Михайло Онещук


Михайло Онещук
Народзени	22. новембра 1930.
Умар	4. септембра 2016 (85)
Державянство	югославянске, сербске
Язик творох	сербски, українски, руски
Школа	Штредня поживово-индустрийна фахова школа, Мостар Штредня музична школа Исидор Баїч, Нови Сад
Период твореня	1952-1990.
Жанри	опера, естрада
Поховани	у Новим Садзе
Припознаня	Естрадна награда Югославиї, Заґреб 1978. награда Златне клаше, Осєк

Михайло Онещук (*22. новембер 1930 †4. септембер 2016), оперски солиста и популарни естрадни уметнїк

Биоґрафия

Михайло Онещук народзени 22. новембра 1930. року у Любушким при Мостаре (Босна и Герцеґовина). Оцец Яков бул Українєц а мац була Герцеґовка. Михайло закончел основну школу у Мостаре 1944. року а штредню фахову школу поживово-индустрийного напряму закончел 1951. року. Од 1947. та по 1950. рок Михайло Онещук робел як роботнїк а потим як службениїк у Мостаре.

Шпивацка кариєра

Уж под час школованя замерковани його шпивацки талант. Постал член локалного КУД у Мостаре дзе наступал як шпивач. Михайло пришол 1951. року до Нового Саду дослужиц войско та як вояк положел авдицию и як волонтер шпивал у хору Опери СНТ а у септембре 1952. року постал стаємни член того ансамбла. Источасно Михайло учел соло шпиванє у Штреднєй музичней школи Исидор Баїч при Божани Дубскей и Надежди Микловчич.

Як винїмково музикални шпивач, тенор благородного гласового тембра, Михайло Онещук наступал у числених епизодних солистичних улогох медзи хторима улоги Ґастона и Йосипа у Травияти, Овлура у Князови Игорови, Руиза и Гласнїка у Трубадуре, Официра у Банк Бану, Гортензия у Побочкай ме, Кети, Гералда у Дон Карлосу, официра у Мадам Батерфлай и других. Як член хору Михайло участвовал у велїх других значних репертоарних витвореньох Новосадскей опери: Лучиї од Ламермура, Риґолету, Предатей нєвести, Ґилґамешу и Набуку.

Од 1953. року Михайло Онещук постал и вокални солиста Радио Нового Саду, а познєйше и солиста Радио Телевизиї Нови Сад, шпиваюци и знїмаюци оперски ариї як и сербски, руски, русийски и українски шпиванки народней и забавней музики. У тонскей архиви Радио Нового Саду зачувани коло 750 знїмки Михайла Миши Онещука хторому тота естрадна дїялносц принєсла широку популарносц. Наступал на числених концертох и госцовал скоро у шицких местох Войводини и ширцом по дакедишнєй Югославиї, а зоз винїмковим успихом наступал и на числених госцованьох у иножемстве.

Од початку 60-их та по 80-ти роки Михайло Онещук дзечнє наступал як солиста або член хору новосадского руского КУД Максим Горки зоз хторим руководзел Ириней Тимко.

Михайло Онещук вецей роки континуовано сотрудзовал зоз композитором и педаґоґом Якимом Сивчом чийо композициї з вельким успихом интерпретовал и хтори зняти як архивни знїмки у Радио Новим Садзе. З тим вон охабел шлїди и у историї рускей музичней култури.

Михайло Онещук знял 5 лонґ-плей албуми и штири синґл ґрамофонски плочи, пар авдио касети, даскельо компакт диски. Добитнїк є Естрадней награди Югославиї у Заґребе 1978. року, награди Златне клаше на фестивалу у Осєку, два раз победзовал на Фестивалу култури Червена ружа у Руским Керестуре.

Попри частих концертох на естради Михайло Онещук остал, по пензионованє 1990. року, вирни оперскей сцени участвуюци у числених представох Опери СНТ. Одход до пензиї нє претаргнул його музични активносци.

На чесц Онещуковей богатей кариєри 2010. року обявена кїжка Живот зоз писню у хторей описани носталґични здогадованя на уметнїка, його живот и шпивацку професию.

Михайло Онещук умар 4. септембра 2016. року у Новим Садзе у 85. року. Поховани є на Успенским теметове у Новим Садзе.

Радио Телевизия Войводини 2016. року орґанизовала Михайлови Онещукови одпитуюци солистични концерт у Студию М.