Сенка Бенчик
Сенка Бенчик (*28. децембер 1973—†18. юний 2021), наставнїца руского язика, новинарка на радию и ТВ, директорка ОШ, двараз мастер з линґвистики, дружтвено-политична активисткиня.
| Сенка Бенчик | |
|---|---|
 | |
| Народзена | 28. децембра 1973. |
| Умарла | 18. юния 2021. (48) |
| Державянство | югославянске, сербске |
| Язик творох | руски, мадярски, сербски |
| Школа | Педаґоґийни напрям у ОЦ Петро Кузмяк у Руским Керестуре |
| Универзитет | Педаґоґийна академия у Суботиц,
Учительски факултет у Зомборе |
| Наукови ступень | двараз мастер, Филозофски факултет у Новим Садзе |
| Период твореня | 1993—2021. |
| Жанри | образованє, култура,
информованє, линґвистика |
| Похована | на Заходним теметове у Бачкей Тополї |
| Припознаня | Плакета Општини Бачка Тополя,
плакета проф. Гаврила Г. Надя |
Биоґрафия
ушорицСенка Бенчик, дзивоцке Папуґа, народзена 28. децембра 1973. року у Бачкей Тополї. Родичи оцец Янко Папуґа и мац Гелена, родз. Фейди. У вчасним дзецинстве Сенка ходзела до оводи до оддзелєня на мадярским язику а у основней школи була у оддзелєню на сербским язику. Штреднє образованє педаґоґийного напряму закончела на руским язику у Образовним центре Петро Кузмяк у Руским Керестуре (1992.). Потим закончела Педаґоґийну академию у Суботици (1998.), a Учительски факултет у Зомборе (2002.). Студиї заокружела на Оддзелєню за русинистику на Филозофским факултету у Новим Садзе дзе одбранєла два мастерски роботи 2012. и 2017. року.
Сенка Бенчик була у малженстве зоз Миклошом Бенчиком и мали тройо дзеци, синох Уроша, Миклоша и дзивче Марию.
Културно-просвитна робота
ушорицНа виучованю руского язика як виборного предмету зоз елементами националней култури зоз новоораховскима школярами, з потримовку Дружтва за руски язик, литературу и културу, Сенка Бенчик почала робиц ище як студент-абсолвент Педаґоґийней академиї 1993. року у Основней школи Чаки Лайош у Бачкей Тополї и 18. октобер у Новим Орахове. Зоз новоораховскима школярами участвовала на медзиокружним и републичним змаганю зоз руского язика и на нїх єй школяре зазначовали значни резултати. Школяре зоз наставнїцу Сенка Бенчик участвовали на стретнуцох руских школох, а були и домашнї трох ювилейних стретнуцох: 5 (1998) 15 (2009) и (25) 2019 у Бачкей Тополї и Новим Орахове.
Сенка Бенчик була порядни учашнїк семинарох з руского язика и член Активу наставнїкох руского язика. Потримала и орґанизовала семинар о басни як литературним жанру у руским язику у Новим Орахове 2006. року. Тиж потримала и отримованє штирох округлих столох зоз прешлосци Руснацох у Новим Орахове (2003-2006). Резултат тих сходох було друкованє двох кнїжкох о Руснацох у Новим Орахове хтори видало Дружтво за руски язик, литературу и културу з Нового Саду.
Сенка Бенчик була предсидатель Секциї Дружтва за руски язик, литературу и културу у Новим Орахове у рамикох хторей роби Литературна секция Штефан Чакан, а тиж була и активни член КУД Петро Кузмяк у Новим Орахове. Добитнїк є припознаня-плакети зоз меном проф. Гаврила Г. Надя за 2006. рок, Плакети Општини Бачка Тополя (2020) и других.
Була член Одбору за образованє Националного совиту Руснацох.
Мр Сенка Бенчик окончовала у двох мандатох и длужносц директора Основней школи 18 октобер, тиж у Новим Орахове од 2006. року у хторей ше настава отримує по мадярски. Настава по мадярски, пестованє руского язика зоз дзецми, мишани штредок яки новоораховски у хторим жию Серби, Мадяре и Руснаци дало порив Сенки Бенчик же би приступела ґу виглєдованьом гунґаризмох у руским язику и же би на Филозофским факултета у Новим Садзе одбранєла два мастер робору под назву: Гунґаризми у руским язику и Заєднїцки гунґаризми у сербским и руским язику.
Новинарски анґажман на ТВ и радию
ушорицМр Сенка Бенчик ушорйовала и водзела радио-емисию на руским язику на Радио реґиї (регионални радио општинох Бачка Тополя и Мали Идьош) од початку єй основаня. Попри спомнутей радио емисиї од децембра 2012. року на локалней бачкотопольскей телевизиї Сенка Бенчик ушорйовала и водзела информативну ТВ емисию на руски язику. Була и дописователь Рускей редакциї Радио Нового Саду.
Автор є двох кнїжкох Гунґаризми у руским язику (2014) и Лексични паралелизми (2020) хтори видало Дружтво за руски язик, литературу и културу.
Сенка Бенчик умарла 18. юния 2021. року а похована на Заходним теметове у Бачкей Тополї.
Литература
ушориц- Др Михайло Фейса: Всеоблапна анализа гунґаризмох у руким язику мср. Сенка Бенчик, Гунґаризми у руским язику, Studia Ruthenica, Дружтво за руски язик, литературу и културу, ч. 18, б. 232-234.
Вонкашнї вязи
ушориц- мср. Сенка Бенчик, Гунґаризми у руским язику, Studia Ruthenica, Дружтво за руски язик, литературу и културу, ч. 17, 2012, б. 101-202.
- Мср. Сенка Бенчик, Лексични паралелизми у руским, сербским и мадярским язику, Studia Ruthenica, Дружтво за руски язик, литературу и културу, ч. 23, 2018, б. 72
- Мср. Сенка Бенчик, Домашнї животинї, 2017, Studia Ruthenica, Дружтво за руски язик, литературу и културу, ч. 23, 2018, б. 201
- Мср. Сенка Бенчик, Бачка Тополя: Лексични паралелизми, Заєднїцки гунґаризми у сербским и руским язику, Studia Ruthenica, Дружтво за руски язик, литературу и културу, ч. 26, 2021, б. 226
- Др Михайло Фейса, мср. Сенка Бенчик, Язичне пасмо турского походзеня у руским язику, Studia Ruthenica, Дружтво за руски язик, литературу и културу, ч. 27, 2021, б. 43
- Руска мисия Сенки Бенчиковей, автор Ол. Папуґа, Рутенпрес, 16. октобра 2020.
- Формовани орґани, одбори и роботни цела Националного совиту, Рутенпрес, 29. януар 2019.
- Почали тогорочни Днї Миколи М. Кочиша, Рутенпрес, 2. децембер 2017.
- У Тополї и Орахове 35-еро школяре виучую руски язик, Рутенпрес, 19. септембер 2015.
- Умарла учителька Сенка Бенчик, автор И. Папуґа, Рутенпрес, 18. юний 2021.
- Сенка Бенчик (1973-2021), Studia Ruthenica, Дружтво за руски язик, литературу и културу, ч. 27, 2021, б. 154
Опатриц и тото
ушориц- Портрет Сенки Бенчик, автор Златка Перович
- Сенково животни драги, автор Янко Бучко