Филателия

Филателия (грч. philos-пријатељ, ateleia-франкирање) то поняце хторе представя зазберованє поштански маркох1. Филателия и Нумизматика (зберанє кованого пенєжу) спадаю до драгоциних гобийох. Поштански марки барз глєдани и интересантни ширшей публики праве пре їх красоту и тематску рижнородносц у поглядзе шицких сферох людзкей творчосци. У швеце нєшка исную коло милион зазберовачох поштанских маркох. Филателия облапя систематске зберанє и преучованє маркох и других поштанских документох. Скорей як цо запровадзене хаснованє маркох, поштански посилки ше оверйовали зоз рижнима печацами. Под поняцом „предфилателистични период” подрозумюєме период хаснованя праве тих печацох.

Филателиста

Перша поштанска марка видрукована у Анґлиї, 06. мая 1840. року. На нєй бул уциснути випатрунок твари кралїци Викториї. Тота марка наволана Оne Black Penny (чарни пени) пре чарну позадину и видруковани 63 милиони прикладнїки. Першираз ше зазбероваче поштанских маркох, будуци филателисти, зишли у Лондонє 1863.року.

Збирка маркох

Етимолоґия

Поняце филателия настало зоз транслитерацию француского слова philatelie 1864. року2. Жорж Ерпин похасновал гречески корень слова φιλ(ο)- phil(o)-, а представя прихильносц ґу дачому, и ἀτέλεια ateleia, хторе представя ошлєбодзенє од порциї, и на таки способ формовал поняце philatélie4.

История

19. вик

Прихильносц ґу збераню поштанских маркох при жительох зажило 1840. року, после друкованя перших прикладнїкох6. Вельку популарносц тот гоби посцигнул аж штредком 50-их рокох дзеветнастого вику. Перши колекционаре ше наволовали зазбероваче маркох. Иснує думанє же ше перши филателиста зявел теди кед ше до обтоку пущела перша марка, 06. мая 1840. року, кед писмо зоз 10 налїпенима марками One Peny Block, зоз уциснутим печацом пошти „LS.6MY6.1840.”, послала адвокатска кондзелария Ливерсон, Денби и Лави зоз Лондону до Шкотскей. Тото писмо, 1992. року на аукциї у Цириху предане за 690 000 франки.

Перши зазначени филателиста бул Мансен, управнїк пошти, зоз Паризу, а 1855. року предал свою збирку зоз марками. У тей збирки ше находзели шицки марки хтори були по теди видати. Купел ю Едвард де Лаплант, тарґовец зоз марками и половнима кнїжками, прето же препознал огромну вредносц тей збирки. Информация о тей велькей трансакциї допринєсла же би филателия була популарнєйша.

Концом 19. вику марки зберали векшина гражданох, аж и держави як цо то Анґлия, Нємецка, Француска, Баварска и Болгарска у своєй власносци мали збирки поштанских маркох. У тих державох вибудовани и музеї же би и у историї тих народох була зазначена филателия. Кустос Британского музею Томас Каплинґ мал свою власну збирку поштанских маркох хтору после своєй шмерци завитовал праве тому музею. Власнїк найвекшей збирки поштанских маркох у тим чаше бул барон Филип фон Ферари зоз Паризу.

20. вик

И у 20. вику жительство предлужело зберац велї предмети, алє марки були найпопуларнєйши. Почали ше друковац и каталоґи як цо то: Скот, Стенли Ґибонс, Ивер и Телиє. Зумштайн каталоґ першираз видати 1909. року у Швайцарскей а Мишел каталоґ у Нємецкей 1910. року.

Нємецки филателиста, Ханс фон Рудолфи, предложел же би ше славел Дзень поштанских маркох11. Идея прилапена у Нємецкей,а пошвидко и у других державох. Поштанска управа каждей держави одлучує кеди ше будзе преславйовац тот дзень а основни циль преславйованя прицагованє поваги на таку файту гобия, розвою филателиї и популаризованє хаснованя поштанских услугох. Куба, 1968. року, дзень марки пошвецела поштанскей марки зоз слику Ел филателиста Ґ. Сайлшена12.

Року 1926. основана Медзинародна филателистична федерация (FIP) и у єй оквире ше од 1929. року поряднє орґанизую медзинародни филателистични вистави. Перша шветова филателистична вистава у Праги отримана у авґусту и септембру 1962. року. FIP 1976. року позберала филателистични дружтва зоз 57 державох, поставени вецей як 100 вистави, а 1987. року до FIP-у ше учланєли вецей од 60 держави.

Вистава поштанских маркох

Штредком 20. вику филателия постала найрозширенша обласц аматерского збераня, а тому допринєсли10:

• обачлїво звекшане число посилкох медзи державами

• видаванє серийох маркох зоз мотивами историйних збуваньох, уметносци, рошлїнох, животиньох, спорту...

• видаванє поєдинєчних маркох або лїсткох зоз єдну або вецей марками и надписом на марґинох и тиж видаванє предметох хтори наменєни филателистом

• розконарене предаванє албумох, каталоґох и других подобних предметох за филателистох

• видаванє каталоґох зоз марками

• домашнї и медзинародни вистави хтори орґанизую филателистични дружтва, домашнї и медзинародни черанки, рекламованє филателиї у окремних часописох и периодичних публикацийох

Филателистични часописи видавани од Польскей на востоку, аж по Сиверну Америку, на заходзе. У Канади ше таки часопис друкує од 1976. року зоз меном Canadian Stamp News, як додаток часопису Canadian Coin News, хтори ше друкує од 1966. року.

Филателию у велькей мири усовершели СССР, ЗАД, Француска, Зєдинєне Кральовство и Австрия. Британска библиотека и поштански музеї у Стокголму, Паризу и Берну мали у тим чаше национални збирки маркох, а медзи приватнима збирками найпознатши Кральовска филателистична збирка Ф.Ферария (Австрия), М. Буруса (Швайцарска), А. Лихтенштайна, А. Хайнда, Дж. Бокера (ЗАД) и Х. Каная (Япон).

Штредком 1970-их рокох национали филателистични орґанизациї и здруженя исновали и скоро шицких державох, а од 150–200 милиони людзох ше занїма зоз тим гобийом.

21. вик

У Синґапуру, од 28. авґуста по 1. септембер 2004. року, першираз отримане Шветове першенство у маркох

Активносци у обласци филателиї

Пони ексрес

◆Тематска филателия виучує рисунки приказани на поєдинєчних маркох. Исную велї популарни теми як цо то: птици, ладї, поетове, предсидателє, кральове, карти, авиони, вселенски обєкти, спорти, шивотинї, рошлїни...

Маркици за алкоголни напой

◆Поштанска история преучує системи у пошти и їх функционованє. Преучую ше поштански марки и провадзаци материял зоз скорейших часох як цо то поштански печаци, поштански такси и прописи, способи на хтори посилки путую (драги и превозки). Наприклад, Пони Експрес бул найшвидши способ посиланя посилкох у ЗАД-ох. Колекционаре придаваю вельку значносц обмотку зоз хторим були обмотани посилки хтори превожел Пони Експрес.

◆Аерофилия часц науки о пошти и виучує воздушне посиланє посилкох од початку розвою. Филателисти окремну повагу пошвецели такому способу посиланя посилкох, а фаховци преучовали и документовали шицки аспекти такей услуги.

◆Астрофилателия часц науки о пошти и виучує марки и коверти зоз поштанским печацом зоз мотивами вселени.

◆Еринофилия обласц хтора виучує предмети подобни марком, а то вельконоцни и крачунски печаци, рекламни материяли...

◆Филателистична литература облапя тисячи кнїжки и часописи у хторих зазначени резултати виглєдованьох.

◆Филателия приходох преучує хаснованє маркох (маркицох) за наплацованє порциї и такси на алкоголни напой и доган, на правни документи, судски такси, такси на гориво за превозки, такси на дозволи за лови и риболов...

Вонкашнї вязи http://filatelijasrbije.blogspot.com/ http://www.filatelija.net/ https://efilatelija.posta.rs/ https://efilatelija.posta.rs/prigodna-izdanja-2023/ https://sowa-media.org/postanske-marke-naucna-i-tehnicka-dostignuca-upisana-za-nezaborav/ https://sowa-media.org/postanske-marke-deliblatski-bozur-krimski-bor-vodopadi-i-pecine-majdanpeka/