Перши руски дутяни и карчми у Руским Керестуре
Руснаци як тарґовци
ушорицРуснаци нє мали притоку ґу тарґовини. Требало вельо часу же би вони то и постали. То нє часц їх характера, їх поглядох, їх давен – давного становиска. Тримали Руснаци же заробиц и змогнуц ше треба лєм чесно, зоз роботу. И то по цени яку Пан припозна, яку вон одредзи.
Медзи нашим жительством и з нашима людзми тарґовели странци, цо видно зоз податкох о попису жительства.
У Бачкей перши тарґовци тиж странци, найчастейше Жидзи, алє познєйше попри нїх єст и Мадярох и Сербох.
Перши тарґовец, Жид, у Керестуре зазначени 1764. року. У урбиялней таблїчки зоз 1769. року ше наводзи же Керестурци плаца таксу 12 форинти же маю тарґовцох и 12 форинти же медзи нїма жию Жидзи, и таксу 4 форинти же маю месарню.
У Керестуре и у Коцуре 1828. року були по двоме тарґовци.
У Руским Керестуре руски тарґовци и качмаре зявюю ше аж у остатнїх деценийох XIX стороча.
Янко Чизмар (1851―1905), тарґовец оженєти зоз Йозефину Виделком (1851―1885), мали тройо дзеци. При тей першей Чизмаровей тарґовецкей и качмарскей фамелиї крев змишана, погляди и похопеня нє лєм руски пановали. Йозефа Виделком мац Илони, Душана и Еми нє була Рускиня алє Нємица зоз мишаней фамелиї. Тоти тройо Чизмарово дзеци иншак виховани од других звичайних керестурских землєдїлцох, висше су и образовани, погоре ше ноша, з интелектуалцами дружтвую и представяю гражданске пасмо. Вони и їх потомство зародок керестурским „руским” тарґовцом – дутяндїйошом и качмаром. Єден час, пред Першу шветову войну, медзи двома войнами и после Другей шветовей войни, мали 12 дутяни-предавальнї и вецей карчми у Керестуре, а єден потомок одходзи и до Кули, дзе трима два дутяни – єден у центру Кули, а други блїзко при желєзницкей станїци, бул познати тарґовец а окреме по тим же предавал бициґли на кредит.Од нього велї Керестурци и Билянци накупели бициґли, котри були праве у моди.
Медзи Руснацами у Р. Керестуре жили и вецей жидовски фамелиї. Як цудзинци барз ше зложно медзи собу тримали и помагали. Углавним були маляре и тарґовци – дутяндїйоше и качмаре. На Циґлашоре жил и дутян тримал перше Шемберґер, потим Кравс маляр, а жена му дутянчик тримала и палєнку точела.
Познати на гласу бул дутян Самуїла Вайса, у центру валала. У нїм було шицкого и платна и судзини и фарби. На Барищу бул Резаков дутян и карчма – Колб Иґнаца и Мариї. На Капитаньскей улїчки, на углє у Янка Жида, дзе була после Ткальня тиж бул дутян – Клайнов, Райтеров лєбо Фишеров. Жидовска предавальня була и на Маковским шоре прейґ оводи на самим углє.
У Другей шветовей войни Жидзи однєшени до роботних бриґадох и лаґрох до Мадярскей и Нємецкей и лєм даєдни ше врацели. Їх обисца хасновала держава, були у нїх предавальнї, подприємства, дружтвени лєбо културни установи.
Од коло 1870. року, у Керестуре була позната Силадьова – Приклєтова карчма и перших дзешецрочох ХХ стороча Колєсарова и Панска, Миколова Павловичова карчма. Силадьова була на окраїску тедишнього Керестура, на Маковским шоре при Резаковей улїчки. З тоту карчму у вязи и єдно забойство. Колєсарова карчма на Вельким шоре запаметана пре картанє и препаданє капиталох, а Панска пре першу струю у валалє, ґрамофон, радио, младежски танци и отримованє балох.
Карчми и дутяни медзи двома войнами
ушорицАж после 1930. року, векшей либерализациї у дружтве и векшей приватней инициятиви ушлїдзує и векше занїманє Руснацох зоз тарґовину и погосцительством. Будую ше векши обєкти: дутяни,карчми и сали за танєц. У карчмох – салох ше отримую танци за младеж, свадзби, а у центру валала у салох бали, рочни сходи – схадзки.
Позната Панска карчма , Осифкова, Илкова и Бадаркова на Циґлашоре, Штранґаркова на Вельким шоре, Бруґощикова, Мироньова Павловичова, Миколова Папуґова, месарова и дзе тераз Огньогасци на Маковским шоре при церкви и Бобикова на Вепровацкей драги.
Попри тих велїх карчмох, менши дутяни з карчмами було и на окраїскох валала – Иля Мицова малана Вельким шоре спрам Лалитю, ДюраДжуня – Андич на Ґаравцу, Владо Няради – Дзвонарка на Збегньове, медзи Ґизовим и Чорбовим дутяном, Чорбов дутян на углє Збегньова и Канюховей улїчки. Єден час на Новим шоре бул Ежденцийов и Штефанов Надьов – Митьов дутян, а на Вельким шоре прейґ Штранґарковей карчми Чаканов Дутян. Цалком под беґельом, при Буджацким мосце була Будинского карчма. Пред саму Другу шветову войну, на концу Велького шора спрам Кули карчму з вельку салу отворел Михал Джуджар.
У блїзшим центру валала були и два специялизовани тарґовини: Дионизей Пап-Папянка мал желєзарню, а Штефан Няради-Дзвонарка предавальню текстила. Понеже Ш. Няради бул виучени скравец, а мал и скравецку роботню з майстрами и калфами, хто у його предавальнї купел штоф, у роботнї му задармо ушити шмати.
Дутяни и предавальнї у Керестуре 1935. року було 21, а карчми и карчмарох було 15.
Литература
ушориц- Мирон Жирош, БАЧВАНСКО-СРИМСКИ РУСНАЦИ ДОМА И У ШВЕЦЕ 1745–2001, IV TOM (2004), боки 284―291.
Вонкашнї вязи
ушориц- Карчма на штред Керестура, автор Славко Винаї, ютˈюб канал Маковчань