Погосцительство

Погосцительство привредна и услужна дїялносц. Циль погосцительства даванє одредзених услугох нащивительом за хтору вони плаца одредзене пенєжне надополнєнє. Тота дїялносц ше окончує у погосцительних обєктох. Госци у тих обєктох то туристи, путнїки и домашнї хтори жадаю достац услуги такей файти.

Погосцительство у велїх державох барз узко повязане зоз туризмом и представя важне жридло приходох.

Файти погосцительства: готелиєрство, ресторанство, погосцительство у превозкох (услуги у гайзибанским путнїцким транспорту, на путнїцких ладьох, у авиотранспорту и услуги у ротелу, а то готели на ґумових колєсох и мотоготели) и ґастролоґия.

Историят

Розвой погосцительства узко повязани зоз наставаньом и розвойом тарґовини, так же ше перши погосцительни обєкти (ноцнїки, карчми) зявели у векших тарґовецких штредкох, пристанїщох, при вашарох, у населєньох хтори настали коло познатих тарґовецких драгох, коло паломнїцких местох и святилїщох.

У старим Єгипту, праве пре таки причини, настали такволани каравани – сараї, наменєни за дочасове змесценє людзох и ґамилох, їх одпочивок и окрипенє. Подобни обєкти було и у античней Греческей, наволани пандокеї (pandokeῐon), катаґоґи (katagōgḗ) и катализи (katẚlysis). Под час Римского царства було ноцнїки и карчми у хторих одшедали римски уряднїки, службенїки, вояци и тарґовци.

Погосцительство ше окреме розвило после крижарских войнох, а окреме после вельких прейґокеанских одкрицох.

У XVII вику наставаю перши карчми дзе ше сходза интелектуалци и уметнїки. У чаше панованя Луя XIV направени перши готели, односно розкошни палати у хторих французки дворянє дочасово пребували и пририхтовали госцини и вешеля (палати мали назву hôtel, а назва походзи од латинского слова hospes, цо означує госца). У Французкей настали и перши ресторани зоз каждодньову услугу костираня.

Од XIX вику, готели, як обєкти за змесценє и костиранє путнїкох, постали состойна часц туристичного понуканя, перше у Европи, а потим и ширше.

Погосцительни обєкти

Спрам типу и файти услуги, погосцительни обєкти можеме подзелїц на:

Погосцительни обєкти зa змесценє госцох, до хторих спадаю:

а) услуги змесценя, пририхтованя и вислугованя єдла, напою и напиткох;

б) услуги змесценя, пририхтованя и вислугованя напою и напиткох;

в) услуги змесценя и други услуги зоз обсягу погосцительства.

Погосцительни обєкти за пририхтованє єдла и напою, до хторих спадаю:

а) услуги пририхтованя и вислугованя єдла, напою и наиткох;

б) услуги пририхтованя и вислугованя напою и напиткох;

в) услуги пририхтованя єдла, напою и напиткох за вислугованє на других местох.

Спрам квалитету и числа услугох, погоcцительним обєктом ше додзєлює катеґорию услуги. Нєшка ше хаснує „гвиздочка”за ранґованє (оценьованє) обєктох. Векше число визначених гвиздочкох на обєкту означує квалитетнєйшу и подполнєйшу, алє и драгшу услугу.

Єст рижни типи погосцительних обєктох за змесценє, а то:

Готел, апар- готел, ґарни-готел, мотел, туристичне населєнє, апартманске населєнє, камп, пансион, хостел, ноцнїк, одпочивалїще, ботел, обисце, хижа, валалске туристичне ґаздовство, ловарска хижа, ловарски дом и друге

Тиж так, єст и рижни типи обєктох за вислугованє єдла и напою, а то:

Ресторан, карчма, бар, кетеринґ-обєкт, ресторан швидкей поживи, рухоми обєкт за вислугу и други (карчма, коноба, чарда, ресторан домашнєй кухнї, кафетерия, пицерия, печенярня, цукрарня, палачинкарня, кафе-бар, аперитив-бар, ноцни бар, диско-бар, и други)

Фактори хтори дїйствую на розвой погосцительства то:

◆природни и ґеоґрафски фактори (клима и природни богатства або красоти);

◆инфраструктура (драги, вода, струя);

◆промовованє прейґ рекламох, туристичних саймох и интернету;

◆дружтвено-политична ситуация;

◆правни рамик у датей держави итд.

За добре дїлованє, у погосцительстве треба мац доброго руководителя, а звичайно то и сами власнїки погосцительних подприємствох. За успих у дїлованю важне плановац, орґанизовац и контроловац роботи, а тиж так и мац одвитуюцих занятих.

Опать и тото:

Погосцительство при Руснацох у Бачкей

Вонкашнї вязи:

Погосцительство , Википедия на босанским язику
Угоститељство на саобраћајним превозним средствима, Организација ресторатерског пословања на саобраћајним - превозним средствима, vhs.edu.rs
Ugostiteljstvo, Hrvatska enciklopedija, enciklopedija.hr
Правилник о условима и начину обављања угоститељске делатности, paragraf.rs