Википедия

Василь Мудри

Василь Мудри

ушориц
Народзени 13. марца 1930.
Умар 22. юлия 2016. (86)
Державянство югославянске, сербске
Язик творох руски
Школа Учительска школа у Сримских

Карловцох

Универзитет Педаґоґийна школа -

русийски язик у Шабцу

Период твореня 1950—2017
Жанри просвита, литература,

култура

Поховани Руски теметов у Шидзе
Награди Награда Републики Србиї "25 мај" (1970),

"Златна значка" (1980), войводянска

награда з обласци школства

"Партизански учитель" (1990)

Василь Мудри (*13. III 1930—†22. VII 2016), наставнїк, писатель и културни творитель.

Биоґрафия

ушориц

Василь Мудри народзени у Дюрдьове, Сербия, 13. марца 1930). Оцец Данил (1907-1974) и мац Мария, народзена Полдруги (1906-1993) мали двойо дзеци, сина Василя и дзивче Наталию (1936). Василь Мудри основну школу од I-VI класу закончел у Дюрдьове (1937-1943), два класи гражданскей школи у Новим Садзе (1943-1944), а трецу и штварту класу нїзшей ґимназий у Руским Керестуре (1945-1946). После положеней малей матури уписал ше до учительскей школи хтору закончел у Сримских Карловцох (1946-1950). Познєйше попри роботи (позарядово) закончел Висшу педаґоґийну школу - русийски язик у Шабцу (1968).

Василь Мудри бул оженєти зоз учительку Меланию нар. Планчак (Руски Керестур, 1933) зоз хтору мали двойо дзеци - дзивку Меланию (1958) и сина Бориса (1965).

Жил и робел у Шидзе, дзе и умар 22. юлия 2016. року. Поховани є на Руским теметове у Шидзе.

Педаґоґийна и новинарска робота

ушориц

После законченей учительскей школи Василь Мудри почал робиц у Редакциї новинох Руске слово у Руским Керестуре як новинар и редактор дзецинского часопису Пионирска заградка. Два роки познєйше преподавал руски язик у Основней школи у Дюрдьове (1953-1955). После того ознова преходзи до Руского слова у Руским Керестуре (1955-1960), же би ше 1960. року (зоз фамелию) преселєл до Сриму дзе од 1960. по 1962. рок, перше робел як учитель у Дзецинским (покраїнским) шпиталю за ТБЦ на Принциповцу, а после того як наставнїк русийского и руского язика у Основней школи Йован Йованович Змай у Соту (1962–1981) дзе штири роки бул и директор школи. Од 1981. по одход до пензиї 1991. року робел у Основней школи Сримски фронт у Шидзе як наставнїк русийского язика. Источашнє преподавал и руски язик як мацерински руским школяром.

 
Скупштина Дружтва за руски язик, литературу и културу 1981. року. З лїва: Гавриїл Колєсар, предсидатель, Дюра Варґа, Василь Мудри, Микола Каменїцки, Мария Латяк и секретар Янко Рац

Активносци у рамикох Дружтва за руски язик, литературу и културу.

ушориц

Василь Мудри бул єден з зоз сновательох Дружтве за руски язик, литературу и културу 1970. року у Новим Садзе и його перши подпредсидатель и други по шоре, такой после шмерци Миколи М. Кочиша (1928-1973) предсидатель (1973-1974) року, а тиж и длугорочни предсидатель Подружнїци, тераз Секциї Дружтва у Шидзе. Окремну усиловносц у науковей дїялносци Дружтва уложел на пририхтованю Сербско-руского словнїка. У периодзе од 1973. по 1975. рок робел на ексцерпциї рускей лексики. За руски словнїк обробел шейсц букви – Ж, З, И, Л, ЛЬ и М – вєдно 12 000 одреднїци, хтори обявени - I том 1995 и II том 1997. року.

Литературна робота

ушориц

Василь Мудри свою першу писню, под назву Нашей ґимназиї обявел 21. децембра 1945. року у новинох Руске слово (Руски Керестур). Писал писнї за дзеци, писнї за одроснутих як и литературни прикази и школски учебнїки. Писнї му обявйовани на вецей язикох: сербским, словацким, мадярским румунским, македонским и українским язику. Обявени му коло 300 писнї (стихи) за дзеци и вецей як 70 за одроснутих. Заступени є у шлїдуюцих антолоґийох: Антолоґия поезиї, Руске слово, Руски Керестур, 1963; Антолоґия дзецинскей поезиї, Руске слово, Руски Керестур, 1964; Ирина Гарди Ковачевич, Облак на верху тополї, антолоґия дзецинскей поезиї, Руске слово, Нови Сад, 1990 и Светислав Ненадович, Међе певања, антологија шидских песника, Шид 1994.

Василь Мудри автор двох кнїжкох писньох за дзеци Подшнїжнїки викукую, писнї за дзеци, Руске слово, Нови Сад, 1973; и Будзенє яри, писнї за дзеци, Руске слово, Нови Сад, (2014).

Василь Мудри писал и тексти на хтори му компоновани понад 20 композициї хтори виводзени на Червеним пупчецу (у рамикох Фестивалу култури Червена ружа у Руским Керестуре), потим Фестивалу Ружова заградка у Новом Садзе, радийских емисийох итд. У Шидзе, на тим планє сотрудзовал зоз композитором Славком Загорянского (Бачинци, 1947).

Вшадзи дзе у школох робел як просвитни роботнїк Василь Мудри порушовал роботу литерарних секцийох у рамикох хторих ше зявйовали нови мена младих писательох, медзи хторима Амалия Балоґ-Ґерлах и Янко Грубеня (Дюрдьов), Нада Роман (Бикич Дол), а замеркована була и його робота зоз рецитаторами основних школох у Шидзе: Снежану Чордаш, Весну Цирба, Наду Хромиш, Сладяну Румпли итд.

Робота на учебнїкох и наукова дїялносц

ушориц

Василь Мудри составел дзевец наслови читанкох, учебнїкох и школских лектирох за наставу руского язику у основним образованю. Єдна читанка у коавторстве зоз др Яковом Кишюгасом, як и други наслови од 1951. по 2005. рок дожили 21 виданє. Попри того бул рецензент 20 читанкох, учебнїкох, лектири, романох и референт 11 учебнїкох, як и лектор числених руских виданьох.

Литературни огляднуца

ушориц

У вязи зоз литературну роботу Василя Мудрого др Юлиян Тамаш думаня же Василь Мудри зоз своїм интересованьом за збуваня у руским литературним живоце дал значне доприношенє розвиваню свидомосци о потреби пестованя уметнїцкого слова у рускей литератури. Др Тамаш Василя Мудрого видзи насампредз як дзецинского писателя чийо стихи разумлїви широкому кругу читательох, полни полєту и одушевия, окреме стихи обнови и вибудови у повойновим периодзе.

Владимир Костелник наглашовал же тематика писньох за дзеци Василя Мудрого блїзка и актуална каждей ґенерациї дзецох окреме такволаного другого ступня возросту, односно тим хтори прекрочели праг школских дзверох и хтори ше воспитую же би почитовали родичох, наставнїкох, школу, природу. Владимир Костелник, тиж наглашовал же ше стихи Василя Мудрого лєгко читаю бо им ритем чечни, а лєгки су и за рецитованє и паметанє.

Награди

ушориц

Василь Мудри за свою педаґоґийну, литературну и културно-уметнїцку роботу приял вецей награди медзи хторима: припознанє у обласци образованя и култури Републики Србиї "25 мај" (1970) и "Златна значка" (1980), як и войводянску награду з обласци школства "Партизански учитель" (1990).

Тексти за композициї

ушориц

У забавним духу

1983. Нова держава Витомир Бодянец

У народним духу

1984. Спреведзена Витомир Бодянец

1991. Так сцела мамка твоя Михайло Бодянец

1995. Привит Славко Загорянски

1995. Любов мацерина Славко Загорянски

Червене пупче

1973. Хора бабка Онуфрий Тимко

1976. Шицких нас чува оцовщина Юрий Цимбора

1979. На початку школского рока Юрий Цимбора

1983. Нашо швето - Дзецински хор "Шкорванчки" Михайло Бодянец

1984. Нашо дзецинство Витомир Бодянец

1986. Змаржлїва Юста Михайло Бодянец

1986. Чудне путованє Михайло Бодянец

1987. Мала кресцанка Михайло Бодянец

1987. Родичи и школа Славко Загорянски

1991. Сова Даниел Миклош

1993. Початнїк Звонимир Кочиш

1993. Рибарска Михайло Бодянец

1995. Чудне путованє Татиана Барна

1996. Привит ластовичком Славко Загорянски

2002. Купанє, плюсканє Мирослав Пап

2003. Мам я товариша Мирослав Пап

(?) Пионирска хусточка Маґдалена Горняк-Лелас

(?) Розлука зоз гайом Маґдалена Горняк-Лелас

(?) На вибдови Яким Сивч

Ружова заградка

1991. Другому ши шерцо дала - Михайло Бодянец

1992. Розчарованє Славко Загорянски

1993. Заграйце ми Славко Загорянски

1994. Руснак Славко Загорянски

1995. Свадзебна писня Славко Загорянски

1997. Препадли надїї Славко Загорянски

Литература

ушориц
  • др Јулијан Тамаш, Русинска књижевност, Матица српска, Нови Сад, 1984, 188-189;
  • др Юлиян Тамаш, Поет Василь Мудри, Литературне слово, "Руске слова", Нови Сад, VI 1979, 6;
  • Янко Рац, Приручнїк дзецинского живота, Шветлосц IX, Руске слово, Нови Сад, 1973, 4, 430-432;
  • Владимир Костелник, Подшнїжнїки викуку - поезия за дзеци, Нова думка, III, Вуковар, 1774, 69-71;
  • Штефан Гудак, 70 роки живота и 55 роки творчей културно-уметнїцкей роботи - Василь Мудри (1930), "Studia ruthenica" 7, Нови Сад, 1999-2000, 119-123;
  • Владимир Дїтко, Шейсц децениї творчосци Василя Мудрого - учитель и писатель цали роботни вик, Руске слово 32, Нови Сад, 12. 08. 2005,9.
  • Сенка Славчев, 75 роки народзеня и 60 роки културно-уметнїцкей роботи Василя Мудрого, "Studia ruthenica" 11, Нови Сад, 2006, 135-137.
  • Библиоґрафия Руснацох у Югославиї 1918-1980, Матица сербска, Нови Сад, 1990, 380;
  • Василь Мудри: О роботи на Сербско-руским словнїку, Studia ruthenica чис. 5 (18) 1996-1997,  б. 56
Превьате зоз "https://rsk.wikipedia.org/w/index.php?title=Василь_Мудри&oldid=695"