Дюра Варґа
Дюра Варґа (*25. май 1925. - †25. октобер 2003.), учитель, новинар, дружтвено-политични и всестрани дїяч у култури и просвити
| Дюра Варґа | |
|---|---|
 | |
| Народзени | 25. мая 1925. |
| Умар | 25. октобра 2003. (78) |
| Державянство | югославянске, сербске |
| Язик творох | руски, сербски |
| Школа | Учительска школа Сомбор, Нови Сад |
| Период твореня | 1947—1987. |
| Жанри | просвита, новинарство, политика, култура и просвита |
| Поховани | на Новим теметове у Новим Садзе |
| Припознаня | вецей одликованя;
Искри култури КПЗ Войводини, Вукова награда КПЗ Сербиї |
Биоґрафия
ушорицДюра Варґа ше народзел 25. мая 1925. року у Дюрдьове. Родичи оцец Михал и мац Ксения родз. Олеяр. Дюра мал брата Янка и шестру Марию. У родним валалє Дюра Варґа закончел основну школу, а нїзшу ґимназию у Новим Садзе (1937-1940). Першу класу учительскей школи закончел у Сомборе 1941. року, други три класи у Новим Садзе, алє пре одход до НОВ нє дипломовал. Дипломски испит положел аж после демобилизованя 1947. року у Вершцу. Такой истого року є поставени за учителя и управителя школи у Дюрдьове, алє уж у октобрe истого року бул премесцени до Руского Керестура на длужносц наставнїка у нїзшей Ґимназиї, а у исти час волонтерски окончовал длужносц главного и одвичательного редактора новинох Руске слово по 1948. рок. Од 1948. року професийно бул на функциї секретара Рускей матки, а по єй "прерастаню" до Секциї за Руснацох Союзу културно-просвитних дружтвох Войводини, остал на функциї єй секретара аж по 1955. рок.
Дюра Варґа ше 1954. року винчал зоз Еуфемию родз. Няради, учительку. У малженстве мали сина Дюру и дзивку Ясну.
У периодзе 1955-1965 Дюра Варґа бул директор Новинско-видавательного подприємства Руске слово, а у периодзе 1955-1963 бул и главни и одвичательни редактор новинох Руске слово и других виданьох. Од 1965. по 1979. рок робел як редактор Рускей редакциї у Покраїнским заводзе за видаванє учебнїкох у Новим Садзе. Од 1979. по 1987. рок бул на длужносци секретара Културно-просвитней заєднїци Нового Саду. Зоз тей длужносци 1987. року пошол до заслуженей пензиї.
Значна улога у културно-образовним живоце
ушорицЗа живота Дюра Варґа охабел глїбоки шлїди у нашим културно-образовним живоце. Як учитель почал робиц у Дюрдьове, алє є пошвидко розпоредзени за наставнїка до керестурскей ґимназиї (1947), же би такой бул вибрани и за секретара тедишнєй Рускей матки, котра тиж мала шедзиско у Руским Керестуре. У исти час вон и главни и одвичательни редактор новинох Руске слово (1947-1948) и редактор дзецинского часопису Пионирска заградка, а бул и редактор даскелїх календарох и других публикацийох на руским язику тедишнього часу. Од 1952. року вон постал перши рердактор новооснованого часопису Шветлосц, а у периодзе 1955–1965 бул меновани за директора НВП Руске слово и у исти час и главного и одвичательного редактора новинох з истим меном.
Од 1965. року Дюра Варґа прешол до новооснованого Покраїнского заводу за видаванє учебнїкох у Новим Садзе за редактора учебнїкох на руским язику, а єден час и за помоцнїка директора того заводу. Ту вон основал солидну мрежу руских фаховцох з обласци образованя – прекладательох, лектороx и рецензентох и удало му ше за кратки час комплетовац шицки учебнїки за основни школи з руским наставним язиком. А кед обновена и ґимназия на руским наставним язику Варґа и за ню за кратки час обезпечел одвитуюци учебнїки.
Єден час Дюра Варґа бул и посланїк у Скупштини АПВ и член Совиту САП Войводини. Та, заш лєм, найглїбши шлїди охабел у обласци култури. Док бул у Керестуре вон бул и предсидатель тедишнього Културно-просвитного дружтва Ґабор Костельник у валалє, бул ґлумец у Дядьовим керестурским Аматерским театре, шпивач руских шпиванкох "на живо" у Радио Новим Садзе и мобилизатор на културним планє по шицких наших местох, автор даскелїх учебнїкох и автор значних написох у Шветлосци, котра виходзела по 1954. рок.
По преселєню до Нового Саду активно ше уключел до роботи у тедишнїм Културно-просвитним дружтве Максим Горки и през вецей роки бул його предсидатель. У чаше його руководзеня Дружтво посцигло найвисши уметнїцки досяги у своєй историї. Як доказ тому, окрем других, тиж значних, служи и додзелєна Дружтву Октоберска награда Нового Саду за успихи у културно-уметнїцкей дїялносци.
У 1977. року Дюра Варґа вибрани на професийну функцию секретара Културно-просвитней заєднїци Нового Саду. Ту остал аж до 1987. року, кед пошол до заслуженей пензиї.
Єден зоз сновательох Дружтва за руски язик и литературу
ушорицБарз значне доприношенє Дюра Варґа дал и дїялносци Дружтва за руски язик и литературу (познєйше Дружтва за руски язик, литературу и културу) од самого початку його иснованя, а особлїво од часу кед постал його треци по шоре предсидатель (1974-1981) року. У його мандатним периодзе приходзи до значного звекшаня числа членох (зоз 60 после снованя, на 400), сновало ше секциї Дружтва по шицких наших местох и робело ше на анґажованю фаховцох за пририхтованє наукових проєктох и водзенє семинарох за сотруднїкох на реализациї наукових проєктох. Дюра Варґа бул єден зоз сновательох и перши редактор часописа Дружтва Творчосц (1975). Часопис Творчосц виходзел по 1987. рок а од 1988. року виходзи як Studia Ruthenica.
Значна робота и доприношенє Дюри Варґи були на видаваню Правопису руского язика (1971) и Терминолоґийного словнїка (1972) Миколи М. Кочиша, як и робота на Лексиколоґийней картотеки руского язика хтора, у сотруднїцтве зоз познатим линґвистом др Митром Пешиканом зоз Беоґраду, познєйше резултовала з видаваньом двотомного Сербско-руского словнїка (1995, 1997).
Дюра Варґа автор прейґ 20 есейох и других написох з обласци руского язика и литератури. Вон пририхтал за видаванє Позберану прозу Миколи М. Кочиша (1978), кнїжку о Яшови Баковови (1983) и други виданя. Призберовал градзу и писал о руских просвитних преднякох як цо то Петро Кузмяк, Михайло Врабель, Ладислав Каменца, Михаил А. Поливка и Михаил Лїкар, о подобовому уметнїкови Йовґенови Кочишови, о новинарови дописовательови Янкови Скубанови и других.
Дюра Варґа достал вецей одликованя и велї награди и припознаня з обласци култури медзи хторима Искри култури КПЗ Войводини и Вукова награда КПЗ Сербиї.
Як пензионер Дюра Варґа жил у Новим Садзе. Упокоєл ше 25. октобра 2003. року, а поховани є у Новим Садзе на Новим теметове.
Литература
ушориц- Штефан Гудак: Дюра Варґа - як орґанизатор, аниматор и автор твореня учебнїкох на руским язику, Studia Ruthenica, Дружтво за руски язик, литературу и културу, ч. 7, 1999-2000, б. 109
- Ирина Папуґа: Дюра Варґа – перши редактор першого гласнїка Дружтва за руски язик и литературу Творчосц ч. 11, 2006, б. 130-134.
- Дюра Латяк: Дюра Варґа (1925-2003), Шветлосц, часопис за литературу, културу и уметносц, НВУ Руске слово, ч. 4/2003, б. 521-522.
Вонкашнї вязи
ушориц- ДЮРА ВАРҐA – ПEРШИ РЕДAКTOР ПEРШОГО ГЛАСНЇКA ДРУЖТВА ЗA РУСКИ ЯЗИК И ЛИТЕРАТУРУ "TВОРЧОСЦ", Ирина Папуґа, вебсайт Дружтва за руски язик, литературу и културу