Гелена Крклюш

Гелена Фейди Крклюш (*5. децембер 1936–†2. май 2024), подобова уметнїца, малярка аматерка.


Гелена Крклюш

Народзена	5. децембра 1936.
Умарла	2. мая 2024. (88)
Державянство	югославянске, сербске
Школа	Штредня машинска школа, Нови Сад
Период твореня	1990–2024.
Жанри	малярство (реализем)
Похована	на теметове у Ґосподїнцох

Биоґрафия

Гелена Фейди, народзена 5. децембра 1936. року у Кули. Оцец Силвестер и мац Ирина. Гелена мала ище два шестри, Амалку и Иринку. Дзецинство препровадзела на салашу при Кули, дзе полюбела природу и научела ю почитовац. До основней школи почала ходзиц у Руским Керестуре алє ше, кед мала 12 роки, з єй фамелию преселєла до Ґосподїнцох. У Ґосподїнцох ходзела, медзи иншим, до штвартей класи теди ище иснуюцого руского оддзелєня. По законченю основней школи ходзела до штреднєй машинскей школи у Тителу и Кикинди, а матуровала у штреднєй машинскей школи у Новим Садзе. По фаху була машински технїчар а любела предмети у фаху у котрих була потребна точносц у рисованю.

Понеже ше теди, кед Гелена матуровала, єй родичи врацели жиц и робиц до Кули та и вона з нїма пришла до того штредку и почала робиц у фабрики Истра, потим предлужела роботну кариєру у Краґуєвцу, а вец пошла аж до Конїцу у Босни. Бул то период кед ше одала и засновала фамелию.

Гелена Фейди ше повинчала зоз Здравком Крклюшом зоз Заґребу. У малженстве нє мали дзеци.

Гелена Крклюш прешла на роботу до фабрики авионох Утва у Панчеве дзе 1986. року пошла до заслуженей пензиї.

Вецей як штерацец роки вона жила у Беоґрадзе. Кед ше приблїжел час за одход до пензиї Гелена Крклюш почала ходзиц на преподаваня о пчолох, а кед достала сертификат, одселєла ше до Ґосподїнцох ґу старому оцови и купела єден салаш та ше, на тот способ, врацела ознова ґу природи. Двацец роки ше старала о коло 80 кошнїцох а салаш претворела до свойофайтового малярского ателєа.

Подобова творчосц

Понеже була у души подобова уметнїца, малярка аматерка, Гелена Фейди Крклюш ше цалого живота занїмала з уметносцу. Вше любела рисовац и мальовац, алє и шиц, геклац и ушорйовац ентериєр. И попри тим же у штреднєй школи пренашла власни стил мальованя, аж у пензиї почала активнєйше мальовац. У своїм ателєу у Ґосподїнцох була по цали дзень, а вельо раз и вноци. Мешачно зробела по дзешец до двацец малюнки векшого формату. Дзекуюци длугей пракси на роботи здобула прецизносц у рисованю, та ше прето опредзелєла за реализем. Мальовала пейзажи, портрети, мертву природу, сакрални мотиви, хасновала подобову технїку олєй на платну.

Гелена Крклюш була страстна уметнїца хтора шицко коло себе барз добре обачовала. Кажди єй малюнок мал свою приповедку, а окреме малюнки вязани за прешлосц, за єй памятки, хтори вона преживйовала на окремни способ. Док мальовала, часто декламовала стихи хтори ю здогадовали на тоту подїю хтору преношела на платно.

Позната була по тим же свойо малюнки дзечнє даровала. Грекокатолїцкей церкви святого архангела Михаила у Ґосподїнцох подаровала малюнок Атинска школа хтори найдлужей мальовала – штерацец два днї. Векшого є формату и на нїм єст вецей як осемдзешат подоби филозофох. Єден з милших малюнкох єй була и репродукция Каравадьового малюнка Христово знїманє з Крижа хтори тиж подаровала парохиї. Находзи ше у Моноґрафиї грекокафтолїцкого общества при Храме св. архангела Михаила.

Гелена Крклюш 2009. року до парохиялней канцелариї купела шицки потребни ствари, мебель и друге а 2013/2014. року даровала церкви 11 малюнки на духовно-релиґиозни теми як и вельку часц своєй библиотеки.

Малюнки єй по цалим швеце

Гелена Крклюш водзела евиденцию о шицких своїх малюнкох. Прето о каждим знала як го длуго мальовала, яких є димензийох, його назву, та и дзе ше находзи. Найвецей єй малюнки у Французкей, а потим у Америки, Нємецкей, Словениї, у Южноафрицкей Републики, Горватскей, Босни, Австралиї…

Мала осем самостойни вистави у Ґосподїнцох, потим у Руским Керестуре, Новим Садзе, Новим Орахове, а колективно викладала вецей як трицец раз.

Була член Дружтва за руски язик, литературу и културу и учашнїк Подобовей колониї у Ґосподїнцох од самих початкох 2005. року. Заступена є у моноґрафийох лексикону Подобова творчосц Руснацох (2003) и Подобова колония Стретнуце у Боднарова (2015).

Гелена Крклюш умарла 2. мая 2024. року, похована є на теметове у Ґосподїнцох.

Литература

Подобова творчосц Руснацох (2003). Нови Сад: Дружтво за руски язик, литературу и културу, б. 69.

Вонкашнї вязи

Кажди малюнок прежита приповедка, новини Руске слово, 22. януар 2017

Фарби мудросци - Гелена Фейди Крклюш, канал Маковчань, Ютюб, 13. октобер 2016.

Упокоєла ше Гелена Крклюш, И. Пaпуґа, Рутенпрес, 9. май 2024

ПОДОБОВА КОЛОНИЯ „СТРЕТНУЦЕ У БОДНАРОВА“, Нови Сад, 2015, бок 47.

Х Подобова колония,Стретнуце у Боднарова, Ґосподїнци, 26-27.07.2014., б. 3. (Русинско прело 1921.)