Михаил Джуня
| Михаил Джуня | |
|---|---|
| Народзени | 26. юния 1843. |
| Умар | 10. юния 1894. (51) |
| Державянство | угорске |
| Язик творох | руски |
| Школа | Ґимназия, Винковци, Учительска семинария, Ужгород |
| Период твореня | 1863—1894. |
| Жанри | дзиякованє, образованє, просвита |
| Поховани | у Руским Керестуре |
Михаил Джуня (*26. юний 1843—†10. юний 1894), учитель и дзияк у Руским Керестуре.
Биоґрафия
ушорицМихал Джуня ше народзел у Керестуре 26. юния 1843. року. Ту закончел и основну школу, а гимназию у Винковцох. После того єден час робел як службенїк у Бродскей реґименти. Теди у Бачки и Сриме було барз мало руских учительох, хтори мали закончену учительску школу. Коцурски парох Дюра Шовш, хтори источасно бул и бачко-сримски вицеархидиякон, модлєл 1865. року крижевского владику же би Михалови Джуньови додзелєл стипендию, 400 форинти рочно, за одход до учительскей школи[1]. Джуня ю и закончел у Ужгородзе.
Уж на початку 1867. року Михал Джуня прияти за учителя у рускей школи у Новим Садзе. Источасно бул и дзияк у рускей церкви.
Кед 1874. року умар керестурски дзияк Антоний Сакач, Джуня ше приявел на розписани конкурс и такой бул прияти[2]. Гоч окончовал дзияцку длужносц, вон добродзечнє бул и учитель.
Попри тих двох длужносцох, Михал Джуня бул активни у културно-просвитним живоце валала. Вєдно з напредним селяном Ферком Пап-Радваньом 1876. року основал Читальню, дзе ше людзе сходзели читац кнїжки и новини, слухац поради и преподаваня, дискутовац. Преподаваня часто тримал и учитель Джуня.
Гоч досц худобно жил, Михал Джуня ше намагал вишколовац свойо дзивчата. Дакеди му зоз стипендиями помагало и владичество. Три дзивки му постали учительки: Павла, хтора спочатку робела у керестурскей школи, а вец ше одала за учителя Михайла Врабеля и пошла зоз нїм до Будапешту, Ирина од. Рот, хтора була вихователька и велї роки робела у керестурскей оводи и Наталия, хтора тиж була учителька у Керестуре.
Учитель Михал Джуня умар у Керестуре 10. юния 1894. року. Поховани є на керестурским теметове.
Литература
ушориц- Янко Рамач: Школа у Руским Керестуре (1753-1918), Грекокатолїцка парохия св. Петра и Павла, Нови Сад, 1995. б.
- Тамаш, др Юлиян: Учителе у школи у Руским Керестуре 1753-1941, Руски Керестур, лїтопис и история (1745-1991), Месна заєднїца Руски Керестур, 1992, бок 412.
- P. R. Magocsi and Ivan Pop: Dzhunia, Mikhailo, Encyclopedia of Rusyn History and Culture, University of Toronto, 2005, ISBN 0-8020-3556-3, See Literature: Vojvodina, p. 109.