Павле Паланчаї
Павле Паланчаї (*20. юлий 1966—†15. авґуст 2017), музичар, побиднїк Червеней ружи 1986. року, вокални солиста.
| Павле Паланчаї | |
|---|---|
 | |
| Народзени | 20. юлия 1966. |
| Умар | 15. авґуста 2017 (51) |
| Державянство | югославянске, сербске |
| Язик творох | руски |
| Школа | Нїзша музична школа
Штредня музична школа Исидор Баїч (нєподполна), Нови Сад |
| Период твореня | 1984—2015 |
| Жанри | музика, гранє и вокална интерпретация |
| Поховани | у Руским Керестуре |
Биоґрафия
ушорицПавле Паланчаї народзени 20. юлия 1966. року у Руским Керестуре. Оцец Владимир и мац Веруна (дзивоцке Шугайда). Павле мал брата Янка.
Основну школу Петро Кузмяк Павле закончел у Руским Керестуре. Паралелно зоз основну школу ходзел и до нїзшей музичней школи ШОМО-Кула, одзелєнє у Руским Керестуре. Учел ше грац на гармоники. Понеже пожнєл з уписом до нїзшей музичней школи та на концу основней школи мал лєм 4. класи музичней школи закончени. И зоз нєподполну нїзшу музичну школу бул препознати його слух и талант та бул прияти до штреднєй музичней школи „Исидор Баїч” у Новим Садзе. Медзитим пре нєдостаточну упартосц Павле ю нє закончел та ше врацел до валалу и почал робиц.
Павле Паланчаї бул оженєти зоз Сладяну родз. Ковачевич.
Спочатку Павле робел у Польопривредним комбинату 1. май як маґазионер. Кед комбинат бул розформовани та з єдней його часци була основана задруґа Юарбис (хтора мала вецей сектори, та и пекарню). Павле теди почал робиц у пекарнї и там робел док ше нє похорел.
Анґажованє у музичним живоце
ушорицЯк млади Павле Паланчаї ше уключел до Дому култури та по потреби там грал на гармоники и шпивал на рижних програмох. Тиж бул уключени до ґрупи Кодони у хторей грал и наступал як шпивач тей ґрупи.
Павле Паланчаї бул барз надарени за музику, од малючка ше обачовало його талант та вельо раз наступел як школяр на Червеним пупчецу. Познєйше шпивал и у змаганьох за найкрасши леґиньски глас на Червеней ружи та 1986. року достал, як найкрасши хлопски глас, награду и традицийни чобольов. Тота побида и награда на Фестивалу култури му була ,,желєне шветло" же би предлужел шпивац на Червених ружох и на Ружових заградкох алє тераз уж як преверени и искуснєйши вокални солист хтори шпивал нови композициї з конкурсох. Павле мал приємну фарбу гласа, тиж так мал точну интонацию та му композиторе зверйовали досц компликованши писнї за шпиванє.
Павле бул поволовани шпивац у рижних програмох Рускей редакциї на ТВ Войводина, а за Радио Нови Сад вон у студийох знял вецей як 20 знїмки шпиванкох у народним духу хтори ше поряднє емитовало у рускей програми радия.
Медзитим, здравствени стан ше му погоршовал и вон вше ридше наступал пред публику.
После чежкей хороти, Павле Паланчаї умар 15. авґуста 2017. року. Поховани є на теметове у Руским Керестуре
На наших музичних фестивалох Павле Паланчаї шпивал тоти композициї
| Ружова заградка | ||
|---|---|---|
| Рок | Наслов композициї | Композитор |
| 2002 | Дзе тот Керестур | Владислав Надьмитьо |
| 2005 | Руснакова драга | Юлиян Рамач |
| 2006 | Боже, зачувай параста | Любомир Загорянски |
| 2007 | Гудаци грали | Самуел Медведь |
| Червена ружа | ||
| Рок | Наслов композициї | Композитор |
| 1991 | Цо ме то так пече | Дюра Будински |
| 2001 | Дюрдьовски лїпи | Оленка Сеґеди |
| 2004 | Нє забудз ме, ровнїно | Владислав Надьмитьо |
| 2006 | Шпивай, Руснаку | Владислав Надьмитьо |
Литература
ушориц- Владислав Надьмитьо: „Червена ружа '86ˮ, 30 червени ружи, НВУ Руске слово, Нови Сад, 1991, б. 74.
Вонкашнї вязи
ушориц- Вчера поховани Павле Паланчаї, автор Сор, Рутенпрес, 17. авґуст 2017.