Юлиян Малацко

Проф. др Юлиян Малацко (*15. марец. 1937—†28. юний 2021) у академскей явносци познати як перши доктор наукох у обласци физичней култури у Войводини, шветови науковец у обласци спорта.

Юлиян Малацко
Юлиян Малацко (2000)
Народзени	15. марца.1937.
Умар	28. юния 2021. (84. роки)
Державянство	югославянске, сербске
Язик творох	сербски, руски, анґлийски
Школа	ґимназия
Универзитет	Факултету спорта и физичного воспитаня у Беоґрадзе
Наукови ступень	доктор наукох
Период твореня	1961—2005
Поховани	на Городским теметове у Новим Садзе

Биоґрафия

Проф. др Юлиян Малацко народзени 15. марца.1937. року у ремеселнїцкей фамелиї у Руским Керестурe, општина Кула , Войводина, Сербия. Основну школу и штири класи ґимназиї закончел у Руским Керестуре на рускей бешеди а штредню школу у Новим Садзе 1956. На Факултету спорта и физичного воспитаня у Беоґрадзе дипломовал 1961. року, маґистровал 1972. а титулу доктора здобул 1976 року. Як стипендиста новосадского Универзитета пребувал на Институту за физичну културу на постдокторским усовершованю у Києву 1978. у обласци кибернетики у спорту.

Як позарядови фаховец у обласци физичней култури и спорта пребувал у рамикох медзинародней черанки искуствох у велїх европских и шветових городох . Бул порядни професор на Факултету за спорт и физичне воспитанє Универзитета у Новим Садзе на предметох Методолоґия виглєдованя и Основи спортского тренинґа. На факултету за менаджмент у спорту БК Универзитета у Беоґрадзе и позарядови професор за Менаджмент людских ресурсох у спорту. Бул перши директор новосадского Института физичней култури од 1978. по 1980. а од 1984. по 1985. и окончователь длужносци предсидателя його Колеґиялного дїловодного одбора. Предсидатель того Орґану бул од 1985. Окончователь длужносци декана бул 1989. а потим два мандати декан Факултета физичней култури Универзитета у Новим Садзе.

Як член роботней ґрупи котру 1975. року меновала Вивершна рада Войводини направел першу Штредньорочну програму розвоя науки у физичней култури Войводини (1975-1980). Преподавал на Универзитетох у Новим Садзе, Беоґрадзе, Любляни, Сараєве, Приштини, у Осєку и Травнику, Педаґоґийним факултету у Зомборе.

Як порядни професор Универзитета у обласци спортских тренинґох обявел векше число универзитетских кнїжкох, учебнїкох, приручнїкох и наукових роботох. Сотрудзовал зоз медзинароднима часописами, и бул учашнїк велїх конґресох, симпозиюмох и наукових сходох медзинародного характеру. Достал числени домашнї и медзинародни награди и припознаня за свою роботу.

Проф. др Юлиян Малацко умар 28. юния 2021. у Новим Садзе.

Членство у спортских асоцияцийох

• активни атлетичар - скакач зоз палїцу (1948-1957), атлетски тренер (1960-1962) и покраїнски инструктор у атлетики (1962-1975),

• у Атлетским клубе Войводина Нови Сад два мандати подпредсидатель клуба (1962-1972),

• у Атлетским союзу Войводини предсидатель фаховей комисиї, член Секретарията, Предсидательства и Конференциї (1962-1976),

• у Атлетским союзу Югославиї член Фахового совиту (1972-1982), предсидатель Тренерскей орґанизациї Югославиї (1975-1982), член Предсидательства (1975-1978) и член Конференциї (1972-1982),

• у Союзу за дзвиганє терхи Войводини у двох мандатох бул подпредсидатель (1970-1978),

• у Союзу Югославиї за дзвиганє терхи бул предсидатель Тренерскей орґанизациї (1968-1970),

• подпредсидатель (1970-1972) и предсидатель Союзу Югославиї за дзвиганє терхи (1972-1975),

• член Конференциї Союзу за физичну културу Югославиї (1972-1975),

• член Югославянского олимпийского комитета (1972-1975),

• член Секретарията Балканскей федерациї у дзвиганю терхи (1972-1975),

Награди и припознаня

♦ Награда Йован-Микич Спартак за наукововиглєдовацку роботу у физичней култури Войводини (1983),

♦ Повеля зоз златну плакету за винїмкове доприношенє и витворени резултати у роботи и розвою Универзитета у Новим Садзе (1991)

♦ Повеля Антрополоґийного дружтва Югославиї як знак припознаня за доприношенє у роботи и розвою АДЮ (1999),

♦ Повеля (бронзова зоз значку) Атлетского союзу Сербиї за вельорочну и пожертвовну роботу на ширеню, унапредзеню и пропаґованю атлетики у Сербиї, як и за посцигнути резултати (1978),

♦ Плакета Факултета спорта и физичного воспитаня Универзитета у Новим Садзе, зоз подзековносцу деканови, за доприношенє унапредзеню и розвою тей високошколскей установи (2009),

♦ Плакета Атлетского союзу Югославиї з нагоди означованя ювилея 1921-1971 (1971),

♦ Плакета Атлетского клуба Войводина Нови Сад за 10 роки активней роботи у Атлетским клубе Войводина (1969),

♦ Плакета Атлетского клуба Войводина Нови Сад з нагоди означованя ювилея 50-рочнїци атлетики у Новим Садзе 1921-1971 (1971),

♦ Плакета Союзу за дзвиганє терхи Войводини за вельорочну роботу и унапредзенє спорта у дзвиганю терхи (1978),

♦ Припознанє зоз Плакету Атлетского союзу Югославиї за 15-рочну роботу у атлетским спорту (1968),

♦ Припознанє зоз стриберну плакету Атлетского союзу Югославиї за 25-рочну пожертовну и успишну роботу у атлетским спорту (1974),

♦ Припознанє Атлетского союзу Югославиї и Атлетского союзу Войводини за роботу у закладанє у розвою атлетского спорту у Войводини 1921-1971 (1971).

Литература

• Гавриїл Колєсар: То нє лєм руцац багинди (Др Юлиян Малацко) - МАК ч. 4, рок 14, април 1985, б. 20-21, 23

Вонкашнї вязи

• Prof. dr Julijan Malacko utemeljivač savremene naučne metodologije i tehnologije u sportu

• Julijan Malacko, University of Novi Sad

• IN MEMORIAM: Julijan Malacko,vest na sajtu Radio TV Vojvodina