Янко Жилник
Янко Жилник (*юний 1880—†30. януар 1925), лїкар рендґенолоґ, перши специялиста тей файти медзи Руснацами.
| Янко Жилник | |
|---|---|
 Янко Жилник, лїкар рендґенолоґ | |
| Народзени | юний 1880. |
| Умар | 30. януара 1925. (44) |
| Державянство | австроугорске, югославянске |
| Школа | Ґимназия |
| Универзитет | Медицински факултет у Будимпешти |
| Период твореня | 1906—1925. |
| Жанри | здравство, рендґенолоґ |
| Поховани | на старим руским теметове у Новим Садзе |
Биоґрафия
ушорицЯнко Жилник народзени у юнию 1880. року у Коцуре, у фамелиї маєтних землєдїлцох у тедишнїм чаше, од оца Михаила и мацери Мариї, народзеней Горняк-Кухар.
Основну школу закончел у Коцуре, а ґимназию у Вербаше (даєдни жридла гуторя же то було у Новим Садзе) на мадярским и нємецким язику. На Медицинским факултету у Будимпешти Янко Жилник дипломовал 1906. року. Перша робота му була у Солноку на Тиси у Воєней команди, дзе як воєни лїкар робел полни штири роки.
Янко Жилник ше потим врацел до свойого валалу Коцура, дзе службовал кратко 1,5–2 роки. Пред Першу шветову войну ше преселєл з фамелию до Нового Саду и уселєл ше до хижи хтору му у Косовскей улїци купел оцец.
У малженстве зоз Францишку Стоянович мал сина Павла хтори през живот постал углядни и познати архитекта и универзитетски професор.
Янко Жилник мал свою дохторску ординацию у терашнєй Змай Йововей улїци (прейґ драги од католїцкей Катедрали) и робел як дохтор-рендґенолоґ. Бул медзи першима лїкарами-рендґенолоґами у Новим Садзе, а вшелїяк и перши Руснак хтори ше занїмал з тоту специялносцу. Блїзко сотрудзовал з тедишнїма найугляднєйшима новосадскима лїкарами (др Шосберґером, др Адамовичом, др Трифковичом).
Дохтор Янко Жилник бул автор велїх популарних статьох з рижних обласцох здравственей култури хтори обявйовал у Руских новинох и Руских календарох. Окреме були замерковани статї у вязи теди актуалних здравствених темох о оберацих хоротох як цо то пегави тифус, дизентерия, колера и други.
После кратшей и чежкей хороти др Янко Жилник умар у Новим Садзе, 30. януара 1925. року у своїм 44-тим року живота.
Поховани є на старим руским теметове у Новим Садзе.
Литература
ушориц- Др Янко Жилник: Др Микола Новта и др Юлиян Рамач, Нашо здравство у прешлосци, Словнїк медицинскей терминолоґиї, сербско-латинско-руски, Нови Сад, 2005. б. 153-155
Вонкашнї вязи
ушориц- Др Янко Жилник: О даскелїх оберацих (порядкових) хоротох, Studia Ruthenica ч. 12, Дружтво за руски язик, литературу и културу, 2007, б. 125-127.
- Др Ю. Жильник: О даскелїх оберацих (порядкових) хоротох, Руски календар за южнославяньских Русинох за 1922. рок, Руске народне просвитне дружтво, Руски Керестур, б. 115-122.
- Др Я. Жилник, лїкар: Чревни тифус, Руски новини за Русинох у кральовини С.Х.С, Руске народне просвитне дружтво, Нови Сад, 1924. б. 2-3.