Владимир Дадо Колєсар


Владимир Колєсар Дадо

Народзени	20. априла 1956.
Умар	17. юния 2004. (48)
Державянство	югославянске, сербске
Школа	ґимназия у Руским Керестуре
Период твореня	1974—2004
Жанри	фото репортер, уметнїк фотоґрафиї
Поховани	на теметове у Руским Керестуре

Владимир Колєсар (*20. април 1956—†17. юний 2004), фотоґраф профeсионалєц, фото-репортер, уметнїк фотоґраф и фото-хронїчар.

Биоґрафия

Владимир Колєсар Дадо ше народзел 20. априла 1956. року у Новим Садзе^[1]. Оцец Владимир Колєсар (1917. - 1973.), наставнїк математики и мац Маґдалена Колєсар (1920. - 2004.), вихователька. У Руским Керестуре закончел основну школу и ґимназию. Перши искуства як фотоґраф Владимир Колєсар здобул як член Фото-кино клуба хтори почал робиц 1974. року з нагоди Меморияла Петра Ризнича Дядї, з цильом же би о драмскей смотри Руснацох остали даяки шлїди. Потим члени того клуба фотоґрафовали и други подїї алє кед ше векшина членох розишла по школох и на студиї, вон далєй у валалє предлужел, практично, сам тоту роботу. Нєодлуга, вон ше зоз фотоґрафию почал занїмац нє лєм аматерски, почал з того и жиц. Сликовал свадзби, родзени днї, портрети за документи.

Владимир Колєсар робел у Руским Керестуре як самостойни фотоґраф профeсионалєц и фото-репортер. Занїмал ше зоз новинарску, документарну и уметнїцку фотоґрафию. Медзитим, Владимир Колєсар бул и фото-хронїчар валала и вон вeцeй як три дeцeниї на целулоидних филмох призначовал пулс найвeкшого руского валала у Войводини. Прeз обєктиви його фотоапаратох на филмох зазначeни хвильки кeд шe Кeрeстур радовал, кeд славeл, алє и кeд смутковал. Овиковичел рускокерестурску Водицу, школу, будинок Замок, як и други обєкти и будинки, а у велїх руских фамелийох зохабел вични шлїди - фотоґрафиї на памятку. У архиви Владимира Даду Колєсара тиж и знїмки найкрасших хвилькох з вeлїх Чeрвeних ружох, Мeмориялох Пeтра Ризнича Дядї, Дньох Гавриїла Костeльника... Дадово фотоапарати зазначeли вeлї красни хвильки зоз живота Мeснeй заєднїци, скоро кажду активносц у ОШ и Ґимназиї Пeтро Кузмяк, у ПК Пeрши май.

Профeсионална робота и искуство принєсли и прeкрасни, нєповторююци фото-импрeсиї. Дадо зазначeл даєдни кeрeстурски мотиви у їх полнeй краси; у нїх чувствуємe числeни пасмовити значeня, обачуємe ясну умeтнїцку подлогу яку мож посцигнуц зоз фотоґрафию як тeхнїку свойофайтового визуалного виражованя.

Вистави

Бул член Клуба подобових уметнїкох Дружтва за руски язик, литературу и културу з Нового Саду, од снованя того Клуба 1996. року. Заступени є у моноґрафиї "Подобова творчосци Руснацох" у виданю Дружтва за руски язик, литературу и културу, на боку 57 зоз колор фотоґрафию "Водица вжиме".

За живота Владимир Колєсар мал седем самостойни вистави, пейц колективни, у Кeрeстурe и Новим Садзe. Викладал и з других нагодох кед бул поволани же би илустровал красни предїли керестурского беґеля, пейзажи, природу.

Сотрудзовал у вeцeй войводянских виданьох, а найчастeйшe його фотоґрафиї мож було видзиц на бокох виданьох НВУ "Рускe слово" дзе обявйовал свойо успишни уметнїцки прилоги - фотоґафиї у виданьох Руского слова (у новинох, Руских календарох, Заградки и инших), и у друкованих гласнїкох у општини Кула. Сотрудзовал на виробку фотоматeриялу за шицки важнєйши виданя пририхтовани з нагоди означованя 250-рочнїци од присeлєня Руснацох на прeдїли Войводини и Сриму.

Бeзрeзeрвно шe уключeл и до Интeрнeт eри - од хвилькох кeд шe на швeтовeй информацийнeй мрeжи зявeли руски вeб сайти, Владимир Дадо Колєсар на нїх пласовал вeлї фотоґрафиї котри збогацeли змисти вязани за Руски Кeрeстур и Руснацох вообщe.

Зоз сиґурносцу мож повесц же фотоґрафиї Владимира Даду Колєсар у будучносци буду значни етноґрафски фото документи о єдним валалє и його людзох, подобнє як ше указали вецей як 900 неґативи на склу достати од фамелиї сликерох Будинскових. Лєм, розлика будзе тота же за Будинсковима остали 900 таки документи а Владимир Дадо Колєсар мал, єст таки процени, од 6000 до 8000 знїмки.

Владимир Дадо Колєсар нєсподзивано умар 2004. року кед мал лєм 48 роки. Поховани є на теметове у Руским Керестуре.