Википедия

Янко Барна

Янко Барна
Народзени 10. марца 1955.
Умар Умар 15. юния 2020.
Державянство югославянске, сербске
Язик творох руски, сербски
Школа Штредня Туристично-економска школа у Беоґрадзе
Универзитет Висша економска школа, Беоґрад
Период твореня 1975—2019.
Жанри етнолоґия, история, култура
Поховани на теметове у Темерину

Янко Барна (*10. марец 1955—†15. юний 2020), народни етнолоґ и публициста.

Биоґрафия

ушориц

Янко Барна народзени 10. марца 1955. року у Руским Керестуре. Оцец Миронь и мац Натала родз. Медєши. Янко мал брата Елемира и шестру Марию. У родним валалє Янко закончел основну школу. Дальше образованє Янко Барна предлужел у Штреднєй Туристично-економскей школи у Беоґрадзе а потим там закончел и Висшу економску школу. Тото му оможлївело же би роками робел у обласци финансийох.

Етнолоґийни виглєдованя

ушориц

Од вчасней младосци Янка Барну прицаговали теми зоз прешлосци. Вредно и систематично призберовал материяли, фотоґрафиї и документи з прешлосци Руснацох. Янко Барна, правдиви народни етнолоґ, роками приповедал зоз старшима людзми и записовал тото цо вони чули, видзели и запаметали. Потим тото цо записал и знял на авдиокасети Янко пририхтовал, формовал до тематских цалосцох и обявйовал пригодни етноґрафски написи у Календарох, медзи хторима окреме замерковани Салашски школи живота (Народни календар 1979, НВУ Руске слово, Нови Сад, 95-103), Правели рок (Руски календар 1997, НВУ Руске слово, Нови Сад, 149-152), Статкарска пракса (Руски календар 1998, НВУ Руске слово, Нови Сад, 156-158), Салащанє – богатого роду (Руски календар 1999, НВУ Руске слово, Нови Сад, 138-141), Бази у коцурским хотаре (Народни календар 1980, НВУ Руске слово, Нови Сад, 55-57), До Америки и назад (Народни календар 1980, НВУ Руске слово, Нови Сад, 69-77), Звод салашох (Народни календар 1982, НВУ Руске слово, Нови Сад, 113-121), Найстарши коцурски салаши (Народни календар 1983, НВУ Руске слово, Нови Сад, 99-103), Прецо були салаши (Руски календар 2000, НВУ Руске слово, Нови Сад, 150-153).

У новинох Руске слово од януара по май 2001. року, у рубрики Людзе, роки, живот обявел 18 предлуженя написох з нашей прешлосци под назву Коцурски салаши, а у Заградки, у рубрики З народней студзенки, тиж обявйовал написи за дзеци.

За Янком Барна остали велї обявени и ище нє обявени роботи о прешлосци Руснацох у Войводини. Тоти розгварки зняти на пантлїки, та дзепоєдни з нїх емитовани у радио-емисийох по руски. Людзе хтори помогли Янкови Барнови дознац вельо вецей о нашей прешлосци були: Андри Ґубаш, землєдїлец, народзени 1886. року у Коцуре; Онуфри Жилник, народзени 1905. року у Коцуре; Мелана Сивч, ґаздиня, народзена Джуня 1906. року у Руским Керестуре; Юлин Фейса, землєдїлец, народзени 1923. року у Коцуре; Данил Олєяр, пензионер, народзени 1904. року у Коцуре; Йовґен Папгаргаї, землєдїлец, народзени 1922. року у Руским Керестуре; Дюра Силадї, пензионер, народзени 1894. року у Руским Керестуре; Ґабор Канюх, пензионер, народзени 1908. року у Руским Керестуре; Юлин Сабо, землєдїлец, народзени 1920. року у Коцуре; Ирина Сабо, ґаздиня, народзена 1923. року у Руским Керестуре; Михал Будински, землєдїлец, народзени 1903. року у Кули; Мелана Будински, ґаздиня, народзена Джуджар 1905. року у Руским Керестуре; Мария Стрибер, ґаздиня, народзена Барна 1934. року у Руским Керестуре; Янко Джуня, землєдїлец, народзени 1900. року у Руским Керестуре; Наталия Пап, пензионерка, народзена 1901. року у Коцуре и ище велї други.

Дружтво за руски язик, литературу и културу постгумно видало вибрани роботи Янка Барни у кнїжки Так приповедали нашо дїдове у едициї „Одняте од забуца” число 25.

Янко Барна бул член Дружтва за руски язик, литературу и културу од 1979. року. Єден час бул предсидатель Предсидательства Дружтва (2005-2009), a потим и член Надпатраюцого одбору Дружтва.

Янко Барна бул оженєти зоз Ґеорґину родз. Достанич.

После чежкей хороти Янко Барна умар у своїм 65. року 15. юния 2020. року у Темеринє, дзе є и поховани.

Вонкашнї вязи

ушориц
Превьате зоз "https://rsk.wikipedia.org/w/index.php?title=Янко_Барна&oldid=5548"