Злата Паплацко
| Злата Паплацко | |
|---|---|
|
| |
| Народзена | 17.04.1969. рок |
| Место родзеня | Руски Керестур |
| Державянство | Сербске |
| Школа | Основна школа у Р. Керестуре
Штредня машинска у Темеринє |
| Спорт | рукомет |
| Позиция у спорту | ґолманка |
| Период спортскей професийней кариєри | 1983–2013 |
| Награди и припознаня | Даскельо награди за найлєпшого спортисту у року лєбо за найлєпшого ґолмана
Припознанє Рукометного союзу Войводини Националне спортске припознанє Влади Републики Сербиї Подзекованє найуспишнєйшому членови РК Русин у Руским Керестуре за период 1960-2000 |
Злата Паплацко (17.04.1969.) бувша спортистка, длугорочна ґолманка женскей рукометней репрезентациї СР Югославиї, Сербиї и Чарней гори и Републики Сербиї.
Биоґрафия
ушорицНародзена є у Руским Керестуре од оца Елемира и мацери Ксениї (родз. Уйфалуши), зоз Коцура, котра у младосци тиж бавела рукомет. Злата ма младшу шестру Весну.
Основну школу закончела у Р. Керестуре, а штредню машинску (9. и 10. класу) у Темеринє. Уж у основней школи ше занїмала зоз рижнима спортами: атлетику, кошарку, одбойку, рукометом... Сцела ше випробовац у вецей спортох, алє ю найбаржей заинтересовал рукомет. Перше бавела у „полю”, алє на єдним тренинґу хибел ґолман, так же ю тедишнї тренер Янко Хома положел на тото место. Тот поцаг бул одлучуюци. Тиж так, нє могла ше напатриц нєприкосновени ґенерациї югославянских рукометашкох хторих предводзела маестрална Цеца Китич. Рукометашки були барз популарни и Злата ище раз потвердзела свой вибор — рушиц по їх драги. Зоз тим спортом ше занїмала од 12 рокох, а до заслуженей пензиї пошла 2013. року. Жиє у Руским Керестуре.
Бавяцка кариєра
ушорицҐол-линия, статива и мрежа Злату цагали до свойого простору зоз хторого нє вишла шлїдуюци 33 роки. Кариєру почала у локалним рукометним клубе Русин и нєодлуга було шицким ясне же є порихтана за висши уровень змаганя.
Мала свой сон хтори шлїдзела, вше баржей напредовала и зоз своїма способносцами преросла штредок у хторим почала тренирац. Обачели ю одредзени особи з рукометного клубу зоз Червинки, хтори ше змагал у Войводянскей лиґи. У Червинки тренирала єден рок, а потим достала препорученє пойсц бавиц рукомет до Темерину, дзе препровадзела шлїдуюци дзевец сезони. Бавели у тедишнєй другей лиґи, у хторей бависко було наисце на високим уровню. Змагали ше зоз моцнима екипами, вецей ше и баржей тренирало, и на концу ше шицок труд виплацел з одходом до националного тиму.
Злата Паплацко нє мала звичайну драгу по уход до репрезентациї. Прескочела кадетску и юниорску репрезентацию, а до сениорскей екипи вошла на вимогу Светлани Китич.
Златова ґенерация рукометашкох длуго чекала же би указала талант и свой квалитет. Война, санкциї и розпадованє тедишнєй держави у велїх поглядох опредзелєли їх судьбу, так же Злата медзи иншим, пред войну, була поволана бавиц и до Заґребскей Локомотиви и до тедишнього Босанского Броду. Бавячки вше верели до себе, були праве дружтво зоз праву атмосферу — як фамелия. Потримовали ше же би витворели свойо сни. Праве тото ше им и удало.
Шветове першенство у Италиї (2001. рок)
ушорицЄденац роки прешло як рукометашки остатнїраз достали медалю. То була стриберна медаля на шампионату у Южней Кореї. Любителє рукомету помали трацели надїю до женскей рукометней репрезентациї.
У Италиї 2001. року отримане Шветове прешенство. Од самого початку змаганя рукометашки, а медзи нїма и Злата, бавели одлучно. Звладали Япон (35:18) и Южну Корею (39:31), зоз Австрию одбавели нєришено, алє страцели од Русиї (28:29). Добра ґол-розлика их затримала на другим месце. Зоз лєгкосцу звладали Бразил, зоз 16 ґолами розлики, и Шведску репрезентацию (32:18).
У полуфиналу Злата зоз свою екипу траци од Норвежскей (35:34), алє зоз менталну потримовку бувших бавячкох, самодовириє поросло и то резултовало зоз побиду за треце место. У тим змаганю процив Данскей, после седем ґолох у заостатку, у другим полчаше превжали главну улогу и победзели зоз резултатом — 42:40.
Зоз тим успихом рукометашки националней репрезентациї достали националне припознанє, єдну файту награди за шицок уложени труд у обласци спорту.
Цо ше дотика рукометней националней репрезентациї, Злата наступала у єй составе од 1996. року и то на вецей як 90 змаганьох. Треба спомнуц єй участвованє на Европским першенстве у Румуниї (2000) и завжате седме место, и участвованє на Шветовим першенстве у Италиї (2001), дзе завжали треце место и бронзову медалю.
Рукометни клуби у хторих бавела
ушориц- ♦ РК Русин, Руски Керестур (першираз є реґистрована як бавячка, 1983. рок) - змаганя у Општинскей лиґи
- ♦ РК Црвенка, Червинка (1985) – змаганя у Войводянскей лиґи
- ♦ РК Термовент, Темерин (1986) – змаганя у медзирепубличней лиґи
- ♦ РК Вождовац (тедишнї РК Болаґо),Беоґрад (1995) – медзи иншим и змаганя у Купу европских городох,
- ♦ РК Зомбор Дунав осиґуранє, Зомбор (1996) – медзи иншим змаганя у полуфиналу Купа европских городох и у штварцини финала Купа побиднїкох Купох
- ♦ РК Напредак, Крушевац (1998) – на домашнїх змаганьох достати трофей Купа, а на европским змаганю достати трофей Купа европских городох
- ♦ Мар Валенсия, Валенсия, Шпания (1999) – медзи иншим доставаю Куп Шпаниї, першенство Шпаниї и Куп европских Купох зоз побиду над русийским Краснодаром
- ♦ РК Будучност, Подґорица (2000—2004) – медзи иншим на домашнїм першенстве доставаю Куп Югославиї и Шампионат Югославиї
- ♦ РК Медицинар, Шабац (2004—2005)
- ♦ РК Напредак, Крушевац (2006)
- ♦ РК Врнячка Баня, Врнячка Баня (2007—2010)
- ♦ РК Нопал, Бачка Паланка (2010—2012) и
- ♦ РК Железничар, Индїя (2012—2013).
Награди и припознаня
ушориц
Награда за найлєпшого спортисту городу Темерину 1993. року
- ★ Награда за найлєпшого спортисту рока у општини Зомбор 1997. року
- ★ Припознанє Рукометного союзу Войводини, 2020. рок
- ★ На шветовим першенстве у Италиї 2001. року нашла ше на трецим месце на шветовей лїстини найлєпших ґолманох
- ★ На женским рукометним турнире у Прокуплю 2006. року достала награду за найлєпшого ґолмана на тим турнире
- ★ Националне спортске припознанє Влади Републики Сербиї за окремне доприношенє розвою и афирмациї спорту, 2007. року
- ★ Подзекованє найуспишнєйшому членови Рукометного клубу Русин у Руским Керестуре у периодзе од 1960. по 2000. рок.
Спортски союз Сербиї зоз потримовку Републики Сербиї, Министерством омладини и спорта, 2013. року видал кнїжку МЕДАЉЕ ЗАУВЕК. У тей кнїжки начишлєни 85 успишни спортисти и приказани їх фотоґрафиї. Тоти вибрани спортисти виприповедали свойо красни, алє и чежки хвильки на драги у цеку кариєри. Медзи тима шампионами у спорту и наша Злата Паплацко.
Злата вше мала интересантни попатрунок на свою улогу у екипи. Твердзи же робота ґолмана нє за каждого, тота робота припада вибраним. Ґолманє у рукомету специфични особи, найлєпши товарише бавячом. Треба мац шмелосци стац и чекац лабду.
Литература
ушориц- МЕДАЉЕ ЗАУВЕК, Пут до врха, издање 2013. године
Вонкашнї вязи
ушориц- Рукометашка Злата Паплацко НОВИНАРСКА АСОЦИЯЦИЯ РУСНАЦОХ, 27. новембер 2023. рок
- Клуби у хторих бавела Злата Паплацко, history.eurohandball.com
- Злата у Индїї, indjija.rs
- Vesti iz Sombora, soinfo,org
- MEDALJE ZAUVEK ZLATA PAPLACKO, youtube kanal
- Zlata u četrdesetoj vodi u Makedoniju, politika.rs