нїма учителька Славка Макаї. 2008./2009. року у Рускей школи були уписани 16. дзеци и робела з нїма Кристина Кренїцки. У 2009. року Руснаци мали двараз мешачно службу божу а од новембра истого року служба божа була у цалосци на руским язику.

У периодзе 2010/2011. интензитет роботи РДСА знова опада. Концом 2011. року вибрани нови Управни одбор. За предсидателя УО вибрани Здравко Шимко зоз Брантфорду, за подпредсидательох вибрани Звонимир Маґоч и Ваньо Хома, за секретарку УО Йозефина Дервишевич и за касира Владо Мученски.

Руска школа престала з роботу у януаре 2012. року.

Дня 23. марца 2013. року шицки члени Управного одбору РДСА задзековали на членстве у УО.

Мож предпоставиц же то бул формални конєц дїялносци Руского дружтва Сиверней Америки.

У наступних рокох под меном Руского Дружтва Сиверней Америки нє було даяки конкретни манифестациї або змисти. Ґрупи руских фамелийох орґанизовали ище пар балски вечари, влєце ше сходзело на пикник.

Концом 2011. на Фейсбуку отворени профил под назву Руске дружтво Киченер алє и на нїм, у идуцих 10 рокох, нє були призначени даяки окремни змисти у його роботи.

Вонкашнї вязи

• Ruske Družtvo Kitchener на Фейсбуку