Янко Голик
Янко Голик (*10. фебруар 1949—†31. май 2020) бул дипломовани економиста, овласцени ревизор, активни член Рускей матки и Дружтва за руски язик, литературу и културу.
| Янко Голик | |
|---|---|
 | |
| Народзени | 10. фебруара 1949. |
| Умар | 31. мая 2020. |
| Державянство | югославянске, сербске |
| Язик творох | руски, сербски |
| Школа | Ґимназия, Вербас |
| Универзитет | Висша економска школа, Нови Сад,
Економски факултет, Беоґрад |
| Период твореня | 1975—2016. |
| Жанри | економско-финансийски роботи, ревизорство |
| Поховани | На Городским теметове у Новим Садзе |
Биоґрафия
ушорицЯнко Голик народзени 10. фебруара 1949. року у Руским Керестуре. Оцец Йоаким и мац Леона (родз. Колошняї). Янко мал старшого брата Йоакима. Основну школу Янко Голик закончел у Руским Керестуре, а школованє предлужел у ґимназиї у Вербаше. И у основней школи, и у ґимназиї Янко бул замерковани як добри математичар, цо му опредзелєло и будуцу кариєру. Уписал и закончел Висшу економску школу у Новим Садзе, а после нєй ше уписал на Економски факултет Универзитета у Беоґрадзе, дзе дипломовал як економиста 1973. року.
Першу роботу достал як економиста у Польопривредним комбинату 1. май у Руским Керестуре. О кратши час вон прешол до Нового Саду до Служби дружтвеного кнїжководительства САП Войводини. Бул анґажовани на роботох инспекциї а потим робел як висши фахови сотруднїк, потим як самостойни ревизор и на концу як совитнїк-ревизор у Оддзелєню економско-финансийней ревизиї.
Званє овласценого ревизора Янко Голик достал 1996. року.
Як овласцени ревизор вон робел у вецей реномированих ревизорских компанийох як цо то КПМҐ у Беоґрадзе, PricewaterhouseCoopers у Беоґрадзе и других. Янко Голик 2010. року основал ревизорску фирму Holcom Audit у хторей робел по 2014. рок, кед пошол до пензиї.
Янко Голик ше 1983. року оженєл зоз Любицу (родз. Бешлин). У малженстве мали трох синох: Янка, Петра и Николу.
Културно-просвитна активносц
ушорицЯнко Голик бул вельорочни активни член рускей зяєднїци у Новим Садзе. Особлїво бул активни у Рускей матки як и у Дружтве за руски язик, литературу и културу чий член постал 1979. року и у хторим бул єден час предсидатель Надпатраюцого одбору Дружтва. Янко Голик бул член першого Националного совиту Руснацох у СР Югославиї хтори основани 2. новембра 2002. року.
Янко Голик почитовал свойо походзенє, свойо руски коренї. Озда прето у вецей нагодох уходзел до дискусийох зоз українофилски ориєнтованима Руснацами. Поряднє провадзел и куповал шицки виданя новинох, часописох и кнїжкох на руским язику. Янко мал вельку колекцию кнїжкох на руским язику хтору, при концу живота, даровал Дружтву за руски язик, литературу и културу.
Янко Голик умар 31. мая 2020. року. Поховани є 3. юния 2020. року на Городским теметове у Новим Садзе.
Вонкашнї вязи
ушориц- Янко Голик (1949-2020), Studia Ruthenica, Дружтво за руски язик, литературу и културу, ч. 27, 2021, б. 143.