Дюра Биндас


о. Дюра Биндас
Народзени	23. марца 1877.
Умар	21. януара 1950. (73)
Державянство	угорске, югославянске
Язик творох	руски
Школа	Ґимназия у Винковцох и Заґребе
Универзитет	Богословия у Ужгородзе
Период твореня	1901—1944.
Жанри	свяшенїцтво, редакторство, дїялносц у култури
Поховани	у Вербаше

о. Дюра Биндас (*23. марец 1877—†21. януар 1950), инициятор и главни реализатор снованя Руского народного просвитного дружтва (РНПД), його перши подпредсидатель, а познєйше и предсидатель; длугорочни редактор Руского календара, наш визначни священїк и културни дїяч.

Биоґрафия

Дюра Биндас ше народзел у Руским Керестуре 23. марца 1877. року у селянскей фамилиї. Оцец Янко, мац Мария родз. Киш. До основней школи започал ходзиц у своїм валалє, а предлужел у Винковцох, дзе закончел и першу класу ґимназиї. Школованє предлужел у Заґребе, дзе матуровал 1896. року, як питомец Грекокатолїцкей семинариї. Штири роки богословиї закончел у Ужгородзе. Оженєл ше 1901. року зоз Емилию Лабош, дзивку Владимира Лабоша, священїка у Миклошевцох, зоз котру мал єденацецеро дзеци. Єден син (Михайло) тиж бул священїк, єден син (Дюра) бул висококвалификовани графичар и руководитель друкарнї РНПД (од 1945. року и Друкарнї „Руске слово“), дзивка Олґа постала монахиня, дзивка Мария ше одала за будуцого священїка Михайла Юристу, а дзивка Ана – за будуцого священїка Онуфрия Тимка.

За священїка є рукоположени 7. априла 1901. року. Пошвецел го крижевски владика Юлий Дрогобецки. Як священїк Дюра Биндас перше робел у владическей канцелариї у Крижевцох, а вец од 1. януара до 1. юния 1902. року бул дочасни администратор парохиї у Сошицох (Жумберак). Отамаль пришол до Руского Керестура, дзе окончовал длужносц пароха (бо актуални парох Андри Лабош уж бул стари), а полни 11 роки робел и як катехета. Вец є 1912. року меновани за пароха у Дюрдьове, а 1923. року за пароха у Коцуре, а оталь 1933. року за пароха у Старим Вербаше, дзе Дюра Биндас остал по конєц живота (21. януара 1950. року) и там є поховани.

Препородна дїялносц Дюри Биндаса

о. Дюра Биндас шедзи други з права

Ище як студент богословиї Дюра Биндас ступел до контакту зоз Володимиром Гнатюком и дописовал ше з нїм. Слухал його совити и инспировал ше з його идеями у вязи зоз националним препородом Русинох у тедишнєй Угорскей. Його дїялносц на тим планє постала обачлїва од конца 1912. року, кед постал парох у Дюрдьове. Отамаль вон розпосила циркуларне писмо рускей интелиґенциї у котрим предклада перше видаванє новинох (нє витворене пре Першу шветову войну), а вец и зволованє „народней рускей просвитней оранизацийней схадзки“. Тота схадзка и отриман а у Новим Садзе 2. юлия 1919. року, кед ше територия нєшкайшей Войводини нашла у гранїцох новоствореней держави Кральовини Сербох, Горватох и Словенцох. На тей схадзки принєшена одлука з котру основане Руске народне просвитне дружтво зоз шедзиском у Руским Керестуре. За предсидателя вибрани керестурски парох Михайло Мудри, а Дюра Биндас постал його перши подпредсидатель.

Од 1921. по 1932. и од 1936. по 1940. рок (полни 15 роки) Дюра Биндас ушорйовал Руски календар. Попри тим, зложел и видал Молитвенїк як окремну кнїжочку.

Як длугорочни редактор, Биндас свою дїялносц пошвецел унапредзованю тей публикациї и витворйованю програмней дїялносци РНПД, окреме после 1936. року, кед ше, после шмерци о. Михайла Мудрого, поднял стануц на чоло Дружтва. Як актуалному предсидательови под час Другей шветовей войни, кед Бачку окупировало мадярске фашистичне войско, припадла длужносц остарац ше же би ше зачувал чежко здобути маєток РНПД. Ришенє найдзене у тим же би ше РНПД формално приключело ґу тедишнєй власцом лоялней Орґанизациї грекокатолицкей молодежи (ОГМ або Калот) зоз шедзиском у Унґваре (Ужгородзе). Теди фактично и престало исновац Руске народне просвитне дружтво.

Цалого живота, по своїх опредзелєньох, о. Дюра Биндас бул проукраїнскей ориєнтациї медзи войводянскима Руснацами. Єден час, концом першей шветовей войни, вон указал и промадяронске опредзелєнє у часох кед ше одлучовало о твореню новей держави познєйше познатей як Югославия.

После ошлєбодзеня, 21. октобра 1945. року у Руским Керестуре основана нова руска орґанизация под меном Руска матка, хтора превжала основни инґеренциї загашеного РНПД, алє „на нових идейних основох“. А то значело же священїки нє були пожадни як руководзаци особи у нєй. Од теди и о. Дюра Биндас шицки свойо творчи потенцияли пошвецел душпастирскей роботи.

Литература

о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и Максима друкарня и видавательна хижа, Петроварадин, 2016, б 55-60.

Янко Фейса: 20 роки од шмерци Дюри Биндаса – Орґанизатор културного препороду; Шветлосц ч. 1/1970, 72-74.

Янко Рамач: На крижней драги, Руснаци у Югославиї од 1918-1941. року; статя Đura Bindas kao publicista u kulturno-prosvetnom i nacionalnom preporodu Rusina u Jugoslaviji (1918-1941) Руске слово, Н. Сад, 2016, б. 31-48.

Дюра Латяк: Улога о. Дюри Биндаса у националним препороду бачванско-сримских Руснацох; Шветлосц ч. 4/2017, б. 573-610.

Вонкашнї вязи

Биндас Дюра, Українська Вiкiпедiя, 7. вересня 2014, M.maryniak

о. Дюра БИНДАС, децембер 28, 2017
Нєшка промоция кнїжки о живоце и дїлу о. Биндаса, Рутенпрес, 5. май 2018.
ДЮРДЬОВСКИ РУСНАЦИ И ЗЛУЧЕНЄ ВОЙВОДИНИ ҐУ КРАЛЬОВИНИ СЕРБИЇ 1918. року, Михаил Холошняй, 9 февр. 2019 г.
Руске народне просвитне дружтво, члени, вебсайт Руснаци у Панониї