Осиф Костелник
Осиф Костелник (*30. новембер 1903—†21. юний 1936), дипломовани правнїк, писатель и зазберовач руских народних писньох.
| Осиф Костелник | |
|---|---|
 | |
| Народзени | 30. новембер 1903. |
| Умар | 21. юния 1936. (33) |
| Державянство | австроугорске, югославянске |
| Язик творох | руски, горватски |
| Школа | Ґимназия, Винковци |
| Универзитет | Правни факултет, Заґреб |
| Период твореня | 1926—1936. |
| Жанри | право, литература, етноґраф-аматер |
| Поховани | на теметове у Петровцох |
Биоґрафия
ушорицОсиф Костелник ше народзел 30. новембра 1903. року у Петровцох (Горватска), у фамилиї худобного валалского наднїчара, як єдно зоз шесцерих дзецох. Пре чежки обставини у фамилиї анї основну школу нє мог закончиц у своїм валалє. На предлог тедишнього петровского пароха Андрия Сеґедия крижевски владика др Дионизий Няради го приял и змесцел до владического широтинца Юлиянеум у Крижевцох, дзе закончел основну школу. Ґимназию закончел у Винковцох (1914-1922), а правни факултет у Заґребе (1922-1926). Средства за студиранє сам зарабял, бо скромна помоц добротворних дружтвох нє була достаточна за покриванє трошкох.
Осиф Костелник бул оженєти зоз Ирину Надьoрдьову, зоз хтору мал двойо дзеци.
На служби бул перше у Вуковаре и у Шабцу, як адвокатски приправнїк, а вец як бански пристав у Сараєве (6 роки), и на концу як окончователь длужносци срезкого начальнїка у Роґатици. У Роґатици Костелник бул поставени на место зруценого срезкого началнїка хторому ше нє удало окончиц роботи коло аґрарней реформи а хтори були вязани за путованя по териториї среза. Отлукаюци ше по бездражю босанских горох, Костелник раз так спаднул з коня же достал нукашню контузию. То му погоршало уж од скорей здобуту хороту. После краткого пребуваня у сараєвским шпиталю, врацел ше до Петровцох и ту умар 21. юния 1936. року.
Ище як студент у Заребе Осиф Костелник сотрудзовал у часопису Луч (на горватским язику), а од 1925. року активно сотрудзовал и обявйовал свойо написи у Руских новинох аж по 1933. рок. Заступени є и у двох антолоґийних виданьох нашей прози и поезиї (Руско-українски алманах бачванско-сримских писательох,[1] 1936, зоз прозу, и Антолоґия поезиї бачванско-сримских руских писательох,[2] 1965, зоз поезию). Єден час ше занїмал и зоз зазберованьом текстох руских народних писньох, по угляду на записи Володимира Гнатюка, и обявел их вєдно з о. Дюром Биндасом[3].
Литература
ушориц- Др Юлиян Тамаш: История рускей литератури, Завод за уџбенике и наставна средства – Београд, 1997, б. 562-563.
- Осиф Костелник: Позберани твори, НВУ Руске слово, Нови Сад, 1981, боки 7-38.
Референци
ушориц- ↑ Руско-українски алманах бачванско-сримских писательох; видатель Руске народне просвитне дружтво у Р. Керестуре, 1936, б. 177-190.
- ↑ Антолоґия поезиї бачванско-сримских руских писательох; редакцийски колеґиюм: Михал Ковач, Дюра Латяк, Дюра Папгаргаї, НВП Руске слово Р. Керестур, 1963, боки 98-106.
- ↑ Южнославяньских Русинох народни писнї. Позберали и ушорели Дюра Биндас и Осиф Костелник. – Р. Керестур – Нови Сад, 1927.