Сопран

Сопран (од ит. sopra, прейґа, ит. Soprano, нєм. Sopran) ^[1] то найвисши женски глас. Тонски розпон сопрана найчастейши од c1 по а2 а професийни шпиваче маю и ширши розпон (дияпазон) и по c3. Постоя вецей файти сопранского гласу у зависносци од їх моци и фарби гласу, як и типу улоги хтору маю и шпиваю напр. у опери. ^[2]

Розпон сопрана

Вираз сопран ше одноши на женски глас, без огляду же исту висину тона можу досцигнуц и хлапци лєбо одроснути хлопски шпиваче (хтори нє мутираю). Хлопи оможлївюю таке шпиванє хаснуюци технїку фалсета. Таки шпиваче ше наволую контратенори.

Найвисши записани шпивани тон у музичней литератури то f3 у ариї Кралїца ноци зоз Моцертовей опери Чаривна пищалка. Чежко мож найсц таки сопран хтори може долапиц и одшпивац тот високи тон. Постоя вецей подзелєня сопранского гласу:

Колоратурни сопрани

Монсарет Алеведра-сопран, Дякомо Маєребер Пастирска писня

Сопран хтори попри широкого розпону гласу ма рухомосц, верткосц, гибкосц. Може зоз лєгкосцу виводзиц велї музични нотни бравури и прикраски. Таки глас ше наволує колоратурни сопран.

Лирски колоратурни сопрани то шпивачки зоз барз рухомим, вертким гласом, схопни у горнїм реґистру одшпивац швидку и пременлїву мелодию (колоратуру). Познати лирски колоратурни сопрани: Кетлин Битл, Натали Десей, Дияна Дамрау, Суми Джо, Луция Поп и Беверли Силс, Мария Калас, Монсарет Кабалє, Квитка Цисик и други. Приклад лирского колоратурного сопрану и Беверли Силс зоз насловну улогу у опери Линда зоз Шамония.
Драмски колоратурни сопрани то шпивачки хтори способни одшпивац швидки музични пасажи у високим реґистру, алє зоз моцнєйшим,богатшим и емотивнєйшим гласом. Їх типични шпивацки реґистер од тона b у малей октави. Найпознатши драмски колоратурни сопрани то: Джоан Садерленд, Радмила Бакочевич, Кристина Дойтеком, Едита Ґруберова, Мария Калас, Джун Андерсон и Еда Мозер. Приклад драмского колоратурного сопрану то Джоан Садерленд, зоз насловну улогу у опери Лукреция Борджия.

Спинито сопран (ит. Spinito soprano ґурнути сопран) ма шветлу фарбу и висину тонох лирского сопрану, алє може зоз лєгкосцу шпивац и драмски ариї. Прето тот глас часто припада и драмскому и лирскому гласу. Приклад спинито сопрану то Леонтина Прайс у насловней улоги у опери Тоска. Познати оперски шпивачки спинито сопрана то: Рената Тебалди, Леонтина Прайс, Зинка Миланов, Радмила Бакочевич.

Субрет

Розпон субрет сопрана

Субрет (франц. Soubrette кокета) лєбо характерни сопран (нєм. Charaktersopran) то слово, назва зоз хтору ше означує тип оперскей улоги и характеристични глас зоз хторим толкує и дочаровює улогу у дїлу. То лєгки глас шветлей, отвореней фарби, просековей висини гласу, без швидких шпивацких прикраскох (колоратурох).«Лєгки глас» нє значи же тоти шпивачки маю слаби глас, напроцив, маю моцни глас прето же у каждей улоги у опери нєобходно у даєдней часци дїла надвладац звук оркестри. Велї млади шпивачки започинаю кариєру зоз субрет улогами, алє як поставаю гласовно «узретши», преходза до другей файти сопрану. Їх типични шпивацки реґистер од тона c1 по d3. Приклад за улогу субрет тo Дон Апшо улога Сузани у опери Фиґарова женїдба.

Нє постоя шпивачки хтори специялизовани лєм за таки тип улогох. Шпиваю їх и лирски сопрани, лєбо колоратурни мецосопран.

Ирина Давосир Матанович наша перша руска оперска шпивачка, сопран, примадона Сербского народноги театру у Новим Садзе. Єдна з найуспишнєйших повойнових руских уметнїкох у обласци музичней култури котра досягла найвисши професийни уровень и єдна од познатих интерпретаторох рускей, українскей и сербскей шпиванки. Попри оперских улогох, Ирина Давосир Матанович наступала з успихом и на концертох, з ариями и шпиванками В. А. Моцарта, Ф. Шуберта, Р. Шумана, Й. Брамса, С. Рахманїнова, П. И. Чайковского, А. Дворжака, П. Коньовича, К. Барановича, И. Ковача и других, як домашнїх так и иножемних композиторох.

Ирина Давосир Матанович, сопран, перша наша руска оперска шпивачка

Улоги сопранох у класичних оперох

Винченцо Белини: Норма (Норма)·
Жорж Бизе: Микаела (Кармен)

Александaр Бородин: Ярославна (Княз Иґор)

Рихард Ваґнер: Изолда (Тристан и Изолда), Зиґлинда и Брунґилда (Валкира), Елза (Лоенґрин)

Дюзепе Верди: Дїлда (Риґолето), Виолета (Травията), Аида (Аида), Дездемона (Отело), Леонора (Трубадур), панї Макбет (Макбет), Абигайл (Набуко)