Йован Хранилович
Йован Хранилович (*18. децембер 1855.†5. авґуст 1924), грекокатолїцки парох новосадски, новинар, писатель и дружтвени дїяч
| Йован Хранилович | |
|---|---|
 | |
| Народзени | 18. децембра 1855. |
| Умар | 5. авґуста 1924. (69) |
| Державянство | угорске, югославянске |
| Язик творох | горватски |
| Школа | имназия, Крижевци |
| Универзитет | Теолоґия и филозофия,
Заґреб и Беч |
| Период твореня | 1878-1924. |
| Жанри | душпастирство, литература,
новинарство |
| Поховани | на Руским теметове,
Нови Сад |
Биоґрафия
ушорицЙован Хранилович ше народзел 18. децембра 1855. року у Кричкох при Дрнишу, дзе його оцец Никола теди бул парох, а оталь бул познєйше премесцени до Сошицох (Жумберак). Мац Сидония му була зоз Крижевцох. Мали пецеро дзеци: Драґутина, двойнята Миколу и Йована, Марию и Владислава.
До основней школи Йован почал ходзиц у Сошицох, алє по оцовей шмерци (1864) мац преселєла до Крижевцох и вон там предлужел школованє. Уж як школяр шестей класи ґимназиї Йован ше почал интересовац за поезию и упознал ше зоз писателями Антом Ковачичом и Авґустом Шеноом.
Перши два рок студийох теолоґиї и филозофиї закончел у Заґребе, а вец прешол до Бечу, дзе попри богословиї слухал и преподаваня познатого слависти Миклошича и филозофа Бретана. Студиї закончел 1878. року.
За священїка бул пошвецени нєоженєти 1878. року. Кратши час бул секретар крижевского владики а потим службовал у вецей местох у Жумберку, у Кашту, Сошицох и Радатовичох дзе вишпивал свойо познати Жумберски елеґиї а дзе, пре свою дружтвену дїялносц, священїцки обовязки тримал як другозначни. Йован Хранилович свою дружтвену и политичну кариєру почал як праваш и процивнїк велькосербскей политики. Закладал ше за федерализем и за окремне положенє Горватскей у Австро-Угорскей монархиї а у другей часци живота ше приблїжел гу южнославянскей идеї.
Тедишнї крижевски владика Илия Хранилович (котрому Йован бул и родзина) го послал за капелана до Коцура (1886), а вец до Керестура (по 1889), одкаль у авґусту 1889. року постал грекокатолїцки парох у Новим Садзе.
И у Новим Садзе йому дружтвена активносц була на першим месце, дзекуюци котрей ту здобул вельки угляд медзи новосадску интелиґенцию, та єден час бул и предсидатель новинарскей орґанизациї и редактор демократских новинох Єдинство.
Дня 25. новембра 1918. року предшедовал Велькей народней скупштини у Новим Садзе, на хторей принєшена одлука о присоєдинєню Войводини до Сербиї и уходзеню до составу новоствореней держави Кральовини Сербох, Горватох и Словенцох.
За войводянских Руснацох Йован Хранилович значни прето же мал приятельски одношеня зоз тедишнїм дюрдьовским парохом о. Дюром Биндасом, на чию молбу ше Хранилович анґажовал коло обезпечованя потребних условийох за отримованє Сновательней схадзки Руского народного просвитного дружтва у Новим Садзе 1919. року. Ту вон обезпечел потребни дозволи од тедишнїх власцох, ноцованє делеґатох и змесцованє коньских запрагох (бо векшина делеґатох припутовала до Н. Саду на селянских кочох), а – цо найважнєйше – и святочну салу Новосадского маґистрата за отримованє зашеданя! На предлог о. Дюри Биндаса Хранилович и предшедовал на Сновательней схадзки Руского народного просвитного дружтва 2. юлия 1919. року.
Литературна творчосц
ушорицУ литератури ше Йован Хранилович зявел досц вчас, уж 1873. року, писал и прекладал писнї, приповедки, политични и литературни полемики и студиї и обявйовал их у периодики по саму шмерц, трима ше же то були скоро 5000 роботи. Векшина його писньох мала наглашени етични и родолюбиви мотиви. Хранилович у нїх виказовал свою щиру любов ґу оцовщини, з виражену социялну ноту, даваюци порив священству на вирску, културну и политичну роботу з народом.
Ище глїбши шлїд охабел як критичар, закладаюци ше за идеалистични реализем. Його литературна филозофия у себе сублимовала начала тедишнїх старих о єдинстве правди, доброти и красоти. Йован Хранилович постал редактор Обзора 1898. року, а од 1899 по 1900. рок бул и редактор Виенца. Сотрудзовал и обявйовал литературни критики у числених часописох медзи хторима були Просвиєта, Горватска вила, Глас Матици горватскей, Коло, Балкан, Лїтопис Матици сербскей, Суботицка Даница, Католїцки новини и велїх других.
Йован Хранилович умар у Новим Садзе 5. авґуста 1924. року. Поховани є на новосадским руским теметове. Його памятнїк у форми обелиска, котри подзвигла новинарска орґанизация, нєшка под защиту держави.
Литература
ушориц- о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и Максима друкарня и видавательна хижа, Петроварадин, 2016, б. 329-332.
Вонкашнї вязи
ушориц- др Владимир Баровић, мср Соња Поткозарац Јован Храниловић – човек спајања, Новинарска асоцијација Русина - НАР, Нови Сад, 2018.
- Група аутора, Йован Храниловић, прилози разумевању једног живота, Новинарска асоцијација Русина - НАР, Нови Сад, 2018.
- Hranilović, Jovan, Hrvatska enciklopedija.