Zatvojrodzenidzenj

Тексти хтори клица або зародок

Витайце на рускей Википедиї. Дзекуєме вам на текстох хтори сце написали и наруцели до рускей Википедиї. Нам наисце потребни вецей авторе, вецей редакторе текстох.

Єдно питанє ґу вам

Чи можеце, модлїме вас, конциповац, створиц, написац длугши / комплетнєйши статї и вец их наруцовац до рускей Википедиї?

Наша Википедия ше базує на язику коло 15.000 до 16.000 особох а то Руснаци хтори жию у Сербиї и Горватскей. Зоз такей маси людзох скоро же нєт шанси же би ше дахто пошвецел, наприклад, вашому тексту зародку (клици) и на вашо два шори текста да дода ище 80 або 110 або 237 шори текста (наприклад, ориґинални текст о Риєки або Горватскей длугоки, алє наисце длугоки). Пре чисту колеґиялносц було би фер кед бисце формовали голєм основни текст о таких насловох хтори нє лєм зародок алє, ипак, нормални, розумлїви текст як енциклопедийска єдинка о Риєки або Горватскей.

Кед ваш зародок останє у такей форми, мож предпоставиц же вон таки останє мешацами, роками и вец, уствари, будзе представяц єдну файту баланса у змисту рускей Википедиї. Вец будзе лоґичне, вироятно, таки зародок, нєактивни роками, висцерац зоз рускей Википедиї.

Праве прето же нас, Руснацох, єст мале число, ми ше опредзелєли такой, у наруцованю текстох до нашей Википедиї, писац, твориц, составяц тексти хтори, такповесц, маю голєм 75% до 80% закончену форму, або и вецей. Да ше ма дополнїц, евентуално, ище 10% до 20% тексту. У вашим зародку потребне дополнїц 99.99%.

Любели бизме чуц вашо думанє. Keresturec (розгварка) 14:02, 31. октобер 2024. (CET)

Добри дзень. Дзекуєм за вашо порученє и за шицко цо сце зробели за руску Википедию. Розумим же Вам барз важне же би ше писало длугоки и квалитетни статї по руски, алє мушим повесц же ше нє складам же зародки лєм завадзаю и же их треба висцерац. Правда же за Руснацох хтори ходзели до рускей школи статя о Риєки зоз двома виреченями нє ма смисла, алє може мац смисла наприклад за Руснацох хтори страцели руски язик (а таких праве у Риєки вельо), а и за людзох хтори прейґ тей статї можу дознац же иснує Википедия по руски або аж же иснує руски язик. Розумим же примарна цильна ґрупа Руснаци, алє думам же нє треба забуц кельо людзох блука по Википедиї, а медзи нїма и странски слависти, полиґлоти и други хтори можу буц барз хасновити за видлївосц руского язика и за русинистику, а за таких барз кратки и єдноставни статї можу буц интересантни. Окрем того статя на Википедиї може мац и други функциї, напр. може служиц за стандардизацию терминолоґиї дзе стандаризовани термин нє иснує. У тим контексту думам же моя статя о штучним месу мала свою функцию (а и нє була вельо кратша як статї на релативно вельких Википедийох, як напр. словенска або исландска) и же погришне же сце ю висцерали.

Лєм же бисце ме нє розумели погришно, розумим же Ви ту редактор и же можеце висцерац мойо статї котри ше вам нє пача. Кед єдини способ доприношеня писанє длугоких статьох, будзем писац длугоки статї, алє мушим повесц же сом под такима условиями менєй продуктивни як у условийох релативней шлєбоди. — Zatvojrodzenidzenj (розгварка) 17:33, 13. новембер 2024. (CET)

Такой най повем, думам же сом у моїм обрацаню ґу вам бул наисце ясни. Зоз чистима и яснима думками и идеями. Пречитайце ище раз цо сом там написал и пробуйце о тим роздумац. Ви як да нє читали мойо думанє, алє ми такой пояшнюєце же, гат, яки то важни зародок-тексти. Кед же ме до того на прешвечлївши способ уверице, я уж наютре и поютре напишем 273 зародок-тексти, зародок-наслови и у каждим будзе по два шори початного тексту теми и.....цо ту таке добре? Цо ту таке хасновите? Будзем задовольни же сом наруцелч 273 нови наслови до рускей Вики а кеди вони буду закончени, хто их закончи од тих 13.000 Руснацох у Сербиї и Горватскей то лєм сам Господ зна. То буду 273 розбабрани теми, алє им Я инициятор, мой никнейм перши у Историї тексту!

Описал сом же ше ми трудзиме фомирац текст у його 80% капацитету, а вец да ше ище дода хто цо ма.

О текстох-зародкох будзе кус нїжей.

З вашого одвиту винїмам тоти акценти

Вам барз важне же би ше писало длугоки и квалитетни статї по руски...

Нє, нам и мнє нє интерес же би ше писало длуги наслови. Квалитетни гей, ВШЕ треба же би були квалитетни. Алє, длужина текста треба же би була у складзе зоз тему, зоз значносцу теми. Нє можем я писац длуги текст о домашнїх платнених папучох за ноги кед нєт нїякей лоґики же би така тема вимагала нє знам кельо силни пасуси же би ше тема цалком елаборировала. То мож вироятно зробиц на 20 до 30 шори тексту, а нє на 300 шорох тексту бо ми сцеме и любиме длуги тексти. Нам потребни смислени и лоґични тексти.

Правда же за Руснацох хтори ходзели до рускей школи статя о Риєки зоз двома виреченями нє ма смисла, алє може мац смисла наприклад за Руснацох хтори страцели руски язик (а таких праве у Риєки вельо), а и за людзох хтори прейґ тей статї можу дознац же иснує Википедия по руски або аж же иснує руски язик.

Почитовани, статя од двох шорох нє ма смисла нї за кого, анї за тих цо ходзели до рускей школи анї за тих (Руснацох) цо страцели руски язик. Статя зоз двома виреченями або шорами то статя зоз двома виреченями або шорами, нє ма вона вязи зоз ходзеньом до рускей школи або траценьом руского язика.

нє треба забуц кельо людзох блука по Википедиї, а медзи нїма и странски слависти, полиґлоти и други хтори можу буц барз хасновити за видлївосц руского язика и за русинистику, а за таких барз кратки и єдноставни статї можу буц интересантни.

Гей, за таки особи можубуц интересантни два шори тексту, алє сом сиґурни же им 22 або 36 або 54 шори буду ище интересантнєйши. З мало шорох ше мало дознава, з вецей шорох ше ВЕЦЕЙ дознава.

Кед єдини способ доприношеня писанє длугоких статьох, будзем писац длугоки статї, алє мушим повесц же сом под такима условиями менєй продуктивни як у условийох релативней шлєбоди.

Перше, нє треба викривяц дискусию у тим смислу же дахто поставя лєм ЄДЕН або ЄДИНИ способ писаня текстох за Википедию а же то таки кед тримаме же єдини способ доприношеня писанє длугоких статьох бо сом на початку гварел же длужина текста завиши од його змисту, теми, итд. итд а нє обратно. Маме тему о Паризу, алє ми любиме кратки тексти, та напишеме о Паризу лєм 7 пасуси, место 38 пасусох. Нє, кратки або длуги текст то трецерядове мерадло або критерий, у першим планє змист, тема, па змист, змист.

Шлєбода писаня тексту є шлєбода сама за себе. Ю нє огранїчує длужина або краткосц текста.

Нє знам цо подрозумюєце под менєй сом продуктивни кед ше пише длуги тексти а вецей сце продуктивни у условийох релативней шлєбоди. Да, то правда, кед вибереце обробиц зложени, компликовани теми хтори вимагаю вецей тексту, надосц шори, значи буду длугши - га вец цалком лоґичне же за єден дзень направице лєм тот текст. А кед вибереце тексти за хтори потребни 10 шори, вец направице истого такого дня 12 або 16 тексти, место єдного. Алє, то нє ма вязи зоз даяку релативну або абсолутну шлєбоду. Ви ШЛЄБОДНО пишеце и у єдним и у другим случаю. Я пойма нє ма цо ви пишеце, я вам нє виберам тему, наслов итд. Ви себе вибераце, ви пишеце, ви ковач свойого щесца, як ше то гвари.

розумим же Ви ту редактор и же можеце висцерац мойо статї котри ше вам нє пача.

Я ту нє прето да ше ми пача або нє пача статї, да будзем пристрасни або нє. Я ту да ше тримам правилох роботи на Википедиї та и правилох одредзених за администратора.

Медзи Критеријумима за брзо брисање и таки случаї

- Почетнички чланци који су несређени дуже од 7 дана;

- Без (релевантног) садржаја;

Ви наруцели тоти кратки тексти 2-3 днї скорей 31. октобра. 31 октобра сом вам написал поруку. Ви одвитовали нєшка, 13. новембра. Прешли 13 днї од мойого тексту ґу вам. Вашо тексти, по два шори, стали 13-14 днї. И нїч у нїх нє було робене. Я лєм почитовал тото цо мам як препоруку, кед длужей як 7 днї нїч нє меняне, а так було, нїч нє рушене у текстох, а тоти два шори у векшини текстох нє маю баш нїчого смисленого, я посцерал вашо тексти. Єдино сом зачувал текст о Горватскей кус є длугши, ма и таблїчку, и очековал сом же голєм вон будзе роснуц. За тоти 13-14 днї тот текст нє достал нїч, анї єдну букву нову.

Я о вас пойма нє мам хто сце, цо сце, чи сце початнїк, чи сце искусни або супер искусни, алє я мам у оглядзе текст, наслов хтори наруцени, хтори таки яки є, и я поступам по правилох Википедиї. Язик вам перфектни, кед же сце зоз Горватскей вец бисце нам були дупло, тродупло потребни, алє би було потребне да даяк усоглашиме критериї, да ше ви дакус уклопице и прилагодзице ґу нашим даяким визийом рускей Википедиї, а ми, кед бисце континуовано робели на текстох, дополньовали, починали нови, нєт нїякей причин же бизме, вец, нє почитовали вашо усиловносци. Потребни зме єдни другим, то сиґурне. Алє, Википедия то шлєбодна енциклопедия, кед ше нє може усоглашиц основни процедури у роботи, вец ше, вироятно, розидземе. На вас вибор. Поздрав Keresturec (розгварка) 03:30, 14. новембер 2024. (CET)