Мафтей Винай

Др Мафтей (Матей) Винай (* 18. марца 1898—†8. децембра 1981), поет, публицист, просвитни роботнїк, адвокат и судия.^[1]


Др Мафтей Винай

Народзени	18. марца 1898. Руски Керестур
Умар	8. децембра 1981, Суботица
Державянство	Австро-Угорске кральовство, югославянске
Язик творох	руски
Школа	Класична ґимназия, Заґреб
Универзитет	Правни факултет, Заґреб
Наукови ступень	Доктор правних наукох
Период твореня	1925—1975.
Жанри	поезия, публицистика
Поховани	У Суботици
Награди	Искри култури КПЗ Войводини 1975.

Биоґрафия

Мафтей Винай ше народзел 18. марца 1898. року у Руским Керестуре Керестуре, оцец Митро и мац Маря народзена Дудаш (Данкова). У Руским Керестуре закончел основну школу (1909), класичну ґимназию у Заґребе (1909-1917). На Правним факултету, тиж у Заґребе, Мафтей Винай дипломовал 1924. року а докторску дисертацию одбранєл на истим факултету 1928. року.

Роботна кариєра

Ище як студент права, же би обезпечел средства за дальше школованє, Мафтей Винай робел як учитель на Билей (под Кулу), потим як судски службенїк у Вуковаре и Осиєку (1926-1927). После докторованя робел у Новей Ґрадишки. Як судия Мафтей Винай почал робиц у Окружним суду у Сримскей Митровици, алє поднєс одказ на службу и отворел власну адвокатску канцеларию у Вуковаре (1932-1934). Пошвидко ше врацел до Руского Керестура, а робел як срезки подначальнїк у Кули (1936-1941). Под час Другей шветовей войни мадярска окупацийна власц го премесцела на службу до Оджаку (1941-1944).

После ошлєбодзеня Мафтей Винай робел як викладач у ґимназиї у Руским Керестуре, од єй снованя 1945. та по 1952. рок. Преходзи на службу до Кули, дзе роби як судски референт, а потим до Суботици, дзе 1962. року одходзи до пензиї. Мафтей Винай там остал жиц по конєц живота (8. децембер 1981. року), а там є и поховани. ^[2]

Творчосц

Мафтей Винай почал писац ище як школяр ґимназиї. Перши писнї му обявени у Руским календаре за 1925. рок. Його писнї од самого початку на озбильним уметнїцким уровню, коректно виградзени, язично чисти и зоз стабилну поетику. Остал у историї рускей литератури першенствено як лиричар хтори ше надовязовал на поезию Гавриїла Костелника^[3] и медзи двома войнами вон здобул угляд найлєпшого руского поети после Костелника.

Вєдно з Михайлом Ковачом^[4] Мафтей Винай пририхтал до друку Руско-українски алманах бачванско-сримских писательох (1936), а вишла му и окремна збирка його писньох под насловом Ровнїно моя широка (1973), котру до друку пририхтал учитель и поет Василь Мудри.

Награди

Ношитель є награди Искри култури КПЗ Войводини (за 1975. рок), а од 2001. року Руснаци у Суботици кажди рок орґанизую литературну манифестацию под назву Яр др Мафтея Виная.

Литература

Дюра Папгаргаї: Доаєн нашей литератури, Шветлосц ч. 4/1968, б. 266-271, Руске слово Руски Керестур.

Василь Мудри: Щиросц и цеплота у поезиї Мафтея Виная, Ровнїно моя широка, писнї, 1973, Руске слово Н. Сад, б. 7-17.

Др Юлиян Тамаш: История рускей литератури; Завод за уџбенике и наставна средства, Београд, 1997, б. 515-517.

Тамаш, др Юлиян, "Мафтей Винай (1898-1981)", Руски Керестур, лїтопис и история (1745-1991), Месна заєднїца Руски Керестур, 1992, бок 405.

Руснаци у Суботици, моноґрафия, Завод за културу войводянских Руснацох, Нови Сад, 2018, б.15-25.

Вонкашнї вязи

Ирина Папуґаː 110 роки од народзеня др Мафтея Виная (1898-1981), Studia Ruthenica, Дружтво за руски язик, литературу и културу, ч.8, 2001-2003, б. 86-89

Татяна Таґасович (Винай): Мой оцец ми приповедал, Здогадованє на др Мафтея Виная, Studia Ruthenica, Дружтво за руски язик, литературу и културу, ч.8, 2001-2003, б. 84-85.

По оцових дражкох - Портрет Татяни Таґасович родз. Винай

Ґалерия

Стоя: Владимир Колєсар, Йовґен Медєши, Нада (Рамач) Нота, инж. Юлиян Малацко, Микола Гайнал шедза: Петро Ризнич, Гавриїл Надь и др Мафтей Винай
Наставнїцки колектив нїзшей ґимназиї у Руским Керестуре школского 1945/1946. рок Стоя: Елемир Папгаргаї, Йовґен Планчак, Йовґен Медєши, Яков Яша Баков, Евґений Джуня, Стеван Ґера, Микола Гайнал, шедза у штредку: Дюра Дудаш, Любица Медєши, Петро Ризнич, Радмила Рис, Мафтей Винай, перши шор: Єлисавета Будински Рогаль, Єлена Хромиш, Цецилия Ризнич, Павка Дюрков Лакичевич и Єлена Чакан
Конєц 1944. року у лємцо ошлєбодзеним Руским Керестуре: Совєтски вояци зоз паноцом о. Силвестером Кишом и о. Якимом Сеґедийом - Бадарком и Мафтейом Винайом (на право)
Матуранти нїзшей ґимназиї у Руским Керестуре 1946/1947. Мафтей Винай шедзи треци з права.