Яким Хома

Яким Хома (*8. марец 1926—†22. марец 1994), записовач старих-жридлових руских мелодийох, музичар, музични педаґоґ, хороводитель, руководитель оркестра.

Яким Хома
Народзени	8. марца.1926.
Умар	22. марца 1994. (68)
Державянство	югославянске
Язик творох	руски, сербски
Школа	Штредня музична школа, Нови Сад
Период твореня	1945—1990.
Жанри	музични педаґоґ, гранє, хорске шпиванє
Поховани	у Руским Керестуре

Биоґрафия

Яким Хома народзени 8. марца.1926. року у Руским Керестуре у ремеселнїцкей фамелиї бочкорашох. Оцец Йовґен и мац Веруна родзена Медєши. Яким Хома мал два шестри Марию и Веруну и гоч шицки тройо од малючка указовали талант за музику, лєм Яким ходзел до Штреднєй музичней школи у Новим Садзе дзе виучовал контрабас.

Яким Хома ше оженєл з Гелену родзена Такач, у малженстве мали двойо дзеци сина Йовґена и дзивку Гелену хтори тиж витворели музични кариєри.

У младосци, Яким Хома бул заняти у єдним подприємстве у Руским Керестуре, а источашнє у шлєбодним чаше водзел тамбурови и народни оркестер у Доме култури. Тримал и музични секциї по наших местох (Дюрдьов, Коцур, Нови Сад, Крущич), а єден час водзел и церковни хор у Руским Керестуре. Яким Хома тиж писал и музични аранжмани за потреби фестивалох рускей шпиванки.

Коло 1959. року Яким Хома ше зоз фамелию преселєл до Нового Саду и почал робиц у Городским транспортним подприємстве (ҐСП) дзе, медзи иншим, водзел и оркестер, а познєйше му у тим помагал син Йовґен.

Яким Хома грал на шицких тамбурових и смикових инструментох (на виолини, виоли, виолончелу и контрабасу) и на ґитари у шицких штимох.

Остал запаметани як барз добри музични педаґоґ и записовач старих руских мелодийох.

Яким Хома умар 22. марца 1994. року у Руским Керестуре дзе є и поховани.

Литература

• Тамаш, др Юлиян: „Дом културиˮ, Руски Керестур, лїтопис и история (1745-1991), Месна заєднїца Руски Керестур, 1992,  бок 419.
  

Вонкашнї вязи

• Руски народни шпиванки, Studia rithenica ч. 21, Дружво за руски язик, литературу и културу, Нови Сад, 2016, б. 5