Смик
Смик
ушориц
Смик то древена палїчка зоз струнами и ,,жабку″ з помоцу хторей ше грає на смикових инструментох. То мала справа на хторей нацагнути струни зоз коньскей шерсци лєбо подобного материялу. Зоз смиком ше прецагує по струнох смикових инструментох и так ше достава тон. Постоя смики розличних длужинох и формох.
Файта смикох и часци
ушорицПримитивни смики маю форму лука (найчастейше таки смики мали народни инструменти як (ґусли, гусла, ґудок). За гушлї, виоли, виолончела и контрабас палїчка смика проста. Смик ма горню, штредню и долню часц. Горня часц-верх смика ма мале випупченє. Штредня часц-попрейґа ма струну зоз шерсци и долня часц смика на хторей стої мала закрутка такв. жабка зоз хтору ше зацагує смик. За контрабас постоя два типи смикох: французки и нємецки смик. Французки смик исти як и за шицки инструменти смиковей фамелиї. Нємецки смик ше розликує по долнєй часци (жабки) хтора векша та оможлївює лєпше триманє смика.
Струну-шерсц на смику ше подмасцує зоз калафониюмом. Калафониюм то файта осушеней смоли хтора зоз чуханьом стваря прах и преноши го на смик и так струна смика достава красши звук.
Технїка граня без смика
ушорицПостої на смикових инструментох артикулацийна технїка граня без смика. Напр. технїка пицикато (ит. pizzicare скрац. pizz.) и зоз применьованьом того способу граня смик ше нє хаснує, алє ше звук на гушлї достава зоз потаргованьом струнох зоз пальцами. Таки способ граня практиковали и старши композиторе а тиж и композиторе новших часох 18 вику и надалєй. Перши похасновал технїку пициката италиянски композитор Клаудио Монтеверди а познате же як виолиниста-виртоуз поготов схопно применьовал гранє пициката Николо Паґанини.