Емилиян Ґубаш
Емилиян Ґубаш (*25. фебруар 1875—†3. септембер 1919), учитель и драмски дїяч у Коцуре, други подпредсидатель Управного одбору Руского народного просвитного дружтва (РНПД).
| Емилиян Ґубаш | |
|---|---|
 | |
| Народзени | 25. фебруара 1875. |
| Умар | 3. септембра 1919. (44) |
| Державянство | астро-угорске, югославянске |
| Язик творох | карпато-руски, руски |
| Школа | Дзиякоучительска школа у
Ужгородзе |
| Период твореня | 1894—1919. |
| Поховани | На теметове у Коцуре |
Биоґрафия
ушорицЕмилиян Ґубаш ше народзел 25. фебруара 1875. року у Коцуре. Оцец Михал Ґубаш и мац Мария родз. Тот. Основну школу закончел у своїм валалє, нїзшу ґимназию у Новим Садзе, а дзиякоучительску у Ужгородзе. У дзепоєдних жридлох (як замерковал Микола М. Цап), учительску школу закончел у Баї (Мадярска). Алє, понеже добре овладал зоз карпаторуским язиком, на котрим и писал, а бул и дзияк, точнєйше будзе же Емилиян Ґубаш бул ужгородски школяр.
У Коцуре Емилиян Ґубаш робел як учитель од 1894. по 1899. рок. По власней дзеки одходзи до грекокатолїцкей основней школи (познатшей як Руска школа) у Новим Садзе. Ту робел по 1912. рок, и знова ше врацел до Коцура дзе робел як учитель и дзияк.
Под час школованя Емилиян Ґубаш здобул солидне музичне образованє котре зоз замеркованим успихом применьовал у своєй културно-просвитней дїялносци. Вон 23. фебруара 1913. року пририхтал, з помоцу коцурских учителькох Єлени Чижмар и Ксениї Лабош, „забаву“ у котрей одбавени два єднодїйки Нє преклїнай и Врачарка Єронима Я. Луцика у режиї Емилияна Ґубаша, а виведли их коцурски школяре висших класох основней школи. То источасно и перши театрални представи при Руснацох у Бачкей, о котрих иснує писани шлїд.
О тей подїї значней нє лєм за Коцур, алє и за театрални живот Руснацох на тих просторох, 1913. року писала и Врабельова Недиля, а ориґинална поволанка и програма зачувани дзекуюци др Федорови Лабошови зоз Заґребу и його фамелиї.
Спрам писаня Недилї у Коцуре и о рок, 3. мая 1914. року, тиж виведзена театрална представа Пекло у хижи, хтору пририхтал учитель Емилиян Ґубаш.
После Першей шветовей войни, гоч уж обачлїво хори, Ґубаш предлужує културну дїялносц. Повязал ше зоз о. Дюром Биндасом и потримовал його инициятиви коло снованя рускей културней орґанизациї. З його анґажованьом 9. януара 1919. року у Коцуре основани Просвитни одбор (перши спомедзи вецей таких целох по других местох), а вон вибрани за його першого предсидателя. На Сновательней схадзки Руского народного просвитного дружтва 2. юлия 1919. року у Новим Садзе Емилиян Ґубаш вибрани за другого подпредсидателя Управного одбору РНПД-а и на тей длужносци го застала нєсподзивана шмерц.
Емилиян Ґубаш умар 3. септембра 1919. року у Коцуре, дзе є и поховани.
Литература
ушориц- Дюра Латяк: Театрални живот Руснацох, І часц, видавателє: Театрални музей Войводини и НВУ Руске слово, Нови Сад, 2008, б. 274-276.
- Дюра Варґа: Емилиян Ґубаш - зачатнїк сценско-музичней дїялносци, Младежски часопис МАК, ч. 11, рок XVI, новембер 1987, бок 12-13.
Вонкашнї вязи
ушориц- Нєшка 100 роки од першей рускей представи на тих просторох - РТ Войводина, 23. фебруар 2013. року, жридло Рутенпрес
- Емилиян Ґубаш, биоґрафия - Новинарска Асоцияция Руснацох, децембер 28, 2017. року